BBC navigation

ငြိမ်းချမ်းရေးအတွက် KIOနဲ့ လက်တွဲလုပ်မယ်လို့ ကာကွယ်ရေး ဝန်ကြီးဌာနပြော

နောက်ဆုံး ရေးသားချိန် 29 ဇန်နဝါရီလ 2013 - 16:38 GMT

တပ်မတော် စစ်ကြောင်းတွေကို KIA က လာရောက် နှောင့်ယှက်နေတယ်လို့ ကာကွယ်ရေး ဝန်ကြီးဌာနကပြော

မြန်မာနိုင်ငံတဝှမ်းလုံး ငြိမ်းချမ်းရေး ရရေးအတွက် မြန်မာ့တပ်မတော်အနေနဲ့ KIO/KIA နဲ့ အတူ လက်တွဲ ဆောင်ရွက်သွား မယ်လို့ မြန်မာအစိုးရ ကာကွယ်ရေး ဝန်ကြီးဌာနက ဇန္နဝါရီလ ၂၈ရက်နေ့စွဲနဲ့ သတင်း ထုတ်ပြန်လိုက်ပါတယ်။

ကချင်ဒေသမှာ အစိုးရရဲ့ စစ်ဆင် တိုက်ခိုက်မှုတွေဟာ လမ်းပန်း ဆက်သွယ်မှု လုံခြုံ ချောမွေ့စေရေးနဲ့ ပြည်သူလူထုရဲ့ အသက်အိုးအိမ် စည်းစိမ်အား နှောင့်ယှက် ဖျက်ဆီးနေတဲ့ KIA လက်နက်ကိုင် အဖွဲ့ကို တပ်မတော်ရဲ့ မူလတာဝန်အတိုင်း ဆောင်ရွက်ရခြင်းနဲ့ လဂျားယန် တပ်စခန်းရှိ တပ်မတော်သားတွေ ကြုံတွေ့နေရတဲ့ ရိက္ခာ ပြတ်လတ်မှု၊ KIA လက်နက်ကိုင်တွေ ဝိုင်းရံထားမှုတွေကနေ ကယ်တင်ခဲ့ရတဲ့ အကန့်အသတ်နဲ့ ဆောင်ရွက်ခဲ့တဲ့ စစ်ဆင်ရေး တရပ်သာ ဖြစ်တယ်လို့ အဲဒီ သတင်း ထုတ်ပြန်ချက် ထဲမှာ ဖေါ်ပြထားပါတယ်။

KIO ကချင် လွတ်လပ်ရေး အဖွဲ့ ဗဟို ကော်မီတီဝင် အရာရှိ ဗိုလ်မှူးကြီး တဦးကတော့ ဒီသတင်း ထုတ်ပြန်ချက်ပါ အချက်တွေဟာ KIA ကို သောင်းကျန်းသူတွေအဖြစ် တဖက်လှည့်နဲ့ စွပ်စွဲထားတာသာ ဖြစ်ကြောင်းနဲ့ မြန်မာ စစ်တပ်က ထိုးစစ်ဆင်နေသမျှ ကာလပတ်လုံး နှစ်ဘက် တွေ့ဆုံဆွေးနွေးဖို့ မဖြစ်နိုင်ကြောင်း ဘီဘီစီကို ပြောပါတယ်။

KIO နဲ့ အစိုးရ အကြား ငြိမ်းချမ်းရေး ကြားဝင် စေ့စပ်ပေးဖို့ စီစဉ်နေတဲ့ UNFC ညီညွတ်သော တိုင်းရင်းသားများ ဖက်ဒရယ် ကောင်စီ အဖွဲ့ဝင် KNPP က ဦးအောင်ဆန်းမြင့်ကတော့ ခုလက်ရှိမှာ စစ်တပ်ရဲ့ အပြောနဲ့ အလုပ် မညီတာ တွေ့နေရကြောင်း၊ ပြည်တွင်း ငြိမ်းချမ်းရေး ရရေးဟာ အပစ်အခတ်ရပ်စဲရေး ခိုင်မာမှု မခိုင်မာမှုပေါ်မှာ မူတည်နေပြီး စစ်တပ်က လိုလိုလားလား ပါဝင် ဆောင်ရွက်ဖို့ လိုကြောင်း၊ အခုလို ကာကွယ်ရေး ဝန်ကြီးဌာနက ငြိမ်းချမ်းရေးမှာ ထဲထဲဝင်ဝင် ပါဝင်လာမယ် ဆိုရင်တော့ ကောင်းမွန်တဲ့ ဦးတည်ချက်ကို သွားတယ် လို့ ယူဆနိုင်မှာ ဖြစ်ကြောင်း ဘီဘီစီကို ပြောပါတယ်။

UNFC အဖွဲ့အနေနဲ့ မကြာခင်ရက်ပိုင်းမှာ အစည်းအဝေး ခေါ်ယူပြီး ကချင်အရေး ဆွေးနွေးဖို့ ရှိတယ်လို့လည်း ပြောပါတယ်။

BBC © 2014 ပြင်ပ အင်တာနက်ဆိုက်များတွင် ပါဝင်သော အကြောင်းအရာ များကို ဘီဘီစီကတာဝန် မယူပါ

ဤစာမျက်နှာကို CSS ဖွင့်ထားသော နောက်ဆုံးပေါ် internet browserနဲ့ အကောင်းဆုံး ကြည့်နိုင်ပါတယ်။ အကောင်းဆုံး ကြည့်နိုင်ဖို့ ကိုယ့် browser ကို အဆင့်မြှင့်နိုင်ရင်မြှင့်ပါ၊ CSS ကိုဖွင့်ထားရင်လည်း အဆင်ပြေနိုင်ပါတယ်။