BBC navigation

ကချင်အရေးကို ဘယ်သူမဆို ကြားဝင် ဆောင်ရွက်သင့်တယ်လို့ KIOပြော

နောက်ဆုံး ရေးသားချိန် 6 ဇန်နဝါရီလ 2013 - 16:04 GMT

ကချင်ဒေသမှာ အစိုးရနဲ့ KIA အကြား မြေပြင် တိုက်ပွဲတွေ ဆက်ဖြစ်နေဆဲ

ကချင်ဒေသမှာ ကချင်လွတ်လပ်ရေး တပ်မတော် KIA နဲ့ အစိုးရ စစ်တပ်အကြား မြေပြင်တိုက်ပွဲတွေ ဆက်လက် ဖြစ်ပွားနေ ချိန်မှာပဲ ကချင်ဒေသအရေးမှာ ကြားဝင် စေ့စပ်ပေးဖို့ နိုဘဲလ် ငြိမ်းချမ်းရေးဆုရှင် ဒေါ်အောင်ဆန်းစုကြည်ကို မေတ္တာ ရပ်ခံသံတွေ ထွက်ပေါ်လာပါတယ်။

ဒေါ်အောင်ဆန်းစုကြည်ကတော့ ဒီကိစ္စနဲ့ ပတ်သက်လို့ အစိုးရထံက တရားဝင် ကမ်းလှမ်းလာတာမျိုး မရှိသေးဘူးလို့ ဆိုပါတယ်။

ကချင်ဒေသ အရေးမှာ ဒေါ်အောင်ဆန်းစုကြည် ကြားဝင် ဆောင်ရွက်ရေးနဲ့ ပတ်သက်လို့ KIO ကို ဘီဘီစီက ဆက်သွယ် မေးခဲ့ရာမှာတော့ ကချင်အရေးဟာ တိုင်းရင်းသားအရေး၊ ပြည်တွင်းရေး ဖြစ်တာကြောင့် စိတ်ကောင်း စေတနာကောင်း ရှိသူ ဘယ်သူမဆို အားလုံး ပါဝင် ဆောင်ရွက်သင့်တယ်လို့ ယူဆကြောင်း KIO ပြောခွင့်ရ ပုဂ္ဂိုလ် ဦးလာနန်း က ဘီဘီစီကို ပြောပါတယ်။

ကချင်ဒေသအရေးကို ပြည်ပ နိုင်ငံတကာ ပုဂ္ဂိုလ် အဖွဲ့အစည်းတွေက ဝိုင်းဝန်း ပြောဆိုတာတွေ ရှိနေချိန်မှာ ပြည်တွင်းမှာ ရှိတဲ့ လူပုဂ္ဂိုလ် အဖွဲ့အစည်းတွေ အားလုံးအနေနဲ့လည်း နိုင်ငံရေး ဆွေးနွေးမှုတွေ အကောင်အထည် ပေါ်လာရေးအတွက် အာရုံစူးစိုက်ပြီး တွန်းအားပေးသင့်တယ်လို့ ဆိုပါတယ်။

တိုက်ပွဲတွေ ရှိနေပေမယ့် စစ်အရှိန် လျော့သွားဖို့ နိုင်ငံရေး ဆွေးနွေးမှုတွေ အရင်လုပ်ဖို့ လိုတယ်လို့ ဦးလာနန်းက ပြောပါတယ်။

KIA တပ်ဖွဲ့တွေအနေနဲ့ ရထားလမ်းတွေ မိုင်းခွဲ၊ ဒေသခံ အမျိုးသမီးတွေကို ဖမ်းဆီး ခေါ်ဆောင်တာတွေ လုပ်နေတယ်လို့ တနင်္ဂနွေနေ့ထုတ် အစိုးရ သတင်းစာတွေ ထဲမှာ စွပ်စွဲ ဖေါ်ပြထားတာဟာ လုပ်ရိုးလုပ်စဉ် ဖြစ်ကြောင်း တဘက်နဲ့ တဘက် အပြန်အလှန် စွပ်စွဲ ပြောဆိုနေခြင်းအားဖြင့် နိုင်ငံရေး ဆွေးနွေးပွဲ လုပ်ဖို့ လက်လှမ်း မှီနိုင်မှာ မဟုတ်ကြောင်း KIO ပြောခွင့်ရ ပုဂ္ဂိုလ် ဦးလာနန်းက ဘီဘီစီကို ပြောပါတယ်။

ဆက်စပ်အကြောင်းအရာများ

BBC © 2014 ပြင်ပ အင်တာနက်ဆိုက်များတွင် ပါဝင်သော အကြောင်းအရာ များကို ဘီဘီစီကတာဝန် မယူပါ

ဤစာမျက်နှာကို CSS ဖွင့်ထားသော နောက်ဆုံးပေါ် internet browserနဲ့ အကောင်းဆုံး ကြည့်နိုင်ပါတယ်။ အကောင်းဆုံး ကြည့်နိုင်ဖို့ ကိုယ့် browser ကို အဆင့်မြှင့်နိုင်ရင်မြှင့်ပါ၊ CSS ကိုဖွင့်ထားရင်လည်း အဆင်ပြေနိုင်ပါတယ်။