ရခိုင် ရေနံ စောင့်ကြည့်ရေး အဖွဲ့ အစီရင်ခံစာထုတ်

rakhine ဓာတ်ပုံ မူပိုင် Arakan Oil Watch

ရခိုင် ပြည်နယ် မှာ ရှိတဲ့ စီမံကိန်းတွေ နဲ့ ပတ်သက် လို့ ရခိုင်ရေနံ စောင့်ကြည့်ရေးအဖွဲ့(Arakan Oil Watch) အဖွဲ့က နေ သယံဇာတ ကျိန်စာ ကို တိုက်ဖျက်ခြင်း ဗဟို အစိုးရ ချုပ်ကိုင်မှု အာဏာကို လျှော့ချ၍ သယံဇာတ ဆိုင်ရာ စီမံခန့်ခွဲခြင်း" ခေါင်းစဉ်နဲ့ အစီရင်ခံစာ ထုတ်ပြန် လိုက်ပါတယ်။

ရခိုင် ပြည်နယ် မှာ တူးဖော် ထုတ်လုပ် နေတဲ့ စီမံကိန်း တွေမှာ စီမံ ခန့်ခွဲမှုနဲ့ အကျိုးအမြတ် ခံစားခွင့်တွေ ရဖို့ နဲ့ ပြည်ထောင်စု အစိုးရ ကနေ ချုပ်ကိုင်မှု လျှော့ချဖို့တွေ နဲ့ ပတ်သက်လို့ ရခိုင် ရေနံ စောင့်ကြည့်ရေး အဖွဲ့(Arakan Oil Watch) အဖွဲ့ ကနေ အစီရင်ခံစာ ထုတ်ပြန် လိုက်တာ ဖြစ်ပါတယ်။

တက်လာတော့မယ့် NLD အစိုးရ လက်ထက်မှာ ဒီစီမံကိန်း တွေက ရတဲ့ အခွန်ငွေတွေကို ပြည်နယ်က တိုက်ရိုက် အခွန်ကောက်ခွင့်လို စီမံခန့်ခွဲမှုတွေ ပြုစေ လိုတယ်လို့ ရခိုင် ရေနံ စောင့်ကြည့်ရေး အဖွဲ့က ဒါရိုက်တာ ဦးကျော်ခိုင်က ပြောပါတယ်။

ငြိမ်းချမ်းရေး မရခင်မှာ လက်ရှိ လုပ်နေဆဲ စီမံကိန်း တွေကို ရပ်ဆိုင်းတာ၊ အသစ် ချမပေးတာ၊ သက်တမ်း ပြန်တိုးမပေးတာတွေ လုပ်ပြီး ပြန်လည် သုံးသပ် သင့်တယ်လို့ လည်း ဆိုပါတယ်။

ကျောက်ဖြူ သဘာဝ ဓာတ်ငွေ့ တူးဖော်ရေး စီမံကိန်း ကြောင့် ဒေသခံတွေ လျော်ကြေး မရတာ၊ လျှပ်စစ်မီး မှန်မှန် မရတာလို အခက်အခဲတွေ ရှိတယ်လို့လည်း ပြောပါတယ်။

လောလောဆယ် ရခိုင် ပြည်နယ် မှာ ကျောက်ဖြူ အထူး စီးပွားရေး ဇုန် စီမံကိန်း အပါအဝင် ပင်လယ် ကမ်းလွန် ရေနံ နဲ့ သဘာဝ ဓာတ်ငွေ့ တူးဖော် နေတဲ့ စီမံကိန်း တွေ ကို ပုဂ္ဂလိက ကုမ္ပဏီ တွေနဲ့ အစိုးရ ပူးပေါင်းပြီး ဆောင်ရွက် နေတာ ဖြစ်ပါတယ်။

စီမံကိန်းတွေနဲ့ ပတ်သက်တဲ့ အခု အစီရင်ခံစာ ကို ရခိုင် ရေနံ စောင့်ကြည့်ရေး အဖွဲ့ ကနေ ဦးဆောင်ပြီး ဒေသတွင်း အရပ်ဘက် အဖွဲ့တွေနဲ့ တနှစ်ကြာ လောက် လေ့လာမှု ပြုလုပ်ပြီး ထုတ်ပြန်တာ ဖြစ်ပါတယ်။