ဒေသလွှတ်တော် အကြီးအကဲတွေ သတိရှိဖို့ ဒေါ်စုတိုက်တွန်း

  • 22 ဖေဖော်ဝါရီ 2016
Yangon Division Parliament
Image caption ဒေသလွှတ်တော် အကြီးအကဲ ခန့်အပ်ခံကြရ ပြီးနောက် ဒေါ်စုနဲ့ ပထမဆုံးတွေ့ဆုံ

အစိုးရအလွှဲ အပြောင်းမလုပ်သေးတဲ့ အတွက် အလုပ် လုပ်ရာမှာ သတိရှိဖို့ ပြည်နယ်နဲ့တိုင်း အသီးသီးက လွှတ်တော် ဥက္ကဋ္ဌနဲ့ ဒုတိယ ဥက္ကဋ္ဌတွေကို NLD အမျိုးသား ဒီမိုကရေစီ အဖွဲ့ချုပ် ပါတီ ဥက္ကဋ္ဌ ဒေါ်အောင်ဆန်း စုကြည်က ပြောခဲ့ပါတယ်။

ဖေဖော်ဝါရီလ ၂၂ ရက်နေ့က တိုင်းနဲ့ပြည်နယ် ၁၂ ခုက လွှတ်တော်အကြီးအကဲတွေကို နေပြည်တော်မှာ ခေါ်ယူ တွေ့ဆုံရာမှာ ပြည်သူတွေ စိတ်ပျက်မယ့် အလုပ် မလုပ်ကြဖို့လည်း ဒေါ်အောင်ဆန်း စုကြည်က သတိပေးခဲ့တယ်လို့ NLD ဗဟို အလုပ်အမှုဆောင် ဦးဝင်းထိန်က ဘီဘီစီကိုပြော ပါတယ်။

နိုင်ငံသားတွေ အတွက်ပူးပေါင်းဆောင်ရွက်ဖို့နဲ့ တခြားအဖွဲ့အစည်းတွေအပေါ်လေးစားဖို့လည်း ဒေါ်အောင်ဆန်း စုကြည်က လွှတ်တော် ခေါင်းဆောင်တွေကို မှာကြားကြောင်း ချင်းပြည်နယ်လွှတ်တော်ဥက္ကဌ ဦးဇိုဘွဲက ဘီဘီစီ ကိုပြောပါတယ်။

ဥပဒေပြုရေး အာဏာဖြစ်တဲ့ ပြည်သူ့လွှတ်တော် အမျိုးသားလွှတ်တော်နဲ့ တိုင်းဒေသကြီး လွှတ်တော်တွေကို အောင်အောင်မြင်မြင် လွှဲပြောင်း နိုင်ခဲ့ ပေမဲ့ အုပ်ချုပ်ရေး အာဏာဖြစ်တဲ့ အစိုးရလွှဲပြောင်းဖို့က ရက်ပေါင်း ၄၀ နီးပါးကျန်ပါသေးလို့ အထူးဂရုစိုက်ဆောင်ရွက်ဖို့ ဒေါ်အောင်ဆန်း စုကြည်က သတိ ပေးတာဖြစ်ပါတယ်။

လက်ရှိအစိုးရအနေနဲ့ ပြီးခဲ့တဲ့ရွေးကောက်တုန်းက အခုလို အကြီးအကျယ် ရှုံးလိမ့်မယ်လို့မျှော်လင့်မထားတဲ့အတွက် အာဏာ လွှဲပြောင်းကာနီးမှာ မတည် မငြိမ်ဖြစ်မှာနဲ့ လက်ရှိနိုင်ငံရေး အခြေအနေကို စိုးရိမ်တာ တို့ကြောင့် အခုလိုသတိပေးတာ ဖြစ်နိုင်တယ် လို့လွှတ်တော် ကိုယ်စားလှယ်အချို့ကသုံးသပ်နေကြပါတယ်။

ဒီသတင်းနဲ့ပတ်သက်သမျှ