ဒေါ်လာစျေးကျလို့ ဘဏ်တွေမဝယ်

  • 11 ဖေဖော်ဝါရီ 2016
US Dollar ဓာတ်ပုံ မူပိုင် Getty
Image caption ဒေါ်လာစျေးကျနေလို့ ဘဏ်တွေက မဝယ်

အခုရက်အတွင်း အမေရိကန် ဒေါ်လာဈေး ဆက်တိုက် ကျဆင်းနေတဲ့အတွက် ငွေလဲ ကောင်တာတွေနဲ့ ပုဂ္ဂလိကဘဏ်တွေမှာ ဒေါ်လာဝယ်ယူမှုကို ပိတ်ထားတဲ့ အထိ ဖြစ်နေ ပါတယ်။

ဒီအတွက် ဗဟိုဘဏ်က ငွေလဲကောင်တာတွေ နဲ့ ဘဏ်တွေက တာဝန်ရှိသူတွေကို ခေါ်ယူပြီး ဒေါ်လာတွေ ဆက်ဝယ်ဖို့ ညွှန်ကြားခဲ့ ပါတယ်။

ဒေါ်လာဈေးဟာ ဒီနှစ် အစောပိုင်း ကတည်းက ဈေးကျလာခဲ့ပြီး အခုရက်အတွင်း တစ်နေ့ကို ဈေးနှုန်း ကျပ်ငွေ ဆယ်ဂဏန်းနဲ့ ချီပြီး အကျနှုန်း မြန်ဆန်လာခဲ့တာ ဖြစ်ပါတယ်။

ဗဟိုဘဏ်ရဲ့ သတ်မှတ်နှုန်း မှာတော့ ဒေါ်လာဈေးဟာ အရင် တစ်ဒေါ်လာကို ကျပ် ၁၃၀၀ ကျော် ရှိခဲ့ပြီး ဖေဖေါ်ဝါရီ ၁၁ ရက်နေ့ ပေါက်ဈေးကတော့ ၁၂၃၀ ကျပ်ပဲ ရှိပါတော့တယ်။

ဒါကြောင့် ပြင်ပငွေလဲ ကောင်တာတွေ ပုဂ္ဂလိက ဘဏ်တွေမှာ ဒေါ်လာဝယ်ယူမှု ရပ်ဆိုင်းတာမျိုးတွေ ရှိနေပါတယ်။

ထွန်းဖောင်ဒေးရှင်းဘဏ် ဥက္ကဌ ဦးသိန်းထွန်းကတော့ နေ့စဉ်ငွေလဲနှုန်း အတက်အကျ များနေတဲ့ အတွက် ငွေအမြောက်အများ ဝယ်ယူရတဲ့ ဘဏ်တွေ အရှုံးပေါ်နိုင်ခြေ ရှိလို့ စိုးရိမ်ပြီး မဝယ်ဘဲ နေကြတာမျိုး ရှိနိုင်တယ်လို့ဆိုပါတယ်။

ဆက်ဝယ်ဖို့ ဗဟိုဘဏ် ညွှန်ကြား

ဒီအတွက် ဗဟိုဘဏ်က ပုဂ္ဂလိကဘဏ်တွေနဲ့ ပြင်ပ ငွေလဲကောင်တာတွေက တာဝန်ရှိသူ တွေကို ခေါ်ယူပြီး ဒေါ်လာ ဝယ်ယူဖို့ ဝယ်ယူမှု ရပ်ဆိုင်းတဲ့ ဘဏ်တွေကို အရေးယူ ဆောင်ရွက်မယ် ဆိုပြီး ပြောခဲ့တယ်လို့ ဗဟိုဘဏ် တာဝန်ရှိသူတစ်ဦးက ပြောပါတယ်။

ဒီလို ဒေါ်လာဈေးဆက်တိုက် ကျဆင်းနေတာက ကမ္ဘာ့စျေးကွက် အတက်အကျ အတိုင်း လိုက်ဖြစ်တာလို့ ယူဆနိုင်ပြီး၊ မူးယစ်ဆေး ရောင်းဝယ်မှုက ရတဲ့ ဒေါ်လာငွေတွေ စျေးကွက်ထဲ အများကြီး ဝင်လာနေတဲ့အတွက် စျေးကျတာ ဖြစ်နိုင်ကြောင်း၊ ဗဟိုဘဏ် အနေနဲ့ ထိန်းချုပ်ဖို့ အများကြီး မတတ်နိုင်တဲ့ အကြောင်း စီးပွားရေးပညာရှင် ဦးလှမောင်က ထောက်ပြပါတယ်။

ပြင်ပဈေးကွက်မှာတော့ ဒေါ်လာ ပေါက်ဈေးက ဗဟိုဘဏ်သတ်မှတ်နှုန်းထက် (၁၅) ကျပ်လောက် ပိုများနေပြီး အရောင်းအဝယ် ဆက်ရှိနေပါတယ်။

ဒေါ်လာဈေး ကျဆင်းတဲ့ အတွက် သွင်းကုန်ဈေးနှုန်း ကျဆင်းပြီး ကုန်ဈေးနှုန်း ကျဆင်းတာမျိုး ဖြစ်နိုင်တယ် ဆိုပေမယ့် ဒေါ်လာဈေး အတက်အကျ ကြမ်းနေတာက စီးပွားရေး မတည်မငြိမ် ဖြစ်စေတယ်လို့ သုံးသပ်မှုတွေလဲ ရှိနေပါတယ်။

ဒီသတင်းနဲ့ပတ်သက်သမျှ