Tamara Ecclestone-un uşaq əmizdirdiyi şəkillər niyə birmənalı qarşılanmır?

  • 11 Fevral 2017
Tamara Ecclestone and Sophia Fotonun müəllifi PA/Ivette Ivens
Image caption Ecclestone əmizdirməni "sevgi və bəsləmənin güclü təzahürü" adlandırıb

32 yaşlı Ecclestone ilk dəfə iki yaşlı Sophia-nı əmizdirdiyi şəkilləri Instagramda paylaşıb.

Model insanlara əmizdirmənin gizlin olmalı olduğu barədə düşüncələrdən "əl çəkməyi" məsləhət görüb.

Ancaq onun bəzi izləyiciləri bu postu tənqid ediblər. Nəticədə Ecclestone daha bir şəkil paylaşaraq yenidən tənqidlə üzləşib.

Paylaşdığı şəkilə yazdığı şərhdə Ecclestone əmizdirməni "sevgi və bəsləmənin güclü təzahürü" adlandıraraq onun normal olduğunu, gizlədilməli olmadığını deyib.


Bəs şəkil niyə birmənalı qarşılanmır?

Bəzi adamlar əmizdirmənin ictimailəşdirilməsinin, xüsusilə də az qala üç yaşa çatmış uşağa ana südü verilməsinin nə dərəcədə düzgün olduğunu sorğulayıblar.

"Adamlar uşaqlarının şəklini hamının görməsi üçün bütün internetə yapışdırmamalıdırlar", - bir Instagram istifadəçisi yazıb.

"Körpələrin əmizdirilməsi gözəldir, ancaq iki yaşlı uşağı əmizdirilməsi iyrəncdir", - başqa bir istifadəçi qeyd edib.

Ecclestone şəklin mənfi şərhlər doğurmasının "təəccüblü" və "məyusedici" olduğunu deyərək ikinci şəkli paylaşıb.

O, öz şərhində belə yazıb: "Mən bütün anaları dəstəkləyirəm və onlara haqq qazandırıram. Şəxsən mən nifrətin ruh üçün ağır və pis olduğunu düşünürəm".

Fotonun müəllifi PA/Ivette Ivens

Bəzi analar litvalı fotoqraf Ivette Ivensin çəkdiyi fotoları bəyəniblər. Ivette Ivens hamilə və uşaq əmizdirən anaların fotoşəkillərini çəkməsi ilə tanınır.

"Mən öz qızımı dörd yaşına qədər əmizdirmişəm. Heç vaxt insanların buna qəribə baxmasını anlamamışam", deyə Leanne Caffyn adlı ana yazıb.

Helen Tomlinson isə belə deyib: "Mən bunu çox bəyənirəm. Mən öz körpəmi cəmi bir ay əmizdirə bildim, çünki ictimaiyyət arasında və ailəmin qarşısında özümü narahat hiss edirdim".


Qadınlar həmişəmi uşağa süd verməlidirlər?

Ecclestone bildirib ki, insanların bu şəkilləri uşaqlarını əmizdirmək əvəzinə onlara butulkada süd verən anaları tənqid etmək məqsədi daşıdığını düşünməsindən "təəccübləndiyini" deyib.

Ancaq Kent Universitetinin Valideynlik Elmləri Mərkəzinin direktoru Ellie Lee bundan bir o qədər də təəccüblənməyib.

"Əmizdirmə o qədər əxlaqiləşdirilib və siyasiləşdirilib ki, artıq müzakirə nəzarətdən çıxıb. Son nəticədə söhbət sadəcə süddən gedir", - o deyib.

Fotonun müəllifi Science Photo Library

Britaniyada qadınlara körpələrini doğuşdan bir saat sonra əmizdirmək məsləhət görülür. Tövsiyyə olunan əmizdirmə müddəti isə altı aydır.

Doktor Lee deyir ki, nəticədə bir çox qadınlar ilk dəfə körpələrinə süni qida verəndə özlərini "bacarıqsız" hiss edirlər.

"Valideynlər uşaqlarını əmizdirsələr də, əmizdirməsələr də bunun dəhşətli səhv olduğunu düşünməməlidirlər. Bəlkə uşağı əmizdirmək anaya çətin gəlir, yaxud ata da uşağa yemək vermək işində iştirak etmək istəyir", - o deyib.


Qadınlar körpələrini neçə ay əmizdirməlidirlər?

Ümumdünya Səhiyyə Təşkilatı (ÜST) uşaqlara digər qidalarla birlikdə iki il və daha artıq ana südü verilməsini tövsiyyə edir.

Ancaq doktor Leenin sözlərinə görə, Britaniya qadınları uşaqlarını əmizdirməyi daha tez dayandırırlar.

Britaniya Milli Səhiyyə Xidmətinin 2010-cu ildə keçirdiyi sorğunun nəticələrinə görə, qadınların yalnız 1 - 2 faizi körpəsinə altı ayına qədər yalnız ana südü verir.

"Bu qədər çox qadın ana südünü başqa qidalarla qarışdırmağı seçirsə niyə buna pis baxmalıyıq?" - deyə o sual edir.

Image caption Britaniyada xüsusi əmizdirmə otağı

Əmizdirmə sahəsində maarifləndirmə ilə məşğul olan Britaniyanın La Leche Liqasından Anna Burbidge də hər kəsin eyni qaydalara əməl etməli olmadığını deyir.

"Körpələr fərqli vaxtlarda yeriməyə, danışmağa, bezdən çıxmağa başladıqları kimi onların ana südünə tələbatı da fərqlidir", - o deyir.

Onun sözlərinə görə, uşağın körpə yaşdan sonra əmizdirilməsinin zərərli olması sübut olunmayıb.


İctimai yerdə uşaq əmizdirmək hələ də tabudurmu?

Ecclestone onu tənqid edənləri "əmizdirməni seksuallaşdırmaqda" ittiham edib.

Ancaq Britaniyada "Bərabərlik aktı" adlanan qanun qadınlara ictimai yerlərdə uşaq əmizdirmək hüququ verir. Şotlanddiyada isə qadınlar əlavə qanunlarla qorunur. Burada iki yaşına qədər uşağına ana südü verən qadını dayandırmağa çalışmaq qanunla cinayət sayılır.

Ancaq bəzi restoran və dükanlar anaları uşaqlarını əmizdirdikləri zaman üstlərini örtməyə çağırırlar.

"Atalar və nənələr üçün əmizdirmə" adlı kitabın müəllifi doktor Wendy Jones deyir ki, Ecclestoneun postuna reaksiya cəmiyyətin ictimaiyyət arasında uşaq əmizdirmək istəyən anaları dəstəkləmədiyini göstərir.

UNICEF-in Britaniya Körpə Təşəbbüsü layihəsinin direktoru Sue Ashmore deyir ki, analar uşaqlarını açıq şəkildə əmizdirə bilməyəndə "ana südünün hər şeydən yaxşı olduğu" barədə rəsmi məsləhət heç bir işə yaramır.

"Bu onların buna görə özlərini günahkar hiss etməsinə səbəb olur" - o deyir.


Bu barədə daha geniş