RCSSနဲ့ TNLA အမြန်ဆုံးတွေ့ဖို့ ဆွေးနွေးသဘောတူ

  • 15 ဒီဇင်ဘာ 2015
ဓာတ်ပုံ မူပိုင် AP
Image caption RCSS/SSA ဘက်က နယ်ကျော် လာလို့ တိုက်ပွဲတွေ စ ဖြစ်တာလို့ PSLF/TNLA ဘက်ကပြော

UNFC ညီညွှတ်သော တိုင်းရင်းသားများ ဖယ်ဒရယ် ကောင်စီ တာဝန်ရှိသူတွေနဲ့ RCSS/SSA ရှမ်းပြည် တပ်မတော် တောင်ပိုင်း ဥက္ကဌ ဒုဗိုလ်ချူပ်ကြီး ယွက်ဆစ် ဦးဆောင်တဲ့ ကိုယ်စားလှယ်တွေ ဒီဇင်ဘာလ ၁၅ရက်နေ့က ထိုင်းနိုင်ငံ ချင်းမိုင်မြို့မှာ တွေ့ဆုံ ခဲ့ကြပြီး RCSS/SSA ရှမ်းပြည် တပ်မတော် တောင်ပိုင်း တပ်ဖွဲ့နဲ့ PSLF/ TNLA တအာင်း ပလောင်တပ်ဖွဲ့ တို့အကြား တိုက်ပွဲတွေ ရပ်စဲနိုင်ရေးကို အဓိကထား ဆွေးနွေးခဲ့ကြပါတယ်။

ရှမ်းပြည်မြောက်ပိုင်းမှာ RCSS/SSA နဲ့ PSLF/TNLA အကြား တိုက်ပွဲတွေ ရပ်စဲနိုင်ရေး အတွက် UNFC အဖွဲ့က ကြားဝင် ညှိနှိုင်း ဆွေးနွေးခဲ့တာ ဖြစ်ပါတယ်။

RCSS/SSA ကိုယ်စားလှယ် အဖွဲ့ကို ဥက္ကဌ ဒုဗိုလ်ချူပ်ကြီး ယွက်ဆစ် ဦးဆောင်ခဲ့ပြီး UNFC ဘက်ကတော့ ဗိုလ်ချူပ် ဘီထူး၊ ဦးထွန်းဇော် နဲ့ နိုင်ရွန်တိန်း တို့ ပါဝင်ဆွေးနွေးခဲ့ကြပါတယ်။

နှစ်ဘက်အကြား ပဋိပက္ခတွေကို ငြိမ်းချမ်းတဲ့နည်းနဲ့ ဖြေရှင်းကြဖို့နဲ့ သင့်တော်တဲ့ အချိန် တခုခုမှာ PSLF/TNLA ကိုယ်စားလှယ်တွေနဲ့ RCSS/SSA ကိုယ်စားလှယ်တွေ တွေ့ဆုံကြ ဖို့ကို ဆွေးနွေး သဘောတူခဲ့ကြတယ်လို့ RCSS/SSA အဖွဲ့ ပြောရေးဆိုခွင့်ရှိသူ ဒုတိယ ဗိုလ်မှူးကြီး စိုင်းငင်းက ဘီဘီစီကို ပြောပါတယ်။

TNLA တပ်ဖွဲ့ ဖမ်းသွားတဲ့ ရှမ်းလူမျိုးတွေကို အမြန်ဆုံး ပြန်လွှတ်ပေးဖို့ကိုလည်း UNFC ကိုယ်စားလှယ်တွေကနေတဆင့် ပြောခဲ့တယ်လို့ သူက ပြောပါတယ်။

အခုအခါ နှစ်ဘက် တပ်ဖွဲ့ ကိုယ်စားလှယ်တွေ အမြန်ဆုံး တွေ့ဆုံ ဆွေးနွေးနိုင်ဖို့ တအာင်း ပလောင်တပ်ဖွဲ့ဘက်ကိုလည်း အကြောင်းကြားလိုက်ပြီလို့ UNFC ကိုယ်စားလှယ်အဖြစ် ဝင်ရောက် ဆွေးနွေးခဲ့တဲ့ ဦးထွန်းဇော်က ပြောပါတယ်။

RCSS /SSA ဘက်ကတော့ မြန်မြန်တွေ့လေ၊ ကောင်းလေလေ ဆိုတဲ့ သဘောထား ရှိနေပြီး PSLF/TNLA ဘက်က တုန့်ပြန်ချက် သဘောထား ရရင်တော့ နှစ်ဘက် တွေ့ဆုံတဲ့ အခင်းအကျင်း ဖြစ်လာမယ်လို့ ထင်ကြောင်း ဦးထွန်းဇော်က ပြောပါတယ်။

အဲဒီ ဆွေးနွေးပွဲမှာ တိုက်ပွဲတွေ ရပ်ဆိုင်းဖို့အပြင် တိုင်းရင်းသား စည်းလုံး ညီညွှတ်ရေးနဲ့ တစ်နိုင်ငံလုံး အပစ်အခတ် ရပ်စဲရေး စာချုပ်မှာ လက်မှတ်ထိုးဖို့ ကျန်နေသေးတဲ့ တိုင်းရင်းသားအဖွဲ့တွေ အားလုံး ပါဝင်နိုင်ရေးအတွက် နည်းလမ်း ရှာဖို့ကိုလည်း ဆွေးနွေးခဲ့ကြပါတယ်။