ပယ်​လယ်​ကို လှေ​စီးကျော်​ဖြတ်​မှု​တွေ ရှိ​လာပြန်

  • 22 အောက်တိုဘာ 2015
_rescued_boat_people_myanmar ဓာတ်ပုံ မူပိုင် AFP
Image caption အခု နှစ်ဆန်းပိုင်းက ပင်လယ်ပြင် ဖြတ်သန်းတဲ့ ရိုဟင်ဂျာ အယောက် ၃၇၀ သေဆုံး ခဲ့။

မုတ်သုန်ရာသီ အလွန် ကာလ ပင်လယ်ပြင် ပွင့်လင်း ရာသီ ရောက်လာပြီ ဖြစ်လို့ မြန်မာနိုင်ငံ က ရိုဟင်ဂျာ နဲ့ ဘင်္ဂလာဒေ့ရှ် နိုင်ငံသားတွေ ဟာ ပင်လယ်ပြင် ကို လှေစီး ဖြတ်ကျော် မှုတွေ အလုံးအရင်းနဲ့ ထပ်မံ ပြုလုပ် လာမှာ ကို စိုးရိမ် ရတယ် ဆိုပြီး နိုင်ငံတကာ က ပြောနေချိန် မှာပဲ မလေးရှား နိုင်ငံ ကို ဝင်သွားတဲ့ လှေတွေ ရှိလာ နေပြီ ဖြစ်ပါတယ်။

ဒါ့ကြောင့် အခုဆို ထိုင်းရေတပ်က ထိုင်းနိုင်ငံထဲ မဝင်နိုင်အောင် ကင်းလှည့်တာတွေ ပြုလုပ် နေပါတယ်။

စက်တင်ဘာ လ တုန်းက ဘင်္ဂလာဒေ့ရှ် နိုင်ငံသား စုစုပေါင်း ၃၀၀ ကျော် တင်ထားတဲ့ လှေ ၂ စင်း မလေးရှား ကို ဝင်ရောက် ခဲ့သလို အခု အောက်တိုဘာ လ ထဲ မှာလည်း ရိုဟင်ဂျာ အယောက် ၂၀၀ ဝန်းကျင် တင် ထားတဲ့ လှေတစ်စင်းလည်း မလေးရှား ကို ဝင် သွားတယ် လို့ ထိုင်းနိုင်ငံ မှာ ရိုဟင်ဂျာ အခွင့်အရေး လုပ်ဆောင်နေသူ အဗူကာလမ် က ဘီဘီစီ ကို ပြော ပါတယ်။

ဒါ့အပြင် ထိုင်းနိုင်ငံ ထဲ ကိုလည်း အရင်ကလို အလုံးအရင်း နဲ့ မဟုတ်ပေမယ့် နည်းနည်းချင်း ဝင်ရောက် နေတာ မျိုး ရှိ နေတုန်းပဲ လို့ ထိုင်း ရှေ့နေများ ကောင်စီ၊ လူမျိုးစု အခွင့်အရေး ရှေ့နေ စူရာဖုန်း ကောင်းကျန်ထွတ် က ဆိုပါတယ်။

ထိုင်းနိုင်ငံထဲမှာ လူကုန်ကူးမှု နဲ့ ပတ်သက်ပြီး ဖမ်းဆီးထားသူ အယောက် ၉၀ ကျော်ရှိသွားပြီ ဖြစ်ပေမယ့် ဆက်စပ်နေသူ အားလုံးကို မဖမ်း နိုင်သေး တာ ကြောင့် ရိုဟင်ဂျာ လူကုန်ကူးမှု တွေ ဆက်လက် ရှိနေဆဲပဲ ဖြစ်တယ် လို့လည်း ရှေ့နေ စူရာဖုန်း က ပြောပါတယ်။

ဒါ့အပြင် ထိုင်းနိုင်ငံထဲ ဝင်ရောက်ခဲ့တဲ့ ရိုဟင်ဂျာ အယောက် ၄၀ဝ ကျော်ဟာ ထိုင်း အချုပ်ခန်းတွေ ထဲ ချုပ်နှောင် ခံထားရတာ ၁ နှစ်ကျော်သွားပြီ ဖြစ်ပါတယ်။

အင်ဒိုနီးရှား နိုင်ငံမှာလည်း ရိုဟင်ဂျာ ၁၈၀ ဝကျော်ကို ထိန်းသိမ်း ထားပါတယ်။

အခု နှစ်ဆန်းပိုင်းက ပင်လယ်ပြင် ဖြတ်သန်းတဲ့ ရိုဟင်ဂျာ အယောက် ၃၇၀ သေဆုံး ခဲ့တယ်လို့ အပြည်ပြည်ဆိုင်ရာ လွတ်ငြိမ်း ချမ်းသာခွင့်အဖွဲ့ က အစီရင်ခံစာ ထုတ်ပြန် ထားပါတယ်။

ရိုဟင်ဂျာ အရေးကို သက်ဆိုင်ရာ နိုင်ငံတွေ နဲ့ နိုင်ငံတကာ က ဝိုင်းဝန်း ဖြေရှင်းဖို့ကိုလည်း အပြည်ပြည်ဆိုင်ရာ လူ့အခွင့်အရေး အဖွဲ့ က တိုက်တွန်း ထားပါတယ်။

ဒီသတင်းနဲ့ပတ်သက်သမျှ