အစိုးရအသစ် အတွက် ICTJ အစီရင်ခံစာထုတ်ပြန်

  • 9 ဒီဇင်ဘာ 2015
Image caption လူ့အခွင့်အရေး ချိုးဖောက်မှုမျိုးတွေ တကျော့ပြန် ဖြစ်မလာဖို့ NLD အစိုးရသစ်အနေနဲ့ အလေးအနက်ထား ဆောင်ရွက်သင့်

မြန်မာနိုင်ငံမှာ အတိတ်ကာလက ဖြစ်ခဲ့တဲ့ အကြမ်းဖက် ဖိနှိပ်မှုမျိုး၊ လူ့အခွင့်အရေး ချိုးဖောက်မှုမျိုးတွေ တကျော့ပြန် ဖြစ်မလာဖို့ NLD အစိုးရသစ်အနေနဲ့ အလေးအနက်ထား ဆောင်ရွက်သင့်တယ် ဆိုပြီး International Center for Transitional Justice ICTJ အဖွဲ့ကြီးက မနေ့က အစီရင်ခံစာ တစ်စောင် ထုတ်ပြန်လိုက်ပါတယ်။

မြန်မာနိုင်ငံမှာ အတိတ်ကာလ အကြမ်းဖက်မှုမျိုးတွေ တကျော့ပြန် ဖြစ်မလာရေး ကုထုံးကုနည်းများ လို့ အမည်ပေးထားတဲ့ အဲဒီ အစီရင်ခံစာထဲမှာ အစိုးရနဲ့ လူမှု အဖွဲ့အစည်းတွေအနေနဲ့ မြန်မာနိုင်ငံမှာ အတိတ်က ဖြစ်ခဲ့တဲ့ ဖြစ်ရပ်တွေနဲ့ လက်ရှိ ဖြစ်နေဆဲ ဖြစ်ရပ်တွေကို ကိုင်တွယ်ဖြေရှင်းရာမှာ အဖြစ်မှန် ပေါ်ပေါက်ရေးနဲ့ ပြုမှားမိတာတွေအပေါ် ပြန်လည်ပေးဆပ်ရေးတွေကို လိမ်မာ ပါးနပ်စွာ ကိုင်တွယ် ဆောင်ရွက်တတ်ဖို့ လိုတယ်လို့ အဲဒီ အစီရင်ခံစာထဲမှာ ဖေါ်ပြထားပါတယ်။

ခု လတ်တလော နှစ်ပိုင်းတွေအတွင်း လက်ရှိ အစိုးရက နိုင်ငံရေး အကျဉ်းသား ရာပေါင်းများစွာ ပြန်လွှတ်ပေးခဲ့တာမျိုး၊ လက်ပံတောင်းတောင် ကြေးနီစီမံကိန်း ဆန္ဒပြမှုတွေကို အကြမ်းဖက် နှိမ်နင်းခဲ့မှုအတွက် ဒေသခံ ရဲအာဏာပိုင်တွေက ဝန်ချ တောင်းပန်တာမျိုးတွေလို တိုးတက်မှုတွေ ရှိခဲ့ပေမယ့် နောက်ထပ် ဆောင်ရွက်စရာတွေ အများကြီးလိုနေသေးတယ်လို့ အစီရင်ခံစာထဲမှာ ဖေါ်ပြထားပါတယ်။

အတိတ်က ဖြစ်ရပ်တွေအတွက် ပြန်လက်စားချေမှာကို စိုးရွံ့မှုတွေ ရှိနေတဲ့ စစ်တပ်ရဲ့ ထိန်းချုပ် ကန့်သတ်မှုတွေ အောက်မှာ အစိုးရသစ်အနေနဲ့ နိုင်ငံကို ထိထိရောက်ရောက် အုပ်ချုပ်နိုင်ရေးမှာ စစ်တပ်နဲ့ အတိမ်းအစောင်း မခံတဲ့ ဆက်ဆံမှုမျိုး ထားရှိဖို့ကိုလည်း တိုက်တွန်းထားပါတယ်။

ဒီသတင်းနဲ့ပတ်သက်သမျှ