ဒေါ်စု ဝန်ကြီးဖြစ်ရင် ပါတီက ထွက်ရမှာလား

dassk_minister_chairperson ဓာတ်ပုံ မူပိုင် AP
Image caption အစိုးရ ဝန်ကြီး ရာထူး ရယူရင် ပါတီ နိုင်ငံရေးနဲ့ မပတ်သက်ဖို့ ဖွဲ့စည်းပုံက ကန့်သတ်ထား။

သမ္မတသစ် ဖြစ်လာမယ့် ဦးထင်ကျော်ရဲ့ အစိုးရ ကက်ဘိနက် ဝန်ကြီး စာရင်း ထဲမှာ ဒေါ်အောင်ဆန်းစုကြည် ဟာ နိုင်ငံခြားရေး ဌာန အပါအဝင် ဝန်ကြီး ဌာန လေးခု ကို တာဝန်ယူ မယ် ဆိုပြီး ပါဝင် လာတဲ့ နောက် ၂၀၀၈ ဖွဲ့စည်းပုံ အရ နိုင်ငံရေးပါတီ ရဲ့ လုပ်ငန်း တာဝန်တွေမှာ ဆက်လက် ပါဝင်နိုင်မှာလား ဆိုတဲ့ မေးခွန်းထုတ်မှု တွေ ဖြစ်ပေါ် လာပါတယ်။

ဖွဲ့စည်းပုံ အခြေခံ ဥပဒေ ပုဒ်မ ၂၃၂ (ဋ) မှာ “ ပြည်ထောင်စုဝန်ကြီးသည် နိုင်ငံရေးပါတီတစ်ခုခု၏ အဖွဲ့ဝင်ဖြစ်လျှင် ပြည်ထောင်စုဝန်ကြီးအဖြစ် ခန့်အပ် တာဝန်ပေးခြင်း ခံရသည့်နေ့မှစ၍ မိမိ ရာထူးသက်တမ်း အတွင်း ယင်းပါတီ အဖွဲ့အစည်း၏ ပါတီလုပ်ငန်းများတွင် ပါဝင်ဆောင်ရွက်ခြင်းမပြုရ” လို့ ဆိုထားပါတယ်။

ဒါပေမယ့် အမျိုးသား ဒီမိုကရေစီ အဖွဲ့ချုပ် NLD ပါတီရဲ့ ဥပဒေ အကြံပေး တစ်ဦး ဖြစ်တဲ့ လွှတ်တော် ရှေ့နေ ဦးကိုနီ ကတော့ အဲဒီ့ ပုဒ်မ ကို အဓိပ္ပာယ် ဖွင့်ဆိုရာမှာ ပါတီ ဥက္ကဌ ရာထူးက စွန့်လွှတ်ရမယ် လို့ ရေးသား ထားတာ မဟုတ်ဘူး ဆိုပြီး ပြောပါတယ်။

ပြည်ထောင်စု ဝန်ကြီး တစ်ဦးရဲ့ လုပ်ငန်း တာဝန် တွေ ကို မထိခိုက် ဖို့ ရည်ရွယ် ထည့်သွင်း ထားပုံရတာ ကြောင့် ပါတီ မှာ ရုံးထိုင်ပြီး နေ့စဉ် ပါတီ တာဝန်တွေကို စီမံ ခန့်ခွဲ တာမျိုး ပြုလုပ်တာကို ကန့်သတ်ထား တာ အဖြစ် သူ့ အနေနဲ့ နားလည်ရ ကြောင်း ဦးကိုနီ က ဆိုပါတယ်။

ပါတီ ကို လမ်းညွှန်မှု မပေးနိုင်၊ ဦးဆောင်မှု မပေး နိုင်ဘူး ဆိုတဲ့ အဓိပ္ပာယ် မျိုး မသက်ရောက် သလို၊ NLD ပါတီ အနေနဲ့လည်း ဒေါ်အောင်ဆန်းစုကြည် ရဲ့ ဦးဆောင်လမ်းညွှန်မှု ခံယူပြီး ပါတီ ရဲ့ လုပ်ငန်းတာဝန် တွေ ကို အကောင် အထည် ဖော်မယ့် အတွင်းရေးမှုး အဖွဲ့ ရှိနေတယ် လို့လည်း ဦးကိုနီက ပြောပါတယ်။

၂၀၀၈ အခြေခံ ဥပဒေ အသက်ဝင် ခဲ့ပြီး နောက်ပိုင်း ဦးသိန်းစိန် သမ္မတ နေရာ ရရှိခဲ့တဲ့ အချိန်တုန်းက ကြံ့ခိုင်ရေး ပါတီ ဥက္ကဌ နေရာကို ဦးရွှေမန်း ကို လွှဲပေး ခဲ့တယ်ဆိုပြီး နားလည် ထားခဲ့ရာ ကနေ ဦးရွှေမန်း ပါတီတွင်း ဖယ်ရှား ခံရချိန် မှာ တော့ ဦးသန်းစိန်သာ ပါတီ ဥက္ကဌ ဖြစ်ပြီး ဦးရွှေမန်းဟာ ယာယီ ဥက္ကဌ တစ်ယောက် သာ ဖြစ်တယ် ဆိုတဲ့ ကြံ့ခိုင်ရေး ပါတီ ဘက် က ပြောဆို ခဲ့မှု တွေ ရှိခဲ့ပါတယ်။

ဒီသတင်းနဲ့ပတ်သက်သမျှ