ရခိုင်တိုက်ခိုက်ခံရမှု ၁၇ ဦးသေ

  • 9 အောက်တိုဘာ 2016
ဓာတ်ပုံ မူပိုင် BBC Burmese
Image caption မောင်တော၊ ရသေ့တောင်နဲ့ ဘူးသီးတောင်မြို့နယ်တွေက နယ်ခြားစောင့်ရဲတပ်ဖွဲ့ တိုက်ခိုက်ခံရ

ရခိုင်ပြည်နယ် မောင်တောမြို့နယ်က နယ်ခြားစောင့် ရဲကွပ်ကဲမှု ဌာနချုပ်အပါအဝင် ဘူးသီးတောင်နဲ့ ရသေ့တောင်မြို့နယ်တွေက နယ်ခြားစောင့်ရဲ နယ်မြေရုံးတွေ အကြမ်းဖက် စီးနင်းတိုက်ခိုက်ခံရပြီး လက်နက်တွေ လုယူခံရတယ်လို့ အစိုးရက အတည်ပြုပြောကြားပါတယ်။

တနင်္ဂနွေနေ့မနက် အစောပိုင်းအချိန်တွေမှာ မောင်တောမြို့နယ် နယ်ခြားစောင့် ရဲကွပ်ကဲမှု ဌာနချုပ် (ကျီးကန်းပြင်)၊ ဘူးသီးတောင်မြို့နယ် နယ်ခြားစောင့် ရဲတပ်ဖွဲ့ခွဲ ငါးခူရနယ်မြေရုံးနဲ့ ရသေ့တောင်မြို့နယ် ကိုးတန်ကောက် ရဲကင်းစခန်းတွေ အကြမ်းဖက် စီးနင်းတိုက်ခိုက်ခံခဲ့ရတာ ဖြစ်ပါတယ်။

တိုက်ခိုက်ခံရမှုမှာ နယ်ခြားစောင့်ရဲတပ်ဖွဲ့ဘက်က ၉ ဦး ကျဆုံးခဲ့ပြီး တိုက်ခိုက်သူတွေဘက်က ၈ ဦး ကျဆုံးခဲ့ပါတယ်။

နယ်ခြားစောင့်တပ်ဖွဲ့ဘက်က ဒဏ်ရာရသူ ၅ ဦးနဲ့ ပျောက်ဆုံးသူ တဦးရှိပြီး တိုက်ခိုက်သူတွေဘက်က ၂ ဦးကို အရှင်ဖမ်းမိခဲ့ပါတယ်။ ရဲတပ်ဖွဲ့ရဲ့ လက်နက် ၅၁ လက်နဲ့ ကျည်တောင့်တွေလည်း ပါသွားတယ်လို့ ရဲချုပ် ဦးဇော်ဝင်းက သတင်းစာရှင်းလင်းပွဲမှာ ပြောပါတယ်။

ဒါပေမယ့် ဒီတိုက်ခိုက်မှုမှာ ဘယ်အဖွဲ့အစည်းရဲ့ လက်ချက်ဆိုတာ အတည်မပြုနိုင်သေးကြောင်း သူက ပြောပါတယ်။

အခုအခါ အဲဒီမြို့နယ်တွေမှာ ညမထွက်ရအမိန့်ကို အရင် ည ၁၁ နာရီကနေ မနက် ၆ နာရီအစား အခုအခါ ည ၇ နာရီကနေ မနက် ၆ နာရီထိ တိုးမြှင့် သတ်မှတ်ထားပါတယ်။

ရခိုင်ပြည်နယ်မြောက်ပိုင်းက ဒေသခံပြည်သူတွေဟာ လုံခြုံရေးအတွက် စိုးရိမ်နေကြတယ်လို့ ဒေသခံတွေက ဘီဘီစီကို ပြောပါတယ်။