BBC navigation

ကချင်မှာ တပ်တွေ ဆုတ်ရေး သဘောတူဖို့ နီးစပ်ပြီလား

နောက်ဆုံး ရေးသားချိန် 11 မတ်လ 2013 - 15:41 GMT
Kachin Peace talks in February 2013

ပြီးခဲ့တဲ့လက တရုတ် နိုင်ငံမှာ ပထမအကြိမ် ဆွေးနွေးခဲ့

မြန်မာ အစိုးရ ငြိမ်းချမ်းရေး ဖော်ဆောင်ရေး အဖွဲ့နဲ့ ကေအိုင်အို ကချင် လွတ်လပ်ရေး အဖွဲ့တို့ကြား ဆွေးနွေးမှု တွေကို တရုတ်နိုင်ငံ ရွေလီမြို့မှာ တနင်္လာ နေ့က စတင် ပြုလုပ် နေပါတယ်။

ဆွေးနွေးပွဲမှာ ပြည်ထောင်စု ငြိမ်းချမ်းရေး ဖော်ဆောင်ရေး ကော်မီတီက အဆိုပြုထားတဲ့ အချက်တွေကို ဆွေးနွေးကြတာ ဖြစ်တယ်လို့ အစိုးရ ငြိမ်းချမ်းရေး အဖွဲ့မှာ ပါဝင်တဲ့ ဦးလှမောင်ရွှေက ပြောပါတယ်။

ကေအိုင်အိုရဲ့ အစိတ် အပိုင်း တစ်ခု အဖြစ် ကေအိုင်အေကို ကျောထောက် နောက်ခံ ပြုဖို့ တက်ရောက် လာတဲ့ UNFC ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီရဲ့ ဒုတိယ အထွေထွေ အတွင်း ရေးမှူး ဦးခွန်ဥက္ကာ ကတော့ ဆွေးနွေးပွဲကို အစိုးရ ဘက်က တပ်ဘက် အရာရှိကြီးတွေ ကိုယ်တိုင် ပါဝင် လာတာဟာ တပ်မတော်က ငြိမ်းချမ်းရေးကို လိုလားတယ် ဆိုတာ ပြသတာဖြစ်လို့ ကြိုဆိုတယ်လို့ ပြောပါတယ်။

ဒါ့အပြင် အပစ် အခတ်ရပ်စဲရေးက မယ့် ငြိမ်းချမ်းရေး လမ်းကြောင်းပေါ် သွားနိုင် ဖို့ရာ သူတို့ ဘက်က အပစ်အခတ် ရပ်စဲရေး ဖြစ်စဉ်ကို ဘယ်လို တာဝန် ယူနိုင်မယ် ဆိုတာကိုလည်း တပ်မတော် အရာရှိကြီးတွေနဲ့ တွေ့ရချိန်မှာ ရှင်းရှင်း လင်းလင်း လုပ်ဆောင် ထားချင်တယ်လို့ ဦးခွန်ဥက္ကာ ပြောပါတယ်။

ဒီဆွေးနွေးပွဲကို မြန်မာ အစိုးရ ဘက်က ဦးအောင်မင်း ဦးဆောင်ပြီး ကာကွယ်ရေး ဝန်ကြီး ဌာနက အထူး စစ်ဆင်ရေးမှူး ဒုတိယ ဗိုလ်ချုပ်ကြီး မြင့်စိုး၊ မြောက်ပိုင်းတိုင်း စစ်ဌာနချုပ် တိုင်းမှူး ဗိုလ်မှူးချုပ် ထွန်းထွန်းနောင်၊ ကချင်ပြည်နယ် လုံခြုံရေးနဲ့ နယ်စပ် ရေးရာ ပြည်နယ် ဝန်ကြီးတို့ တက်ရောက်ခဲ့ ပါတယ်။

ကေအိုင်အို ဘက်ကလည်း ဦးဆွမ်လွတ်ဂမ် ဦးဆောင်ပြီး ကေအိုင်အေ ဒုတိယ စစ်ဦးစီးချုပ် ဗိုလ်ချုပ် ဂွမ်မော် နဲ့ ဗိုလ်မှူးကြီး ဇော်တောင် အပါအဝင် တခြား စစ်ဖက် အရာရှိ အတော် များများ တက်ရောက်ခဲ့ ပါတယ်။

ဒီသတင်းနဲ့ ပတ်သက်သမျှ

BBC © 2014 ပြင်ပ အင်တာနက်ဆိုက်များတွင် ပါဝင်သော အကြောင်းအရာ များကို ဘီဘီစီကတာဝန် မယူပါ

ဤစာမျက်နှာကို CSS ဖွင့်ထားသော နောက်ဆုံးပေါ် internet browserနဲ့ အကောင်းဆုံး ကြည့်နိုင်ပါတယ်။ အကောင်းဆုံး ကြည့်နိုင်ဖို့ ကိုယ့် browser ကို အဆင့်မြှင့်နိုင်ရင်မြှင့်ပါ၊ CSS ကိုဖွင့်ထားရင်လည်း အဆင်ပြေနိုင်ပါတယ်။