စိတ်ကြွဆေးအမှု ရုံးထုတ်စစ်ဆေး

  • 6 ဇန်နဝါရီ 2016
myanmar drugs
Image caption ဇေကမ္ဘာဝင်း အနီး စိတ်ကြွဆေးဖမ်းမိခဲ့

အရှေ့တောင် အာရှမှာ စံချိန်တင် အများဆုံး ဖမ်းဆီး မိခဲ့တဲ့ စိတ်ကြွဆေး အမှုကို ရန်ကုန်တိုင်း မြောက်ပိုင်းခရိုင် တရားရုံးမှာ ဗုဒ္ဓဟူး နေ့က ရုံးထုတ် စစ်ဆေး ခဲ့ပါတယ်။

မင်္ဂလာဒုံမြို့နယ် ဇေကမ္ဘာဝင်း အနီး ရပ်ထားတဲ့ ကွန်တိန်နာ ယာဉ်ပေါ်မှာ ကျပ်ငွေ ၁၃၃ ဘီလျံကျော် တန်ဖိုးရှိတဲ့ စိတ်ကြွဆေးပြား ၂၆၇ သိန်းကို ပြီးခဲ့တဲ့နှစ် ဇူလိုင်လက ဖမ်းဆီးမိခဲ့တာ ဖြစ်ပါတယ်။

ဒီအမှုနဲ့ ပတ်သက်ပြီး သံသယရှိသူ ၈ ဦး ဖမ်းဆီးထား ပါတယ်။ နောက်ထပ် တရားခံပြေး အယောက် ၂၀ ကိုတော့ ရဲက ရှာဖွေ ဖမ်းဆီး နေဆဲ ဖြစ်ပါတယ်။

တရားခံပြေး အယောက်၂၀ ကို ဖမ်းဝရမ်းအတည်ပြုခဲ့တဲ့ ရဲတွေထဲက ဒုရဲအုပ် ကျော်ဌေးလွင်ကို မြောက်ပိုင်း ခရိုင် တရားရုံးက တရားလိုအဖြစ် ရုံးထုတ်စစ်ဆေးခဲ့ပါတယ်။

အမှုနဲ့ ပတ်သက်တဲ့ ဖမ်းမမိ သေးသူတွေရဲ့ လိပ်စာကို အတည်ပြုဖို့ တရားခံ ပြေးအမှုကို စစစ်တာ ဖြစ်တယ်လို့ မှုခင်း ရဲတပ်ဖွဲ့က အမှုစစ် ဒုရဲအုပ် ခင်မောင်လွင် က ပြောပါတယ်။

ထွက်ပြေးတိမ်းရှောင် တရားခံတွေရဲ့ အမှုကို အရင်စစ်ဆေးပြီးမှ သံသယရှိသူ ၈ ဦးအမှုကို ဆက်လက် စစ်ဆေးမှာ ဖြစ်ပါတယ်။

သူတို့တွေကို မူးယစ်ဆေးဝါးရောင်းဝယ်တာ အားပေးကူညီတာ ပုဒ်မတွေနဲ့ စွဲချက်တင် စစ်ဆေးမယ်လို့ ဒုရဲအုပ် ခင်မောင်လွင် က ပြောပါတယ်။