BBC navigation

တပ်မတော်ကို မေတ္တာထားဆဲ ဖြစ်ကြောင်း ဒေါ်စုပြော

နောက်ဆုံး ရေးသားချိန် 27 ဇန်နဝါရီလ 2013 - 12:06 GMT

သူ့ဖခင် တည်ထောင် ခဲ့တဲ့ တပ်မတော် ဖြစ်တာကြောင့် စစ်တပ်အနေနဲ့ ပြန်ပြီး အဖတ်ဆယ် လိမ့်မယ်လို့ သူထင်မြင်

မြန်မာ့ ဒီမိုကရေစီရေး ခေါင်းဆောင် ဒေါ်အောင်ဆန်းစုကြည်က စစ်အစိုးရ လက်ထက်မှာ နှစ်ပေါင်း ၁၅ နှစ်လောက် နေအိမ် အကျယ်ချုပ် ကျခံ ခဲ့ရ ပေမယ့်လည်း မြန်မာ့ တပ်မတော်ကို သူမေတ္တာ ထားနေဆဲပဲ လို့ ဘီဘီစီက ထုတ်လွှင့်တဲ့ ရေဒီယို အစီအစဉ် တခုမှာ ပြောကြားလိုက်ပါတယ်။

လူသူကင်းမဲ့တဲ့ ကျွန်းလေးတကျွန်းပေါ်က ရင်ခုန်သံ အဖြစ် ပုံဖေါ် တင်ဆက်ထားတဲ့ ဘီဘီစီ ရေဒီယို4 ရဲ့ Desert Island Discs အစီအစဉ်မှာ ဒေါ်အောင်ဆန်းစုကြည်က ဖခင် ဗိုလ်ချုပ်အောင်ဆန်းရဲ့ အကြောင်း၊ ခင်ပွန်းသည် မိုက်ကယ်လ် အဲရစ်စ်နဲ့ အိမ်ထောင်ရေး ခရီးလမ်း၊ မြန်မာ့ တပ်မတော် အပေါ် သဘောထား စတာတွေကို ပွင့်ပွင့်လင်းလင်း ရင်ဖွင့် ပြောပြသွားပါတယ်။

မြန်မာ စစ်တပ်ဟာ တိုင်းပြည် အပေါ် အင်မတန် ဆိုးဝါးတဲ့ လုပ်ဆောင်မှုတွေ ပြုလုပ် ခဲ့ပေမယ့်လည်း ဒီစစ်တပ်ဟာ သူ့ဖခင် တည်ထောင် ခဲ့တဲ့ တပ်မတော် အဖြစ် မှတ်ယူထားဆဲ ဖြစ်ပြီး စစ်တပ်အနေနဲ့ ပြန် အဖတ်ဆယ်နိုင်လိမ့်မယ်လို့ သူမျှော်လင့်ထားကြောင်း ဒေါ်အောင်ဆန်းစုကြည်က ပြောပါတယ်။

ကချင်ဒေသမှာ အစိုးရ စစ်တပ်နဲ့ KIA ကချင်လွတ်လပ်ရေး တပ်မတော်အကြား တိုက်ပွဲတွေ အပြင်းအထန် ဖြစ်နေချိန်မျိုးမှာ ဒေါ်အောင်ဆန်းစုကြည်က အခုလို ထုတ်ဖေါ် ပြောသွားခဲ့တာပါ။

ဒေါ်အောင်ဆန်းစုကြည်အနေနဲ့ စစ်တပ်အပေါ် မေတ္တာမပျက် ဆက်ရှိနေပေမယ့် စစ်တပ်ရဲ့ ဖိနှိပ်မှုဒဏ်ကို နှစ်ပေါင်းများစွာ ခံခဲ့ရတဲ့ ပြည်သူတချို့ကတော့ ဒေါ်အောင်ဆန်း စုကြည်နဲ့ အမြင်ကွာဟမှုတွေ ရှိနိုင်တယ်လို့ ဒေါ်အောင်ဆန်း စုကြည်ရဲ့ NLD အမျိုးသား ဒီမိုကရေစီ အဖွဲ့ချုပ် နာယက သတင်းဆရာကြီး ဦးဝင်းတင်က သုံးသပ်ပါတယ်။

ဒီသတင်းနဲ့ ပတ်သက်သမျှ

ဆက်စပ်အကြောင်းအရာများ

BBC © 2014 ပြင်ပ အင်တာနက်ဆိုက်များတွင် ပါဝင်သော အကြောင်းအရာ များကို ဘီဘီစီကတာဝန် မယူပါ

ဤစာမျက်နှာကို CSS ဖွင့်ထားသော နောက်ဆုံးပေါ် internet browserနဲ့ အကောင်းဆုံး ကြည့်နိုင်ပါတယ်။ အကောင်းဆုံး ကြည့်နိုင်ဖို့ ကိုယ့် browser ကို အဆင့်မြှင့်နိုင်ရင်မြှင့်ပါ၊ CSS ကိုဖွင့်ထားရင်လည်း အဆင်ပြေနိုင်ပါတယ်။