Trump sirləri paylaşmaq "hüququnu" müdafiə edir

Trump, Lavrov, Kislyak Fotonun müəllifi AFP

Prezident Donald Trump Rusiya ilə informasiya mübadiləsinə dair özünün "mütləq hüququnu" müdafiə edib.

Cənab Trump bu barədə tvitində yazır ki, o, Rusiyanın İD-ə qarşı daha çox iş görməsini istəyib və "terrorizm və aviasiya təhlükəsizliyinə aid olan faktları" bölüşüb.

Prezident Trump Rusiyanın xarici işlər nazirinə özünü İslam Dövləti (İD) adlandıran qruplaşma haqqında yüksək məxfi məlumatlar aşkarlayıb, mənbələr ABŞ mətbuatına bildirib.

Təyyarələrdə kompüterlərin istifadəsinə aid olan məlumatı ABŞ tərəfdaşı verib və o, Rusiya ilə paylaşmağa icazə verməyib, Washington Post yazır.

Cənab Trump ötən həftə Oval ofisdə Rusiya xarici işlər naziri Sergey Lavrovu qəbul edib.

Rəsmilər kütləvi informasiya vasitələrinin yaydığı məlumatı təkzib edib, amma cənab Trump-ın aid olduğu Respublikaçılar partiyasının yüksək rütbəli üzvü izahat verilməsini istəyib.

Trump kampaniyasının Rusiya ilə əlaqələrinin olması və Moskvanın ABŞ prezident seçkilərinə müdaxiləsi barədə iddialar bir neçə araşdırmanın tərkib hissəsidir.

Lakin prezident bu cür ittihamları qəbul etməyib və onları "saxta xəbərlər" adlandırıb.

Seçki kampaniyası zamanı, cənab Trump demokrat rəqibi Hillary Clinton-u dəfələrlə "həssas materialları tənzimləyə bilmədiyi üçün" tənqid edib.

Nə baş verib?

ABŞ prezidenti Oval ofisdə Rusiya xarici işlər naziri və Rusiya səfiri Sergey Kislyakla söhbət zamanı informasiya mənbəyinin kimliyini aşkara çıxara biləcək detallar açıqlayıb, rəsmilər Washington Post və New York Times-a deyiblər.

Müzakirələr İD-lə bağlı olub və ABŞ prezidentinin "ssenaridən kənara çıxdığı" bildirilir.

Qəzetlər yazır ki, kəşfiyyat məlumatı ABŞ müttəfiqi tərəfindən verilib və informasiya digər ABŞ müttəfiqləri ilə bölüşmək üçün "həssas hesab edilib".

İD barədə söhbət edilərkən, prezident Trumpın təyyarələrdə kompüterlərdən istifadə və hədəflərin təyin edildiyi şəhərə dair gizli məlumatları paylaşdığı güman edilir.

Hərçənd ki Trump-ın bu hərəkəti qanunsuz hesab edilmir, çünki ABŞ prezidentlərinin gizli məlumatları paylaşmaq hüquqları vardır.

Donald Trump-ın Rusiya nümayəndələri ilə görüşü Trump-ın FTB direktoru James Comey-i vəzifəsindən azad etməsindən sonra baş tutub.

Cənab Comey Trump kampaniyası rəsmilərinin Rusiya ilə əlaqələri və Moskvanın ABŞ prezident seçkilərinə müdaxiləsi ilə bağlı iddiaları araşdırırdı.

Görüşdə Rusiyalı fotoqraf iştirak etsə də, ABŞ mediası bura buraxılmayıb.

Senatın ikinci yüksək vəzifəli demokratı Dick Durbin deyib ki, cənab Trump-ın hərəkətləri "təhlükəli" və "düşüncəsiz" görünür.

Senatın Xarici Əlaqələr Komitəsinin respublikaçı rəhbəri Bob Corker bildirib ki, hadisə doğrudursa "çox narahatvericidir".

Ağ Ev nə deyir?

Milli Təhlükəsizlik Müşaviri HR McMaster jurnalistlərə bildirib ki, yazılan xəbərlər "yalandır".

Dövlət Katibi Rex Tillerson bəyənat yayaraq bildirib ki, "(Görüşdə) konkret təhlükələrin xarakteri müzakirə olunub, lakin onlar (Trump, Lavrov və Kislyak) mənbələri, metodları və ya hərbi əməliyyatları müzakirə etməyib".

Bu barədə daha geniş