သံမဏိ နှင်းဆီ ဂျာနယ် ထုတ်ဝေသူ သတ်ခံရ

  • 16 ဧပြီ 2017
ဓာတ်ပုံ မူပိုင် The Iron Rose FB Page
Image caption ကိုဝေယံဟိန်းကို သူနေထိုင်ရာ တိုက်ခန်း အတွင်းမှာ ထိုးသွင်း ဒဏ်ရာ တွေ နဲ့ သေဆုံး နေတာ ကို တွေ့ရှိရ

သံမဏိ နှင်းဆီ ဂျာနယ် အယ်ဒီတာ ကိုဝေယံဟိန်း ကို ဗိုလ်တထောင်ဈေးလမ်း က သူ့ရုံးခန်းမှာ ဧပြီလ ၁၆ ရက်နေ့ သင်္ကြန် အတက်နေ့ မနက်က ဝမ်းဗိုက်မှာ ဒဏ်ရာ တွေနဲ့ သေဆုံးနေတာ ကို တွေ့ရှိခဲ့ပါတယ်။

ပတ်ဝန်းကျင်မှာ အနံ့ တွေ ထွက် နေလို့ ဘေးအိမ်ကနေပြီး မိဘတွေ ကို အကြောင်းကြား တဲ့ အတွက် ဝင်ရောက် ရှာဖွေတဲ့ အခါမှာ သေဆုံး နေတာ ကို တွေ့ရှိခဲ့ရတာ ဖြစ်ကြောင်း ဖခင် ဖြစ်သူ ဦးစိန်အုပ် က ပြောပါတယ်။

ညာဘက် ဝမ်းဗိုက်မှာ ထိုးသွင်း ဒဏ်ရာ ၁၅ ချက်လောက် တွေ့ရှိရတယ်လို့ ဖခင် ဖြစ်သူ က ပြောပါတယ်။

လောလောဆယ်မှာ အလောင်းကို ရင်ခွဲ စစ်ဆေးဖို့ ဆေးရုံကြီး ကို ပို့ထားရပါတယ်။ ဆေးစာ ရမှ လိုအပ်တဲ့ စစ်ဆေးမှုတွေ ဆက်လက် ဆောင်ရွက်မယ်လို့ ရဲတပ်ဖွဲ့ က ပြောပါတယ်။

ကိုဝေယံဟိန်း က လူတိုင်းနဲ့ သင့်တင့်အောင် ပေါင်းသင်း တတ်သူ ဖြစ်ပြီး ရန်ငြိုးရန်စ ရှိတယ်လို့ မကြားဘူးကြောင်း ဖခင် ဖြစ်သူ ဦးစိန်အုပ် က ဘီဘီစီ ကို ပြောပါတယ်။

သံမဏီ နှင်းဆီ ဂျာနယ် ကို ထုတ်ဝေသူ အဖြစ်လုပ်ကိုင်ခဲ့တာ တစ်နှစ်ကျော်ခန့် ရှိပြီလို့ သိရပါတယ်။ ဂျာနယ်ပါ အရေးအသား တွေနဲ့ ပတ်သက်ပြီး ပြဿနာ တစုံတရာ ရှိတယ်လို့ မကြားဘူး ကြောင်းလည်း ဖခင် ဖြစ်သူက ပြောပါတယ်။

သေဆုံးတာ လေးငါးရက်ခန့် ကြာမြင့်နေပြီလို့ ခန့်မှန်း ရပြီး ပတ်ဝန်းကျင်က တဆင့် မိဘ တွေဆီကို အသိပေး အကြောင်းကြားမှ အလုပ်လုပ် နေထိုင် ရာ တိုက်ခန်း အတွင်းမှာ ထိုးသွင်း ဒဏ်ရာ တွေ နဲ့ သေဆုံး နေတာ ကို တွေ့ရှိရတာ ဖြစ်ပါတယ်။

ရုံးခန်း ထဲမှာ ကိုဝေယံဟိန်း ကိုင်ဆောင်နေကျ လက်ကိုင်ဖုန်း ကို ရှာဖွေ တွေ့ရှိရ ခြင်း မရှိဘူးလို့ ဦးစိန်အုပ် က ပြောပါတယ်။ ကိုဝေယံဟိန်း က သူရိယ နေဝန်း ဂျာနယ် နဲ့ စာနယ်ဇင်း အလုပ်တွေ စတင် ဆောင်ရွက်ခဲ့သူ ဖြစ်ပြီး သူရိယနေဝန်း ဂျာနယ် ထုတ်ဝေသူ ကိုမိုးဟိန်း ရဲ့ တူတော်စပ်သူပါ။

သင်္ကြန်ကာလ ဂျာနယ် အလုပ်ခန်း ပိတ်ထားတဲ့ အတွက် ကွန်ပျူတာ အသုံးပြုတာ၊ အီးမေးလ် ပို့တာတွေလည်း မတွေ့ရဘူးလို့ ဖခင် ဖြစ်သူက ပြောပါတယ်။ ဘာဖြစ်ခဲ့ တယ် ဆိုတဲ့ သဲလွန်စ ရနိုင်စရာ ကတော့ သူ့ရဲ့ ဖုန်းတစ်ခု ပဲ ရှိတယ်လို့ ဦးစိန်အုပ်က ပြောပါတယ်။

ဧပြီလ ၁၁ ရက်နေ့မှာ ကိုဝေယံဟိန်း နဲ့ မိသားစုဝင်တွေ နောက်ဆုံး အဆက် အသွယ် ရခဲ့ပြီး၊ ဧပြီလ ၁၆ ရက်နေ့မှာ သေဆုံး နေတာ ကို ရှာဖွေ တွေ့ ရှိခဲ့ရတာ ဖြစ်ပါတယ်။

လောလောဆယ်မှာ ဂျာနယ်တိုက် ဖွင့်လှစ် ထားတဲ့ တိုက်ခန်း ကို ရဲတပ်ဖွဲ့ က လုံခြုံရေး အစောင့်အရှောက် ပေးထားတယ်လို့ သိရပါတယ်။

အခု အမှုကို ပုဇွန်တောင် မြို့နယ် ရဲစခန်း က လူသတ်မှု ပုဒ်မ ၃၀၂ နဲ့ မြို့နယ် ရဲတပ်ဖွဲ့မှူး ကိုယ်တိုင် ဉီးဆောင်ပြီး စုံစမ်း စစ်ဆေး နေကြောင်း သိရှိရပါတယ်။