သင့်စက်တွင် ဒီမီဒီယာဖိုင်ကို ဖွင့်၍ မရပါ။

နာမည် ရှေ့ဆက် စကားလုံးများ

  • 5 ဇန်နဝါရီ 2012
ဓာတ်ပုံ မူပိုင် BBC Burmese

ဆွေမျိုးတော်စပ်ပုံနဲ့ နာမည် ရှေ့ဆက် စကားလုံးတွေရဲ့ အဆက် အစပ်တွေကို ဆွေးနွေးထားပါတယ်။

နေ့တိုင်းလိုလို လူတယောက်နဲ့ တယောက် တွေ့ဆုံကြတဲ့ အခါ ကျွန်တော်တို့ သုံးနှုန်းမြဲ ဖြစ်တဲ့ နာမည်ရဲ့ ရှေ့ဆက် စကားလုံးလေးတွေ အကြောင်းကို ဒီနေ့ ပြောမလို့ပါ။

ဦးဖြူ၊ ကိုနီ၊ မောင်ညို၊ ငဘ၊ ဒေါ်လှ၊ မမြ၊ မိဖြူ၊ မယ်ညို စသဖြင့်ပေါ့ဗျာ အမျိုးမျိုး ကျွန်တော်တို့ ခေါ်ကြပါတယ်။

ဦးအရွယ်မို့လို့ ဦး ၊ အဒေါ်အရွယ်မို့လို့ ဒေါ် အစ်ကို အရွယ်မို့ ကို မောင်အရွယ်မို့ မောင်ဆိုပြီး ခေါ်ကြတယ်ဆိုတာလည်း အားလုံးသိပြီးသား ဖြစ်မှာပါ။ ဒါပေမဲ့ ငဘ ဆိုတဲ့နာမည်ရှေ့က င ကရောဘာလို့ ခေါ်တာလဲ။ မိဖြူတို့ မယ်ညိုတို့မှာပါတဲ့ မိတွေ မယ်တွေကရော ဘယ်ကလာတာလဲ ဒါကိုတော့ လူတိုင်းတွေးမိချင်မှာ တွေးမိမှာပါ။ ဒီအကြောင်းတွေကိုလည်း ကျွန်တော်တို့ အတူတူ စဉ်းစားကြ ဆွေးနွေးကြပါမယ်။

ဒါ့ထက် ပိုပြီး ကျယ်ကျယ်ပြန့်ပြန့် ပြောရရင် ဦး ဆိုတဲ့ စကားလုံးရဲ့ အဓိပ္ပါယ်က ဘာလဲ၊ ဒေါ်ဆိုတဲ့ စကားရဲ့ အဓိပ္ပါယ်က ဘာလဲ။ မောင်ဆိုတဲ့ စကားလုံးရဲ့ အဓိပ္ပါယ်က ဘာလဲ။ စသဖြင့် တစ်လုံးချင်းရဲ့ အဓိပ္ပါယ်ကို လည်း ကျွန်တော်တို့ ဆက်ဆွေးနွေးကြပါမယ်။

စောစောက ပြောခဲ့သလိုပဲ ဦးတို့ ဒေါ်တို့ ကိုတို့ မောင်တို့ မတို့ ဆိုတာ ဆွေမျိုးတော်စပ်ပုံတွေနဲ့လည်း ဆက်စပ်နေတယ်ဆိုတော့ ဒီတပတ်မှာတော့ ဆွေမျိုးစပ်ပုံ အကြောင်းလေးတွေကို အရင်ပြောချင်ပါတယ်။

ဒီနေ့ခေတ်လူငယ်တချို့က ခဲအိုတို့ မတ်တို့တောင် မခေါ်တတ်ကြလို့ မိန်းကလေးတွေက သူ့အမ သူ့ညီမ ရဲ့ ယောက်ျားကို ယောက္ဖ လို့ခေါ်တာမျိုးကိုလည်း တခါတလေမှာ မတော်မတဲ့ ကြားရတတ်ပါတယ်။

အဖေရဲ့ အစ်ကို အဖေ့ရဲ့ ညီကို ဘကြီး ဘဒွေးခေါ်ပါတယ်။ ဆရာကြီး ဒေါက်တာ ထွန်းတင့် ပြောခဲ့သလိုပဲ ဖကြီး ဖထွေး ဆိုတဲ့ အသုံးအနှုန်းကနေ လာပါတယ်။ အဖထက်ကြီးတဲ့သူမို့ ဖကြီး လို့ခေါ်ပါတယ်။ အဖတို့ ဖကြီးတို့ ကို အရင်က ဘကုန်းနဲ့ ရေးတတ်လို့ ဘကြီးလို့အသံထွက်လေ့ရှိကြပါတယ်။

အဖထက်ငယ်တဲ့ သူကိုတော့ ဖထွေးလို့ ခေါ်ပါတယ်။ ဖထွေးကနေမှ ဘဒွေးဖြစ်လာတာပါ။

ဒီနေရာမှာ နောက်ထပ် ဆက်စပ်တဲ့ စကားလုံးက ကိုယ့်အဖေမဟုတ်တဲ့ အမေ့ရဲ့ နောက်အိမ်ထောင်ကို ခေါ်တဲ့ ပထွေးဆိုတဲ့ စကားလုံးပါ။ ပထွေးဆိုတာကလည်း ဖထွေးကနေလာတာပဲဖြစ်ပါတယ်။ အဖေငယ် ဆိုတဲ့ သဘောမျိုး အဓိပ္ပါယ် သက်ရောက်ပါတယ်။

အမေဘက်က တော်တဲ့ အမေ့ရဲ့ အစ်ကို အမေ့ရဲ့ မောင်ကိုတော့ ဦးကြီး ဦးလေးလို့ပဲ ခေါ်ပါတယ်။

အလားတူပဲ ဖကြီး ဖထွေးအသုံးရှိသလို မိကြီး မိထွေးဆိုတဲ့ အသုံးအနှုန်းလည်း ရှိပါတယ်။

အမိထက်ကြီးသူကိုလည်း မိကြီး၊ အမိထက်ငယ်သူကို မိလေး မိထွေး ဆိုပြီး ခေါ်ပါတယ်။ ဒီနေရာမှာလည်း ကိုယ်အမေမဟုတ်တဲ့ အဖေရဲ့ အိမ်ထောင်ကို ခေါ်တဲ့ မိထွေးဆိုတဲ့ စကားလုံးဟာလည်း အမေငယ် ဆိုတဲ့ အဓိပ္ပါယ်ပဲဖြစ်ပါတယ်။

အဖေဘက်က တော်တဲ့သူတွေကိုတော့ အရီးကြီး အရီးလေးလို့ ခေါ်တတ်သလို ဒေါ်ကြီး ဒေါ်လေးလို့လည်း ခေါ်တတ်ကြပါတယ်။ ဒီမှာလည်း နောက်ထပ် သတိပြုစရာ တခုက အရီးကြီး အရီးလေးဟာ အမျိုး သမီးတွေကို ခေါ်ကြသလို ဘကြီးဘဒွေးကိုလည်း အရီးကြီး အရီးလေးလို့ ခေါ်တဲ့ ဓလေ့မျိုးလည်း ရှိတတ်ပါတယ်။

နောက်ထပ် အမှားကြာသွားရာကနေ အမှန် ဖြစ်သွားတဲ့ ဆွေမျိုးစပ် ဝေါဟာရ တလုံးကတော့ ညီမလေး ဆိုတဲ့ အသုံးဖြစ်ပါတယ်။ အခုခေတ်မှာ ယောက်ျားလေးတွေက သူ့အောက်က မိန်းကလေးကို ညီမလို့ပဲ သုံးလာကြတာကို သတိထားမိပါတယ်။ အမှန်ကို သိသူရော မသိသူကပါ ညီမပဲ ခေါ်ကြတော့ ညီမဆိုတဲ့ အသုံးဟာ အများလက်ခံလာပြီလို့ ယူဆစရာ ဖြစ်ပါတယ်။

မိန်ခလေးချင်းမှ ညီမခေါ်ပြီး ယောက်ျားလေးကတော့ ကိုယ့်အောက်က အငယ်ကို နှမပဲ ခေါ်ရိုးရှိပါတယ်။ အဲဒီလို တိတိကျကျ ခေါ်ဝေါ်သုံးစွဲတဲ့ ကာလ ဟာ သိပ်မကြာသေးပါဘူး။ ဒါပေမဲ့ အခုခေတ်မှာတော့ မူရင်းကို သိသူရော မသိသူကပါ ညီမရေ၊ ညီမလေးရေပဲ ခေါ်ကြတယ်ဆိုတော့ ဘာသာ စကားရွေ့ပြောင်းသွားပြီလားဆိုတာ စဉ်းစားစရာဖြစ်ပါတယ်။