ရခိုင်ရေဘေး လူပေါင်း ၃၀ လောက်သေဆုံး

  • 2 ဩဂုတ် 2015
myanmar_flood_kalay ဓာတ်ပုံ မူပိုင် AFP
Image caption နိုင်ငံနေရာအတော်များများ မှာ ရေကြီးနေ

မြန်မာနိုင်ငံ နေရာအတော်များများမှာ ရေကြီးတဲ့ ဘေးဒုက္ခကြောင့် လူတွေ သေဆုံးမှု မြင့်တက်လာနေပြီး ရခိုင်ပြည်နယ် တခုတည်းမှာတင် လူ ၃၀ လောက် သေဆုံးခဲ့ရပါတယ်။

ဘူးသီးတောင်မြို့နယ် မှာ လူပေါင်း ၁၂ ဦးသေဆုံး ခဲ့ရတယ်လို့ ဒေသတွင်း အစိုးရ အရာရှိတယောက် က ဘီဘီစီ ကိုပြောပါတယ်။

ရခိုင်ပြည်နယ်အထွေထွေအုပ်ချုပ်ရေးမှူး ရဲ့ ပြောကြားချက်အရ မင်းပြားမှာ ၉ ဦး၊ မြောက်ဦးမှာ ၄ ဦး၊ မောင်တောမှာ ၃ ဦး၊ ကျောက်တော် နဲ့ ပုဏ္ဍားကျွန်း တို့မှာ ၁ ဦးစီ ရေဘေး ကြောင့် သေဆုံးခဲ့ရကြောင်း သိရပါတယ်။

နှစ်ပေါင်းများစွာ အတွင်း ရေကြီးတဲ့ ဒဏ် ကို ခံနေရတယ်လို့ ဒေသခံတွေ က ပြောပါတယ်။

အစိုးရက ရခိုင်ပြည်နယ်၊ စစ်ကိုင်းတိုင်း၊ မကွေးတိုင်း၊ ချင်းပြည်နယ် စတဲ့ ဒေသတွေ ကို သဘာဝဘေးအန္တရာယ် ကျရောက်နေတဲ့ ဒေသအဖြစ် ကြေညာထားပေမယ့် အစိုးရရဲ့ သဘာဝဘေး အန္တရာယ်ဆိုင်ရာ ကယ်ဆယ်ရေး စီမံချက် တွေ မရှိသလောက် ဖြစ်နေတဲ့အပေါ် ဝေဘန်မှုတွေ လည်း ထွက်ပေါ်နေပါတယ်။