ပြည်ခိုင်ဖြိုးပါတီတွင်း ပြဿနာ အိတ်ဖွင့်ပေးစာ

ဓာတ်ပုံ မူပိုင် AP
Image caption ပြီးခဲ့တဲ့ ရွေးကောက်ပွဲမှာ အာဏာရ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေး ပါတီက ထောက်ခံမဲ ဒုတိယ အများဆုံး ရခဲ့

ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီ အတွင်း ဥပဒေ စည်းမျဉ်း စည်းကမ်းတွေနဲ့ ညီညွတ်မှု မရှိတဲ့ ဆောင်ရွက်ချက်တွေကို ပြန်လည် သုံးသပ်ဖို့ ပါတီဥက္ကဋ္ဌ ဉီးသိန်းစိန်ကို တိုက်တွန်းလိုက်ကြောင်း ပါတီတွင်းကနေ အနားပေးခံခဲ့ရတဲ့ ပါတီဝင် ၁၂ဉီးက သတင်းစာ ရှင်းလင်းပွဲ လုပ်ခဲ့ပါတယ်။

ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေး ပါတီရဲ့ ပါတီတွင်း ပြဿနာဟာ ပါတီ အဝိုင်းအဝန်းကို ကျော်ပြီး နိုင်ငံတော်နဲ့ ပြည်သူတွေကို တနည်းတဖုံ ရိုက်ခတ်စေနိုင်တဲ့ အတွက် အခုလို တင်ပြရတာလို့ သူတို့ရဲ့ အိတ်ဖွင့်ပေးစာမှာ ဖော်ပြထား ပါတယ်။

ဧပြီလတုန်းက ပါတီဝင် ၁၅ဉီးကို အသိမပေး၊ ခုခံချေပခွင့်လည်း မပေးပဲ ပါတီကနေ အနားပေး ထုတ်ပယ်ခဲ့တဲ့ ကိစ္စ၊ ပါတီရဲ့ ရွေးကောက် တင်မြှောက်ပုံ စနစ် အတိုင်း မဟုတ်ပဲ ဗဟို အလုပ်အမှုဆောင် ကော်မတီဝင်သစ်တွေကို ပြီးခဲ့တဲ့ သြဂုတ်လက ခန့်အပ် တာဝန်ပေးခဲ့တဲ့ ကိစ္စ၊ ပါတီဖွဲ့စည်းပုံ အရ တစ်နှစ် အနည်းဆုံး နှစ်ကြိမ် ပါတီ ဗဟို ကော်မတီ အစည်း အဝေးခေါ်ရမှာ ဖြစ်ပေမဲ့ တစ်နှစ်ပြည့်ချိန် အထိ မခေါ်တဲ့ ကိစ္စ စတာတွေဟာ ပါတီရဲ့ စည်းမျဉ်း စည်းကမ်းတွေနဲ့ ညီညွတ်မှု မရှိဘူးလို့ ပါတီကနေ အနားပေးခံခဲ့ရတဲ့ ဗဟိုကော်မတီဝင် ဉီး ဇော်မြင့်ဖေက ဘီဘီစီကို ပြောပါတယ်။

ဒီအိတ်ဖွင့်ပေးစာကို ပါတီဝင် ၁၂ဉီးကပဲ လက်မှတ်ရေးထိုး တင်ပြခဲ့တာ ဖြစ်ပေမယ့် အောက်ခြေ ပါတီဝင်တွေ အနေနဲ့လည်း မကြေနပ်မှုတွေ ရှိနေပြီး ဒါကို ပါတီ ခေါင်းဆောင် ဆိုသူတွေက ပြန်လည် ပြုပြင်ရမှာ ဖြစ်တယ်လို့ ဆိုပါတယ်။

ပြီးခဲ့တဲ့ ရွေးကောက်ပွဲမှာ မဲဆန္ဒရှင်တွေရဲ့ ထောက်ခံမဲ ဒုတိယ အများဆုံး ရထားပြီး တောင့်တင်းခိုင်မာတဲ့ ပြည်ခိုင်ဖြိုးပါတီ အနေနဲ့ ပါတီစုံ ဒီမိုကရေစီ ခေတ်မှာ အာဏာရ ပါတီအပေါ် ပြောသင့် ပြောထိုက်တာတွေ ပြောပြီး Check and Balance ထိန်းညှိပေးတာမျိုးတွေ မရှိပဲ ပါတီတွင်း အာဏာ ကိစ္စ၊ ရာထူး ကိစ္စတွေအတွက် အချိန်ကုန်နေမယ် ဆိုရင် အောင်နိုင်ရေး မပြောနဲ့၊ ပါတီ ရှင်သန်ရေး အတွက်ကိုတောင် အတော် ကြိုးစားရမယ့် အခြေအနေ ရှိနေတယ်လို့ ဉီးဇော်မြင့်ဖေ က ပြောပါတယ်။