ထိုင်းရောက် မြန်မာတွေ လုပ်အားခ အပြည့်မရလို့ တိုင်

  • 26 ဖေဖော်ဝါရီ 2016
ဓာတ်ပုံ မူပိုင် AP
Image caption သတ်မှတ်ထားတဲ့ အနိမ့်ဆုံးလစာ မရတဲ့ မြန်မာအလုပ်သမား၁၅၀၀ လောက် ရှိတယ်လို့ ဆို

ထိုင်းနိုင်ငံ ဘန်ကောက်မြို့ရဲ့ တောင်ဘက် စမွတ်စာခေါန်းခရိုင်၊ မဟာချိုင် အရပ်မှာရှိတဲ့ ငါးသေတ္တာ ထုတ်လုပ်တဲ့ စက်ရုံက အလုပ်သမား ၁၅၀ဝ ကျော်ဟာ လုပ်အားခ အပြည့် မရလို့ ဆိုပြီး ထိုင်းအလုပ်သမား ဝန်ကြီးဌာန လက်အောက်က အလုပ်သမား ကာကွယ်ရေးနဲ့ လူမှုဖူလုံရေးရုံးကို ဖေဖော်ဝါရီလ ၂၅ရက်နေ့က သွားရောက် တိုင်ကြားခဲ့ ကြပါတယ်။

ထိုင်းနိုင်ငံက သတ်မှတ်ထားတဲ့ တစ်ရက် အနိမ့်ဆုံး လုပ်အားခ ဘတ် ၃၀ဝ နဲ့ အချိန်ပိုကြေး တစ်နာရီ ၅၆ ဘတ် ပေးရမှာကို မပေးပဲ နှစ်ပေါင်း အတော်ကြာ အခိုင်းခံ ထားရတာကြောင့် စမွတ်စာခေါန်းခရိုင် အလုပ်သမား ကာကွယ်ရေးနဲ့ လူမှု ဖူလုံရေးရုံးမှာ အလုပ်သမားတွေ တစ်ဦးချင်း လက်မှတ်ထိုးပြီး တရားဝင် တိုင်ကြားခဲ့ကြတာပါ။

တိုင်ကြားသူ အယောက် ၂၀ဝ ကျော် ရှိခဲ့ပြီး နောက်နေ့တွေမှာလည်း ဆက်တိုင်ကြားသွားမယ်လို့ အလုပ်သမားတွေက ပြောပါတယ်။

လွန်ခဲ့တဲ့ ၄ နှစ်ကျော်က စပြီး တစ်ရက်ကို ဘတ် ၃၀ဝ နှုန်း ပေးရမယ်လို့ ထိုင်းအစိုးရက တရားဝင် သတ်မှတ်ထားပေမယ့် ပြီးခဲ့တဲ့ တစ်နှစ်ကျော်ကမှ စက်ရုံက စပေးခဲ့တာပါ။

အခု တိုင်ကြားတာက အရင် မပေးခဲ့တဲ့ နှစ်တွေကို ပြန်တောင်းတာ ဖြစ်ပြီး လွန်ခဲ့တဲ့ ၂ နှစ်စာကိုပဲ တောင်းဆိုတာတောင် စုစုပေါင်း ဘတ်ငွေ သန်း၁၆၀ ရှိတယ်လို့ အလုပ်သမားတွေကို အကူအညီ ပေးနေတဲ့ ရွှေ့ပြောင်း အလုပ်သမား အခွင့်အရေး ကွန်ရက် ဥက္ကဌ ဦးစိန်ဌေးက ဘီဘီစီကို ပြောပါတယ်။

အခု အလုပ်သမားတွေ လုပ်အားခ အပြည့် မရတဲ့အပြင် ကျန်းမာရေး ခံစားခွင့်လည်း မရဘူးလို့ အဲဒီ ငါးသေတ္တာ စက်ရုံမှာ ၁၀ နှစ်ကျော် အလုပ်လုပ်နေတဲ့ အလုပ်သမားတစ်ဦးက ပြောပါတယ်။

အလုပ်သမားတွေက လုပ်အားခကို နောက်ပြန်ကြေး တောင်းဆိုလာတာကြောင့် မပေးချင်လို့ အလုပ်သမားတွေ ကိုယ်သဘောနဲ့ ကိုယ် အလုပ်ထွက်တာမျိုး ဖြစ်အောင် သက်သက်ညစ်ပြီး နေရာပြောင်းရွှေ့ လုပ်ခိုင်းတာမျိုးလည်း ရှိနေတယ်လို့ အလုပ်သမတစ်ဦးက ပြောပြပါတယ်။

အခုလို အလုပ်သမားတွေ တရားဝင် တိုင်ကြားတာကို ခရိုင် အလုပ်သမား ကာကွယ်ရေးနဲ့ လူမှုဖူလုံရေးရုံးက ဖြေရှင်းလို့ မရရင် တရားစွဲတဲ့ အထိ လုပ်ရမယ်ဆိုရင်လည်း ရွှေ့ပြောင်း အလုပ်သမား အခွင့်အရေး ကွန်ရက်က အကူအညီ ပေးသွားမယ်လို့ ဥက္ကဌ ဦးစိန်ဌေးက ဘီဘီစီကို ပြောပါတယ်။