သင့်စက်တွင် ဒီမီဒီယာဖိုင်ကို ဖွင့်၍ မရပါ။

ဒုံရင်း၊ ဒက်ထိ၊ သင်ပုန်းချေ၊ ဖော်လံဖား

  • 16 ဖေဖော်ဝါရီ 2011
ဓာတ်ပုံ မူပိုင် mth
Image caption အလင်္ကာ ပုလဲပန်း

ပြိုင်ပွဲမျာ စပြီး တာထွက်တဲ့ နေရာကို ဒုံလို့ခေါ်ပြီး နောက်ဆုံး ရောက်ရမယ့် နေရာကို ပန်းတိုင်လို့ ခေါ်ပါတယ်။ ပန်းတိုင်ကို မရောက်ဘဲ နဂိုရ် မူလ စထွက်တဲ့ နေရာကိုပဲ ပြန်ရောက်တာကို ဒုံရင်း ပြန်ရောက် သွားတယ်လို့ ခေါ်တာဖြစ်ပါတယ်။

ဒက်ထိဆိုတဲ့ စကားဟာ အင်္ဂလိပ်စကား dead heat ကလာပါတယ်။ မြင်းပွဲတွေမှာ တကောင်နဲ့ တကောင် ဘယ်သူ့ ဘယ်သူမှ နှာတဖျား မသာပဲ ကွက်တိ တပြိုင်တည်း ပန်းဝင် ရင် dead heat လို့ ခေါ်ပါတယ်။

သင်ပုန်းချေဆိုတာကတော့ ရှေးခေတ်က သစ်သား သင်ပုန်းပေါ်မှာ ကန့်ကူနဲ့ စာရေးတဲ့ အခါ တစ်နေ့တာ ရေးထားတဲ့ စာတွေကိုဖျက် ချင်ရင် မီးသွေးမှုန့်နဲ့ ထမင်းရည် ဖျော်ထားတဲ့ အရည်နဲ့ သုတ်လိမ်း ချေဖျက် ရပါတယ်။ အဲသလို သင်ပုန်းပေါ်က စာတွေကို ချေဖျက်တာကို သင်ပုန်းချေတယ် လို့ခေါ်ပါတယ်။ အတိတ်က လုပ်ခဲ့တာ တွေကို အမှတ်သညာပြု အာဃာတ မထားဘဲ ပြီးတာတွေ ပြီးပါစေတော့ လို့အတိတ်ကို ချေဖျက်ချင်ရင် သင်ပုန်းချေတယ်လို့ သုံးပါတယ်။

ဂိုက်ကောင်း ဆိုက်ကောင်း ဆိုတာက ဂိုက်ဆိုတဲ့ ဟင်ဒီဘာသာ စကားနဲ့ ဆိုက် size ဆိုတဲ့ အင်္ဂလိပ် စကားတို့ ရောနှော သုံးနှုန်းတာ ဖြစ်ပါတယ်။ ဂိုက်တံ ကောင်းမှ ဆိုက်မှန် ဆိုက်ကောင်း ရမယ်လို့ မူလက ဆိုချင်တာ ဖြစ်ပါတယ်။ အများနားလည်နေကြတဲ့ အသုံးက လူကောင်ကြီးကြီး ထွားထွားကြိုင်းကြိုင်း တွေကို ဆိုတာ ဖြစ်ပါတယ်။

ဖော်လံဖားဆိုတဲ့ စကားက မူရင်း အဓိပ္ပါယ် ညစ်ညမ်းပါတယ်။ တရုတ်စကားက လာတာဖြစ်ပါတယ်။ တဘက်လူကို မျက်နှာလို မျက်နှာရ လုပ်ချင်လွန်းလို့ အမျိုးသားရဲ့ ယောက်ျား ပစ္စည်းကို မထားတယ်ဆိုတဲ့ အဓိပ္ပါယ် ဖြစ်ပါတယ်။ အမျိုးသမီး ပစ္စည်းကို မထားတယ်ဆိုတဲ့ အသုံးကတော့ ဖော်စီဖား ဖြစ်ပြီး မြန်မာစကားမှာ တချိန်က သုံးခဲ့ တယ်လို့ ဆိုပေမယ့် အခုအခါ ပျောက်ကွယ်သလောက် ရှိပါပြီ။