BBC navigation

ငြိမ်းချမ်းရေး အတွက် အီးယူ အကူ အညီ ပိုပေးမယ်

နောက်ဆုံး ရေးသားချိန် 5 မတ်လ 2013 - 15:20 GMT
European Council President Herman Van Rompuy (R) welcomes Myanmar Prime Minister Thein Sein at the European Union Council in Brussels March 5, 2013.

ဦးသိန်းစိန်နဲ့ ဥရောပ ကော်မရှင် ဥက္ကဌ တို့ တွေ့ဆုံ ဆွေးနွေး

ဥရောပ ငါးနိုင်ငံ ခရီးစဉ် အတွင်း ဘယ်လ်ဂျီယံ နိုင်ငံကို ရောက်နေတဲ့ သမ္မတ ဦးသိန်းစိန်က ဥရောပ သမဂ္ဂ အကြီးအကဲတွေနဲ့ တွေ့ဆုံ ဆွေးနွေးခဲ့ ပါတယ်။

မြန်မာ သမ္မတ တစ်ယောက်ရဲ့ ပထမဆုံး ဥရောပ ခရီးစဉ် အတွင်း ဥရောပ ကော်မရှင် ဥက္ကဋ္ဌ၊ ဥရောပ ကောင်စီ ဥက္ကဋ္ဌ တို့နဲ့ အင်္ဂါ နေ့ တွေ့ဆုံပြီး အီးယူးနဲ့ မြန်မာ နိုင်ငံကြားမှာ ဆက်ဆံရေး ပိုမို တိုးမြှင့် ဆောင်ရွက် သွားရေး ဆွေးနွေး ခဲ့ကြ တယ်လို့ သမ္မတနဲ့ အတူ လိုက်ပါသွားတဲ့ ပြောရေး ဆိုခွင့် ရှိသူ ဦးရဲထွဋ်က ပြောပါတယ်။

မြန်မာ နိုင်ငံ ဒီမိုကရေစီနဲ့ လူ့ အခွင့် အရေး မြှင့်တင်မှု အခြေ အနေ၊ ကချင်ပြည်နယ်နဲ့ ရခိုင်ပြည်နယ် အတွင်း ဖြစ်နေတဲ့ အခြေ အနေ၊ အစိုးရက ဆောင်ရွက် နေတဲ့ စီးပွားရေး ပြုပြင် ပြောင်းလဲမှု တို့ကို ရှင်းပြပြီး အနာဂတ်မှာ ဥရောပ သမဂ္ဂ ဘက်က ကူညီဆောင်ရွက် နိုင်ရေး တို့ကို ဆွေးနွေး ခဲ့ကြတယ်လို့ သူက ဆိုပါတယ်။

ဒါ့အပြင် စီးပွားရေး ပိတ်ဆို့မှု တွေကို အပြီးတိုင် ဖယ်ရှားနိုင်ရေးနဲ့ စီးပွားရေး လုပ်ငန်းရှင်တွေ အတွက် အထူး အခွင့် အရေး လျှော့ပေါ့ ပေးနိုင်ရေး တို့ကို လည်း မြန်မာ ဘက်က တင်ပြ ဆွေးနွေးခဲ့တယ်လို့ ဦးရဲထွဋ်က ပြော ပါတယ်။

ဒီကိစ္စနဲ့ ပတ်သက်လို့တော့ ဥရောပ သမဂ္ဂ ဘက်က စဉ်းစား ဆောင်ရွက် သွားမှာ ဖြစ်ပေမဲ့ ဒီလုပ်ငန်းစဉ်မှာ ဥရောပ ကောင်စီ၊ ဥရောပ ကော်မရှင်နဲ့ ဥရောပ ပါလီမန် စတဲ့ သုံးဖွဲ့လုံး ပါဝင်နေတဲ့ အတွက် ချက်ချင်း လက်ငင်း အဖြေ မရနိုင် သေးကြောင်း သမ္မတနဲ့ ဆွေးနွေးခဲ့တဲ့ ဥရောပ သမဂ္ဂ ခေါင်းဆောင် တွေက ပြောခဲ့ တယ်လို့ ဦးရဲထွဋ်က ပြောပါတယ်။

ရခိုင်ပြည်နယ်နဲ့ ကချင် ပြည်နယ် အတွင်း နိုင်ငံ တကာ အဖွဲ့ အစည်း တွေက လူသားချင်း စာနာမှု အကူ အညီတွေ ပေးနိုင်ရေး အတွက် မြန်မာ အစိုးရ ဘက်က ခွင့်ပြုဖို့ အီးယူက တောင်းဆိုတာကို သမ္မတက ခွင့်ပြုမယ်လို့ ပြောခဲ့ကြောင်း လည်း သမ္မတရဲ့ ပြောခွင့်ရ ပုဂ္ဂိုလ်က ဘီဘီစီကို ပြောပါတယ်။

ငြိမ်းချမ်းရေး လုပ်ငန်းစဉ် တွေ အတွက် ဥရောပ သမဂ္ဂက အရင်နှစ်က ပေးနေတဲ့ ငွေကြေး အကူ အညီ တွေထက် ပိုပေးမယ်လို့လည်း ပြောခဲ့ကြောင်း သူက ပြောပါတယ်။

ဒီသတင်းနဲ့ ပတ်သက်သမျှ

BBC © 2014 ပြင်ပ အင်တာနက်ဆိုက်များတွင် ပါဝင်သော အကြောင်းအရာ များကို ဘီဘီစီကတာဝန် မယူပါ

ဤစာမျက်နှာကို CSS ဖွင့်ထားသော နောက်ဆုံးပေါ် internet browserနဲ့ အကောင်းဆုံး ကြည့်နိုင်ပါတယ်။ အကောင်းဆုံး ကြည့်နိုင်ဖို့ ကိုယ့် browser ကို အဆင့်မြှင့်နိုင်ရင်မြှင့်ပါ၊ CSS ကိုဖွင့်ထားရင်လည်း အဆင်ပြေနိုင်ပါတယ်။