ဗမာ့ကဗျာ တိုးတက်လာသလား၊ ဆုတ်သွားသလား

  • 21 မတ် 2014
world poetry day
Image caption ဆုရကဗျာ ဆရာ ကြည်ဇော်အေး ကဗျာရွတ်ဆို

မတ်လ ၂၁ ရက်နေ့ ကမ္ဘာ့ကဗျာနေ့ အထိမ်းအမှတ် ပွဲတွေကို ကဗျာဆရာတွေ ဉီးစီးပြီး ရန်ကုန်၊ မန္တလေး ၊ ပျဉ်းမနားမြို့တွေမှာ ကျင်းပခဲ့ပါတယ်။

ပျဉ်းမနားမြို့ ကမ္ဘာ့ကဗျာနေ့နဲ့ ကဗျာဆရာကြီး မောင်သင်းခိုင်ရဲ့ မွေးနေ့ကို ဆရာမောင်သင်းခိုင်ရဲ့ အိမ်မှာ ပြုလုပ်ကျင်းပခဲ့ပါတယ်။

အလယ်ရိုးမ ကဗျာဆုချီးမြှင့်ပွဲကိုလည်း တခါတည်း ပြုလုပ်ခဲ့ပါတယ်။ နှစ်ငါးဆယ် ကဗျာနဲ့ ဆုချီးမြှင့်ခံခဲ့ရတဲ့ ကဗျာဆရာ ကြည်ဇော်အေးက သူ့ကဗျာကို ရွတ်ခဲ့သလို တခြား ကဗျာဆရာတွေလည်း ကဗျာတွေ တက်ရောက် ရွတ်ဆိုခဲ့ကြပါတယ်။

မြန်မာ့လူ့ အဖွဲ့ အစည်းမှာ ကဗျာဆရာတွေနဲ့ ကဗျာရဲ့ အခန်းကဏ္ဍဟာ အရေးပါနေဉီးမှာပါပဲ လို့ ကဗျာဆရာ ကြည်ဇော်အေးက ဆိုပါတယ်။

ဒါပေမဲ့ ဒီနေ့ခေတ်မှာ ကဗျာတွေကို ကဗျာရေးသူတွေလောက်သာ ဖတ်ရှုကြပြီး ကျန်တဲ့ သာမန်ပြည်သူတွေက ကဗျာနဲ့ ထိတွေ့မှု နည်းပါးလာတာ ဘာ့ကြောင့်ပါလဲလို့ ဘီဘီစီ က မေးမြန်းရာမှာတော့ ဆင်းရဲကြပ်တည်းမှုကြောင့် ပြည်သူအများဟာ စာဖတ်ချိန်နည်းလာ တဲ့အတွက် ကဗျာ အဖတ်နည်းသွားတယ်လို့ ဆိုပါတယ်။

ခေတ်ပေါ်ကဗျာတွေဟာ သာမန် ကျောင်းသားနဲ့ လက်လုပ်လက်စားတွေ နားလည်ရခက်ခဲလာတဲ့ အတွက်လည်း အဖတ်နည်းလာတာ ဖြစ်နိုင်တယ်လို့ ဆိုပါတယ်။

အင်္ဂလိပ်ကဗျာ၊ တရုတ်ကဗျာ၊ ရုရှားကဗျာ စတဲ့ ကမ္ဘာ့ကဗျာတွေမှာ ကာရန် ယူတဲ့ စနစ် ရှိပေမဲ့ စာတကြောင်းလုံး အသံထပ်တူ နဘေထပ်ယူတဲ့ စနစ်မျိုးကိုတော့ မြန်မာ ကဗျာမှာပဲ တွေ့ရလေ့ ရှိပါတယ်။

ဆရာကြီး သခင်ကိုယ်တော်မှိုင်း စပ်ဆိုသလိုမျိုး ကောင်းကျိုးထွေထွေနဲ့ ချွန်စေမြစေစော၊ ဒေါင်းအိုးဝေရယ်တဲ့ တွန်စေကစေသောဝ် ဆိုတဲ့ နဘေထပ် စနစ်မျိုးနဲ့ ရေးဖွဲ့တဲ့ မြန်မာဟန် ကဗျာ အသစ်တွေ ပေါ်ထွက် မလာတော့တာ နှမျောစရာ မကောင်းဘူးလားလို့ ဘီဘီစီက မေးမြန်းရာမှာတော့ အသစ်မပေါ်ထွက်ပေမဲ့ ဆရာကြီး သခင်ကိုယ်တော်မှိုင်းရဲ့ ကဗျာတွေ၊ ဆရာ ဒဂုန်တာရာရဲ့ ကဗျာမျိုးတွေကတော့ ဆက်လက် ရှင်သန်နေမှာပါလို့ ဆရာ ကြည်ဇော်အေးက ပြောပါတယ်။