Gürcüstan: Rusiya işğalı barədə fləşmob sosial şəbəkələrdə mübahisələr doğurub

Lövhə Fotonun müəllifi News.on.ge
Image caption Facebook istifadəçiləri belə lövhəni Facebook saytlarına yerləşdiriblər.

"Mən Gürcüstandanam və mənim ölkəm Rusiya tərəfindən işğal olunub", - 10 minlərlə istifadəçi belə bir yazılı lövhəni Rusiya-Gürcüstan müharibəsinin ildönümü ilə bağlı Facebook-dakı şəxsi profilinə yerləşdirib.

Aksiya heç də hamının xoşuna gəlməyib.

Tikanlı məftil təsviri ilə müşayiət olunan lövhə Gürcüstandan qopmuş regionlarda sərhəd nişanələri və hasarlardan xəbər verir.

Bir neçə gün əvvəl fləşmobu işə salan Оn.ge internet nəşri onun populyarlıq rekordu vurduğunu bildirir.

4 gün ərzində öz profil şəklıni 100 min adam dəyişdirib.

"Biz müntəzəm olaraq müxtəlif hadisələr üçün fərqli yazılı lövhələr hazırlayırıq. Onları gürcüstanlı istifadəçilər yükləyir. Bu onlar arasında ən populyar olanıdır", - BBC-ə nəşrin direktoru Nodar Davituri deyib.

Onun sözlərinə görə aksiyanın məqsədi ölkə ərazisində - Gürcüstandan qopmuş Cənubi Osetiya və Abxazıyada - Rusiya qoşunlarının olmasını xatırlatmaq idi və buna da nail olunub.

"Mən Gürcüstandanam və mənim ölkəm Rusiya tərəfindən işğal olunub", - Rusiya-Gürcüstan müharibəsinin ildönümü ilə bağlı 10 minlərlə istifadəçi belə bir yazılı lövhəni Facebook-dakı şəxsi profili şəklinə əlavə edib.

"Bir çox adam, Facebook-un gürcüstanlı istifadəçilərinin təxminən 20 faizi bu lövhəni yerləşdirib. Hər bir istifadəçi ən azı 10 nəfər dosta malik olduğuna görə bütün Gürcüstan Facebook-u onu gördü", - Davituri deyir.

Rusiyanın qarşısı lövhələrlə almaq olmaz

Mariam Pesvianidze tanışının avatarını görəndən sonra öz profil şəklini dəyişdirib.

"Mən öncə nəyin baş verdiyini anladım. Daha sonra avatarları görəndə bunun Facebook daxilində aksiya olduğunu başa düşdüm. Dərhal ona mən də qoşuldum", - deyir Mariam.

Fotonun müəllifi Mariam Pesvianidze/Facebook
Image caption Mariam deyir ki, rusiyalı dostları arasında aksiyanın birmənalı qarşılanmaycağını düşünürdü.

"Gürcüstan istifadəçiləri arasında məsələ sual doğurmur. Aydındır ki, Gürcüstan işğal olunub və dinc müharibə vəziyyətindədir.

Lakin mənim Moskva və Peterburqdakı dostlarım, azdan-çoxdan mötəbər mənbələrdən məlumat alanlar da, təəssüf ki, bir qayda olaraq, Gürcüstanda baş verənlərdən bixəbərdir", - Mariam qeyd edir.

Mariam lövhədən istifadə edəndən sonra, onun bəzi dostları həqiqətən də, Gürcüstanda baş verənlərlə bağlı suallar verməyə başlayıb.

"Bu mənə bir qədər qəribə gəlirdi, lakin digər tərəfdən anlayırdım ki, onlar bunu qəsdən etmirlər. İnsanlar bunu unudublar, səmimi olaraq hansısa işğalın yer aldığını başa düşmürlər", - o, deyir.

Profillərin kütləvi dəyişdirilməsi sosial şəbəkələrdə Gürcüstan istifadəçiləri arasında da neqativ reaksiya yaradıb.

Belələri aksiyanın mənasız olduğunu, onun nəticəsində Rusiyanın Gürcüstan siyasətini dəyişdirməyəcəyini düşünür.

Lövhədəki yazının yalnız bir qisminin düzgün olmadığını hesab edən istifadəçilər ideya müəlliflərini tənqid ediblər.

Onlar deyir ki, Rusiya Gürcüstanı bütövlükdə yox - onun hissəsini işğal edib.

"Dostlar "Mən Gürcüstandayam və mənim ölkəm Rusiya tərəfindən işğal olunub", - deməklə siz beynəlxalq ictimaiyyətə, turistlərə və potensial investorlara ölkə barədə yanlış mesaj verirsiniz. Belə çıxır ki, ölkə Rusiya dövlətinin silahlı qüvvələri tərəfindən bütövlükdə işğal olunub və hazırda ərazidə hərbi hərəkətlər aparılmaqdadır. Bu həqiqətə uyğun deyil", - Nino Dzaqanişvili adlı istifadəçi öz dediklərini #Rusiyaevəget statusu ilə müşayiət edib.

O, istifadəçilərə Rusiya tərəfindən işğal olunmuş ərazilərin konkret adlarının göstərilməsini təklif edir.

"Mən Gürcüstan ərazisinin bütövlükdə işğal altında olduğunu hesab etmirəm. Allah bizə bunu göstərməsin və itirilmiş ərazilər tezliklə qaytarılsın! Mən Gürcüstandayam və ölkəmin 1/5-i 2008-ci ildən Rusiya tərəfindən işğal olunub!!!", - istifadəçi İa Tinikaşvili yazıb.

Davituri tənqidə cavab olaraq deyir ki, Gürcüstanda ölkənin məhz hansı hissəsinin Rusiya tərəfindən işğal olunduğunu hamı bilir və bunu dəqiqləşdirməyə ehtiyac yoxdur.

"Belə aksiyalar Rusiyanı qorxudub geri çəkilməyə məcbur etdirmək üçün yox, nəyin baş verdiyini xatırlatmaq və müzakirələrə təkan vermək məqsədini daşıyır", - o, israr edir.

İşğal barədə avatarlar Rusiyanın Gürcüstana qarşı hərəkətlərinə etirazın yeganə forması deyil. Beləki, mövzu ilə bağlı qızğın debatlar yalnız internet avatarları ilə məhdudlaşmır.

Image caption Tbilisi kafe-mağazasında mübahisə doğuran çanta.

Tbilisi mərkəzindəki kafe-mağazalarının birində Rusiyanın işğalı barədə analoji yazını əks etdirən çantanın şəkli Rusiya və Gürcüstan istifadəçiləri arasında kəskin reaksiya doğurub.

"Bir növ xoşa gəlməz oldu... bizim isə xəbərimiz yoxdur. Gürcüstanı sevirik... ama bax gör nə alınır", - şəkli paylaşan penalitrova adlı istifadəçi yazır.

"Sabah ərimlə alış-veriş üçün sizin mağazaya baş çəkməyə hazırlaşırdıq, nə yaxşı ki, münasibətinizi vaxtında gördük! Satışlarda uğurlar!)", - alinagaydabura belə şərh verib.

Öz növbəsində gürcüstanlı istifadəçilər rusiyalı hərbçilərin Gürcüstan ərazisində olmasını xatırlamağa səsləyirlər.

"Təəssüflər olsun ki, siz bizi düşünməyə səsləyirsiniz, biz çox düşünürük və sizin siyasətinizdən əziyyət çəkirik. Siz özünüz düşünün ki, bütün dünya rusiyalıları niyə xoşlamır", - sopusha13 yazır.

"Gözünüzü açın: Burda Rusiya xalqının ünvanına heç bir təhqir yoxdur, çantanın üzərində real faktdır! Bütün gürcülərin ağrısı!", - belə şərhi ek_khid adlı istifadəçi yazıb.

Mağazanın əməkdaşı Nutsa Dolidzenin sözlərinə görə belə çantalar düzəltmək ideyası dizayner Tinatin Kvinikadzenin ideyasıdır.

İki həftə əvvəl satışa yüzədək çanta çıxarıldı. Onlar üç gün ərzində satıldı, Nutsa Dolidze deyir.

"Bu çantanı almaq istəyənlərdən gündə 40 zəng daxil olurdu. Tam "anşlaq" idi. Biz (çantaların -red) yeni bir partiyasını hazırladıq, alıcılar dalğası isə ara vermir", - Nutsa Dolidze qeyd edir.

Yerli istehlakçılar malı fəal alırlar. Lakin kafe kimi də fəaliyyət göstərən mağazaya Rusiyadan da xeyli turist baş çəkir.

Onlardan bəziləri öz narazlığını gizlətmir, Nutsa vurğulayır.

"Bəziləri sual verir, digərləri isə bilavasitə tənqidə keçir. Elə hallarda olub ki, satışda belə çanta barədə xəbər tutanlar məhz xüsusən narazı olduqlarını bildirmək üçün gəliblər. Lakin əksəriyyət münasibət bildirmir. Bunu məqbul sayan, nədən söhbət getdiyini bilən rusiyalı müştərilərimiz də olub".

Nutsanın sözlərinə görə yeni çantanı alanlar yalnız yerli sakinlər deyil.

Xüsusi maraq göstərənlərə Ukrayna turistlərini aid etmək olar.

"Ukraynadan olan müştərilərdən biri hətta üzərində Gürcüstan sözü əvəzinə Ukrayna yazılmış çantaların satılmasını təklif edib".

Abxaziyadan baxış: Putin Abxaziyada ən populyar siyasətçidir.

İnal Xaşiq, "Çeqemskaya Pravda" qəzetinin baş redaktoru (Abxaziyada rus dilində nəşr edilən qəzet):


Abxaziyada Cənubi Osetiyadakı müharibənin başlanmasından keçən 9 il ərzində həmin olaylara münasibət heç bir şəkildə dəyişməyib.

8 avqust 2008-ci ildə baş verən hadisələrdən bir-iki həftə keçmiş Rusiya Abxaziya və Cənubi Osetiyanı rəsmən tanıdı. Bu alqışla qarşılandı.

Lakin bütün təqdirlərdə bu müstəqilliyi hər gün təsdiqləmək, problemləri həll etmək lazımdır və təəssüflər olsun ki, onların sayı azalmayıb.

Amma başlıcası budur ki, həmin hadisələrin kontekstində Abxaziya özünü Gürcüstanla yeni müharibədən mühafizə etmiş oldu (ən azı uzun müddətə).

Bu 9 il əvvəl baş verən hadisənin yəqin ki, ən mühüm nəticəsidir.

Hazırda ölkədə iqtisadi çətinliklər, sosial problemlər barədə danışılır. Müharibə ilə bağlı məsələlər isə artıq mərkəzdə durmur, təhlükəsizlik problemi Rusiyanın sayəsində faktiki olaraq öz həllini tapıb.

Abxaziyanın dünyada o qədər də çox dostu, tərəfdarı yoxdu.

Məlum məsələdir ki, ölkənin ən böyük müttəfiqi, nəinki müttəfiqi, faktiki olaraq ən əhəmiyyətli iqtisadi yardım göstərən ölkə prezidentinin Abxaziyaya səfəri - həqiqətən də bir hadisə olub.

Ümumiyyətlə Abxaziyada Putinə çox yaxşı münasibət bəsləyirlər.

Aydındır ki, Rusiya cəmiyyətində bir sıra problemlər mövcuddur və ola bilsin ki, Putinə birmənalı yanaşmırlar.

Lakin Abxaziyada ona qarşı yalnız müsbət yanaşma mövcuddur.

Bu həm Rusiyanın müstəqilliyi tanımasına görə, həm də ki, iqtisadi yardım və təhlükəsizlik məsələlərinə görədir.

Putin yalnız bu lütfkarlığa görə qəbul olunur, ona qarşı başqa hər hansı mənfi məqamlar yoxdur.

Abxaziyada ən populyar siyasətçi varsa o da Putindir.

Mən fikir verdim ki, hər hansı xəbər və şayiəni coşqunluqla müzakirə edən sosial şəbəkələrdə ürkütməmək üçün Rusiya prezidentinin səfəri barədə xəbəri çox ehtiyatla qarşıladılar.

Və ona qarşı belə kövrək münasibət kifayət qədər anlaşılandır.

Bu barədə daha geniş