ပန်ဝါ ပေါက်ကွဲမှု လူသေဆုံး

  • 23 ဖေဖော်ဝါရီ 2016
Blast in Pan wah ဓာတ်ပုံ မူပိုင် MOI
Image caption ပန်ဝါမှာ ပေါက်ကွဲမှု ဖြစ်လို့ ပျက်စီးမှု များပြား

တနင်္လာည သန်းခေါင်ကျော် အင်္ဂါနေ့ မနက် အစောပိုင်းမှာ ကချင်ပြည်နယ် ပန်ဝါမြို့က နေအိမ် တစ်လုံးမှာ ပြင်းထန်တဲ့ ပေါက်ကွဲမှု ဖြစ်ခဲ့တဲ့ အတွက် နေအိမ် တချို့ ပျက်စီးပြီး ထိခိုက်ဒဏ်ရာ ရမှုတွေ ရှိခဲ့ပါတယ်။

ဒဏ်ရာရသွားကြသူ တွေက ဘေးအိမ်က ဆယ်ကျော်သက်အရွယ် မောင်နှမ သုံးယောက်ဖြစ်ပြီး ၁၄ နှစ် အရွယ် မလုလုအောင်က ပန်ဝါဆေးရုံပေါ်မှာ သေဆုံးသွားခဲ့ ပါတယ်။

ပြင်းထန်တဲ့ ပေါက်ကွဲမှုကြောင့် ဘေးပတ်ဝန်းကျင်က နေအိမ်တွေကို အပိုင်းအစတွေ လွင့်စင် သွားခဲ့ပြီး စာသင်ကျောင်းနဲ့ ဘုရားကျောင်း အပါအဝင် နေအိမ်တချို့ ထိခိုက် ခဲ့တယ်လို့ ပေါက်မှုဖြစ်ရာ နေရာကို သွားကြည့်ခဲ့တဲ့ ခရစ်ယာန် ဆရာတော် ဦးရင်ခေါ က ဘီဘီစီကို ပြောပါတယ်။

ပေါက်ကွဲမှု ဖြစ်တဲ့ နေအိမ်မှာ ဘယ်သူမှ ရှိမနေဘဲ ဘေးအိမ်က လူတွေကို ထိခိုက်ခဲ့တာ လို့လည်း သူက ပြောပါတယ်။

ပန်ဝါမြို့ ၂ ရပ်ကွက်က ပန်ဝါနဲ့ ချီဖွေ ကားလမ်းမ ဘေးက နေအိမ်မှာ သိုလှောင်ထားတဲ့ မိုင်းလုပ်ရာမှာသုံးတဲ့ ယမ်းတွေပေါက်ကွဲခဲ့တာ ဖြစ်ကြောင်း မြန်မာနိုင်ငံ ရဲတပ်ဖွဲ့က ရဲအရာရှိက ပြောပါတယ်။

အဲဒီဒေသမှာ သတ္တုတူးဖေါ်ရေးအတွက် မိုင်းယမ်းတွေကို အသုံးပြုကြတာ ရှိပေမဲ့ အခုပေါက်ကွဲခဲ့တဲ့ မိုင်းယမ်းတွေဟာ ဘာအတွက် အသုံးပြုဖို့လဲ ဆိုတာနဲ့ ပိုင်ရှင် အစစ်အမှန်က ဘယ်သူလဲဆိုတာ စုံစမ်းနေတုန်းပဲလို့ ရဲအရာရှိကြီးက ပြောပါတယ်။

ပေါက်ကွဲတဲ့ အိမ်ရဲ့ပိုင်ရှင်က ဦးထွန်းရှန်ဇုံးတင့် ဖြစ်ပြီး ဦးကြည်စိုး ဆိုသူငှားရမ်းထား တာဖြစ်တယ်လို့ သူက ပြောပါတယ်။

ဒီသတင်းနဲ့ပတ်သက်သမျှ