ဂျပန်ရောက် မြန်မာ အလုပ်သမား အရေး ဆွေးနွေး

  • 20 ဖေဖော်ဝါရီ 2011
FWUBC ဓာတ်ပုံ မူပိုင် bbc
Image caption မြန်မာ အလုပ်သမားတွေရဲ့ ပြဿနာတွေကို FWUBC က ကြိုးစား ဖြေရှင်းပေးနေ

ဂျပန်နိုင်ငံမှာ အလုပ်လုပ်နေကြတဲ့ မြန်မာ အလုပ်သမားတွေရဲ့ အခွင့်အရေးတွေနဲ့ ပတ်သက်လို့ ရှင်းလင်းပြောပြတဲ့ အလုပ်သမားရေးရာ သိကောင်းစရာ အလုပ်ရုံ ဆွေးနွေးပွဲ တခုကို တိုကျိုမြို့မှာ ဒီကနေ့ နေ့လည်က ကျင်းပခဲ့ပါတယ်။

အလုပ်ရှင်နဲ့ အလုပ်သမားအကြား ဖြစ်တတ်တဲ့ ပြဿနာတွေကို ဖြစ်လာမှ ရှင်းတာထက် စာရင် မဖြစ်ခင် ကြိုတင် ကာကွယ်နိုင်ဖို့အတွက် အဓိက ရည်ရွယ်ပြီး ဒီဆွေးနွေးပွဲကို ကျင်းပခဲ့တာလို့ FWUBC မြန်မာနိုင်ငံသား အလုပ်သမားများ သမဂ္ဂ အဖွဲ့ချုပ် ဂျပန်ပြည်ရဲ့ ဒုတိယ ဥက္ကဌ ကိုဖုန်းလှိုင် က ဘီဘီစီကို ပြောပါတယ်။

ဂျပန်နိုင်ငံမှာ တရားဝင် နေထိုင်နေသူ ဖြစ်စေ၊ တရားမဝင် နေထိုင်နေသူ ဖြစ်စေ အလုပ်လုပ်ကိုင်ခွင့် ရှိပေမဲ့ မြန်မာ လူမျိုး အများစုက ဘာသာစကား အခက်အခဲကြောင့် ဂျပန် လူမျိုးတွေ အများစု မလုပ်ချင်တဲ့ စားသောက်ဆိုင် အပါအဝင် အောက်ခြေသိမ်း အလုပ်မျိုးကိုပဲ လုပ်ရလေ့ ရှိပါတယ်။

အလုပ်ရှင်တွေ ကိုယ်တိုင်က အလုပ်သမား အခွင့်အရေးတွေကို နားမလည်ပဲ ထင်သလို လုပ်လေ့ရှိကြပြီး ကြိုမပြောပဲ အလုပ် ဖြုတ်ပစ်တာမျိုး၊ လခ မပေးတာမျိုးတွေကို မြန်မာလူမျိုးတွေ ရင်ဆိုင်နေရပါတယ်။

ဘာသာ စကား အခက်အခဲကြောင့်လည်း အလုပ်ရှင် ဂျပန်လူမျိုးတွေနဲ့ အလုပ်သမား မြန်မာလူမျိုးတွေ အကြား နားလည်မှု လွဲပြီး ပြဿနာ တက်တာမျိုးတွေလည်း ဖြစ်လေ့ ရှိတယ်လို့ သိရပါတယ်။

မြန်မာ အလုပ်သမားတွေ ရင်ဆိုင်နေရတဲ့ ပြဿနာတွေကို FWUBC မြန်မာနိုင်ငံသား အလုပ်သမားများ သမဂ္ဂ အဖွဲ့ချုပ် ( ဂျပန်ပြည် ) က ဂျပန် အလုပ်သမား သမဂ္ဂနဲ့ ပေါင်းပြီး ဖြေရှင်း ဆောင်ရွက်တာမျိုး၊ အလုပ်သမား ခုံရုံးအထိ တင်ပြတာမျိုး၊ ဂျပန် ရှေ့နေတွေနဲ့ တရားရုံးအထိ တင်ပြတာမျိုးတွေ လုပ်ပေးနေတယ်လို့ ကိုဖုန်းလှိုင်က ဘီဘီစီ ကို ပြောပြပါတယ်။