ကလေးအငှါးအတင်းမွေးခိုင်း

  • 25 ဖေဖော်ဝါရီ 2011
ထိုင်းရဲများက တိုင်ဝမ်ဂိုဏ်းကိုဝင်ရှာ
Image caption ထိုင်းရဲများက တိုင်ဝမ်ဂိုဏ်းကိုဝင်ရှာ

ဗီယက်နမ် အမျိုးသမီး ၁၃ ဦးကို ကိုယ်ဝန်ဆောင်ခိုင်းပြီး ရလာတဲ့ ကလေးတွေကိုထိုင်ဝမ်ကို ရောင်းစားတဲ့ ဂိုဏ်းတဖွဲ့ကို ဘန်ကောက်မြို့မှာ ဖမ်းဆီးရမိခဲ့အကြောင်း ဒီကနေ့ သတင်းစာရှင်းလင်းပွဲပြုလုပ်ခဲ့ပါတယ်။

ထိုင်ဝမ်နိုင်ငံသား တစ်ဦးဟာ ကုမ္ပဏီဖွင့်ပြီး ဗီယက်နမ် အမျိုးသမီးတွေကို ကိုယ်ဝန်ဆောင်ခိုင်းတယ်။ ဗီယက်နမ်အမျိုးသမီး ၉ ဦးက ငွေလက်ခံပြီး သဘောတူ ပေမယ့်၊ ကျန် ၄ ဦးက အလိုမတူတဲ့အတွက် အင်တာနက်နဲ့ လက်ကိုင်ဖုန်းတွေကနေ ဗီယက်နမ်သံရုံးကို အကြောင်းကြားရာက အခုလို ဖမ်းဆီးရမိခဲ့တာဖြစ်တယ်။ ဂိုဏ်းခေါင်းဆောင် ထိုင်ဝမ်သားက ပြည်ပကို သွားလို့ ဖမ်းမမိသေးဘူးလို့ ထိုင်းဘန်ကောက်မြို့ လူဝင်မှုကြီးကြပ်ရေးရုံး စုံစမ်းစစ်ဆေးရေးဌာနက ဘီဘီစီကို ပြောသွားပါတယ်။

လောလောဆယ်တော့ တရားခံအဖြစ် ၈ ဦးဖမ်းထားတဲ့အထဲမှာ တရုတ်နဲ့ ထိုင်ဝမ်နိုင်ငံသား ၅ ဦးနဲ့ မြန်မာနိုင်ငံသား ၃ ဦးကိုဖမ်းဆီးရမိခဲ့ပါတယ်။ တရုတ်နဲ့ ထိုင်ဝမ်တွေကိုတော့ လူကုန်ကူးမှု၊ လှောင်ပိတ်ထားမှုတွေနဲ့ တရားစွဲဆိုမှာဖြစ်တယ်။ ပြစ်ဒဏ် ထောင်ဒဏ် ၁ဝနှစ် အထိ ချနိုင်တဲ့ အမှုဖြစ်တယ်လို့ ဆိုပါတယ်။ မြန်မာနိုင်ငံသား ၃ဦးက အိမ်အလုပ်သမားတွေ ဖြစ်လို့ လူဝင်မှု ကြီးကြပ်ရေးအမှုနဲ့ဘဲ အရေးယူပြီး နယ်စပ်ပြန်ပို့မှာ ဖြစ်တယ်လို့ ရဲမှူးကြီးက ပြောပါတယ်။

နောက်ဖမ်းဆီးမှုကတော့ ဘန်ကောက်မြို့ရဲ့ တောင်ဘက် စမွတ်စာခေါန်းမြို့မှာ မြန်မာအလုပ်သမား အယောက် ၅ဝ ကိုလှောင်ပိတ်ပြီး ထိုင်းတောင်ပိုင်းက ရာဘာခြံတွေကို ပို့မယ့် ဂိုဏ်းတခုကိုလည်း လူဝင်မှုကြီးကြပ်ရေး ရဲက ဖမ်းဆီးလိုက်ပါတယ်။ ထိုင်းနိုင်ငံသား ၃ဦးက မြန်မာအလုပ်သမားတွေကို နယ်စပ်ကနေ ခိုးသွင်းလာပြီး စမွတ်စာခေါန်မြို့မှာ လှောင်ပိတ်ထားတာကို စုံစမ်း ဖမ်းဆီးနိုင်ခဲ့တာဖြစ်ပါတယ်။

မြန်မာအလုပ်သမား အယောက် ၅ဝ ကို သေနတ်နဲ့ခြိမ်းခြောက်ပြီး အိမ်တစ်လုံးမှာ လှောင်ပိတ်ထားတာဖြစ်ပါတယ်။ ဒါကြောင့် ဖမ်းဆီးရမိတဲ့ ထိုင်းနိုင်ငံသား ၃ ဦးကို တရားမဝင် နိုင်ငံခြားသား လက်ခံထားမှု၊ လှောင်ပိတ်ပြီး ခြိမ်းခြောက်မှုတွေနဲ့ အရေးယူမှာဖြစ်လို့ အမြင့်ဆုံး ထောင်ဒဏ် ၄နှစ်အထိ ချနိုင်တယ်လို့ မှုခင်းရဲအရာရှိက ပြောပါတယ်။