လွှတ်တော်အဆိုကို အစိုးရသတင်းစာ ဆင်ဆာလုပ်

  • 23 ဩဂုတ် 2017
ဓာတ်ပုံ မူပိုင် AFP
Image caption နေပြည်တော်က လွှတ်တော် မြင်ကွင်း

ရခိုင်ပြည်နယ် မြောက်ပိုင်းအရေးနဲ့ ပတ်သက်လို့ ပြည်သူ့လွှတ်တော်မှာ ဆွေးနွေးခဲ့တဲ့ အဆိုထဲမှာ ပါတဲ့ ဘင်္ဂါလီလူမျိုးနာမည်ကို နိုင်ငံပိုင်သတင်းစာတွေမှာ ဖြတ်တောက်ရေးသားခဲ့တယ်ဆိုပြီး ရသေ့တောင်မြို့နယ် ပြည်သူ့လွှတ်တော်ကိုယ်စားလှယ် ဒေါ်ခင်စောဝေ က ပြန်ကြားရေးဝန်ကြီးဌာနကို ကန့်ကွက်စာပို့ခဲ့ပါတယ်။

ရခိုင်ပြည်နယ်မြောက်ပိုင်းက မောင်တော၊ ဘူးသီးတောင်နဲ့ ရသေ့တောင်မြို့နယ်တွေမှာ ဘင်္ဂါလီလူမျိုး အစွန်းရောက် အဖွဲ့တွေက ရာဇဝတ်မှုတွေ ကျူးလွန်နေတာကြောင့် ဒေသတွင်း ပိုမိုကောင်းမွန်တဲ့ အုပ်ချုပ်ရေး၊ လုံခြုံရေး အစီအမံတွေ ချမှတ် အကောင်အထည်ဖော်ပေးဖို့ တိုက်တွန်းတဲ့ အဆိုကို ပြည်သူ့လွှတ်တော်အစည်းအဝေးမှာ ဒေါ်ခင်စောဝေက တင်ခဲ့တာပါ။

အဲဒီ အဆိုကို နိုင်ငံပိုင် မြန်မာအလင်းနဲ့ ကြေးမုံ သတင်းစာတွေမှာ ရေးသားရာမှာ ဖြတ်တောက်ဖော်ပြခဲ့တာကြောင့် ခုလို ကန့်ကွက်ရတာ ဖြစ်တယ်လို့ ပြည်သူ့လွှတ်တော်ကိုယ်စားလှယ် ဒေါ်ခင်စောဝေက ပြောပါတယ်။

အရင်ကလည်း အစဉ်အဆက် သုံးလာခဲ့တဲ့ အပြင် မြန်မာနိုင်ငံရဲ့ အမြင့်ဆုံး လွှတ်တော်မှာ တရားဝင် ဆွေးနွေးထားတဲ့ အဆိုနဲ့ နာမည်ဖြစ်လို့ နိုင်ငံပိုင် မီဒီယာတွေမှာလည်း တရားဝင် ဖော်ပြခွင့်လိုချင်တယ်လို့ သူက ဆိုပါတယ်။

ပြန်ကြားရေးဝန်ကြီးဌာနကတော့ ရခိုင်ပြည်နယ် မြောက်ပိုင်းမှာ ဖြစ်နေတဲ့ လူမျိုးစု အခေါ်အဝေါ်နဲ့ ပတ်သက်လို့ သတိထားတင်ပြရတာဖြစ်ပြီး သတင်းစာ ကျင့်ဝတ်အရ ဒီလို ပြဿနာရှိတဲ့ အသုံးအနှုန်းမျိုးတွေကို ဖြုတ်ချရတာပါလို့ ဘီဘီစီကို ပြောပါတယ်။

နာမည် အသုံးအနှုံးနဲ့ အခေါ်အဝေါ် တချို့ ကြောင့် တစုံတရာ ပြဿနာ ပိုမိုကြီးထွား သွားစေနိုင်ရင် အစိုးရ သတင်းစာတွေရဲ့ စာတည်းအဖွဲ့က တည်းဖြတ် ဖြတ်တောက်တာတွေ လုပ်လေ့ရှိတယ်လို့ ပြန်ကြားရေးဝန်ကြီးဌာန ပြောခွင့်ရသူ ဦးရဲနိုင်က ဘီဘီစီကို ပြောပါတယ်။

တပ်မတော်ရဲ့ သတင်းထုတ်ပြန်ချက် တချို့က အသုံးအနှုန်းဖြစ်တဲ့ အကြမ်းဖက်သောင်းကျန်းသူ ဆိုတာမျိုးကိုတောင် ငြိမ်းချမ်းရေးဆွေးနွေးနေတဲ့ ကာလဖြစ်လို့ တိုင်းရင်းသား လက်နက်ကိုင် အဖွဲ့လို့ ပြောင်းလဲ သုံးရတာ ရှိတယ်လို့ ဦးရဲနိုင်က ဥပမာ ပေးပါတယ်။

ပြည်သူ့လွှတ်တော် အမတ် ဒေါ်ခင်စောဝေဘက်ကတော့ ဒီနာမည်ကြောင့် ပြဿနာကြီးထွားစေနိုင်တယ်ဆိုတာကို လက်မခံဘဲ အစိုးရ သတင်းစာက ဖြတ်တောက် ဖော်ပြခဲ့တာ အတွက် အမှားပြင်ဆင်ချက် ပြန်လည်ဖော်ပြပေးနိုင်ဖို့ တင်ပြထားတယ်လို့ ပြောပါတယ်။

ပြန်ကြားရေးဝန်ကြီးဌာနဘက်ကလည်း ဒီလို ကန့်ကွက်ပြီး အမှားပြင်ဆင်ချက် တောင်းတဲ့အပေါ် ဆွေးနွေး ညှိနှိုင်းသွားမယ်လို့ ပြောခွင့်ရသူ ဦးရဲနိုင်က ပြောပါတယ်။

ဒီနေ့ ထုတ် အစိုးရသတင်းစာတွေမှာတော့ လွှတ်တော် အဆိုပါ လူမျိုးနာမည် အတိုင်း ပြင်ဆင်ဖတ်ရှုဖို့ အမှားပြင်ဆင်ချက် ပြန်လည် ဖော်ပြထားတာကို တွေ့ရပါတယ်။

ဘီဘီစီ တဝန်း