လိပ်ကျွန်းအမှု ဥပဒေအတိုင်း ဆက်မယ်လို့ ထိုင်းဘက်ဆို

  • 28 ဒီဇင်ဘာ 2015
Image caption ကော့တောင်ကျွန်းအမှုစီရင်ချက်ကိုဆန့်ကျင်ဆန္ဒပြမှုတွေမြန်မာနိုင်ငံမှာဆက်တိုက်ဖြစ်ခဲ့

ဗြိတိန်နိုင်ငံသား ၂ ဦးကို သတ်မှုနဲ့ မြန်မာနိုင်ငံသား ဝင်းဇော်ထွန်းနဲ့ ဇော်လင်းတို့ ကို အောက်ခြေ တရားရုံးက သေဒဏ် အပြစ်ပေး ခဲ့တာနဲ့ ပတ်သက်ပြီး ထိုင်း ဥပဒေအတိုင်း ပဲ လုပ်သွားရမှာဖြစ်တယ်လို့ ထိုင်းဝန်ကြီးချုပ် ပရာ့ယွတ် ကျန်းအိုးချား က ပြောကြားခဲ့ပါတယ်။

မြန်မာ ရွှေ့ပြောင်း အလုပ်သမား နှစ်ဦးကို သေဒဏ် အမိန့်ချ ထားတဲ့ အပေါ် ထိုင်းအစိုးရက ပြန်လည် သုံးသပ် ပေးဖို့ မြန်မာ အစိုးရ ဘက်က တာဝန်ရှိသူ တွေနဲ့ အများ ပြည်သူက တောင်းဆို နေကြ ပါတယ်။

ဒီအကြောင်း ထိုင်းဝန်ကြီးချုပ်ကို သတင်းထောက်တွေကမေးမြန်းတော့ သူက

"တရားရုံးက ဆုံးဖြတ်ပြီးရင် အယူခံရုံးနဲ့ တရားရုံးချုပ် တို့ကို ဆက်ပြီး တင်နိုင်တယ် မဟုတ်လား။ မြန်မာ ဘက်ကိုလည်း ရှင်းပြ လို့ ရပါတယ်။ မြန်မာ ဘက်က တောင်းဆို တာက တရား ဥပဒေ အတိုင်း မျှမျှတတဆောင်ရွက် ပေးဖို့ ဖြစ်တယ်။ အမှုကို လုံးဝ ရုပ်သိမ်း လိုက်လို့ ရမလား။ မရဘူး ဆိုရင် မရတဲ့ အကြောင်း ရှင်းပြ လိုက်ပေါ့။ အယူခံ ဝင်ခွင့် ပေးထား တယ် မဟုတ်လား။ ကမ္ဘာ့ ဥပဒေ တွေလည်း ဒီလိုပဲ ရှိတယ် မဟုတ်လား။ ထိုင်းမှာ အယူခံ စရာ မလိုဘူးလား၊ ဖိအားပေး တာနဲ့ အမှုကို ရုတ်သိမ်းလိုက် တာမျိုး လုပ်လို့ ရပါမလား" လို့ပြောခဲ့ ပါတယ်။

ဒီအမှုကို တရားမျှမျှ တတ ဆောင်ရွက် ပေးဖို့ ဗိုလ်ချုပ်မှူးကြီး မင်းအောင်လှိုင်က ထိုင်း ဒုတိယဝန်ကြီးချုပ် လည်းဖြစ် ကာကွယ်ရေး ဝန်ကြီးလည်း ဖြစ်တဲ့ ပရာ့ဝစ် ဝုံးစူဝမ်း နဲ့ ကာကွယ်ရေး ဦးစီးချုပ် ဗိုလ်ချုပ်ကြီး စုမ်မိုင် ကောင်းထီရာ့ ကို သဝဏ်လွှာ ပေးပို့ ခဲ့ပါတယ်။

ဒါကို ပြန်လည် ရှင်းပြဖို့ ဗိုလ်ချုပ်ကြီး စုမ်မိုင် ကောင်းထီရာ့ကို ဒုဝန်ကြီးချုပ် ပရာ့ဝစ် ဝုံးစူဝမ်းက တာဝန်ပေး လိုက်ပါတယ်။

ဝင်းဇော်ထွန်းနဲ့ ဇော်လင်းတို့ ရဲ့အမှုကို အခမဲ့ အကျိုးဆောင် ပေးနေတဲ့ ထိုင်းရှေ့နေများ ကောင်စီက အယူခံဝင်မယ့်အကြောင်း သူတို့ရဲ့ မိခင်တွေကို ဒီဇင်ဘာ ၃၀ ရက်နေ့မှာ ရှင်းပြပြီး သတင်းစာ ရှင်းလင်းပွဲ ပြုမယ်လို့ ကြေညာချက် ထုတ်ပြန် ထားပါတယ်။

ထိုင်းတရားရုံး ရဲ့ဆုံးဖြတ်ချက်ကို ရက်ပေါင်း ၃၀ အတွင်း အယူခံ ဝင်ရမှာ ဖြစ်ပါတယ်။

အယူခံ တရားရုံးမှာ အောက်ခြေ တရားရုံးနဲ့ ကွဲလွဲပြီး အနိုင်ပေးတဲ့ အမှုတွေ အများအပြား ရှိခဲ့ဘူးတယ်လို့ မြန်မာ နှစ်ဦး ရဲ့ ရှေ့နေ အဖွဲ့ အကြံပေး စူရာ့ဖုန်း ကောင်းကျန်းထွတ်ခ် က ရှင်းပြပါတယ်။

ထိုင်းနိုင်ငံမှာ သေဒဏ် အမိန့်ချမှတ် ပေမယ့် သေဒဏ် ပေးတာတော့ မရှိတော့ဘူး လို့ ရှေ့နေ စူရာ့ဖုန်း ကောင်းကျန်းထွတ်ခ် က ပြောပါတယ်။