ရခိုင်ပြည်နယ်က ဒေသခံ လူမျိုး အခေါ်အဝေါ် ကြေညာချက်ထုတ်

  • 4 ဇူလိုင် 2016
ဓာတ်ပုံ မူပိုင် AFP
Image caption ရခိုင်ပြည်နယ်တွင်း နေထိုင်နေသူတွေအပေါ် အခေါ်အဝေါ် အသုံးအစွဲတွေနဲ့ ပတ်သက်လို့ အငြင်းပွားမှုတွေ ထွက်ပေါ်နေ

ရခိုင်ပြည်နယ်မှာ လတ်တလော ဖြစ်ပေါ်နေတဲ့ အခြေအနေတွေအရ "ရခိုင်ပြည်နယ်ရှိ ဗုဒ္ဓဘာသာ ကိုးကွယ်သူ ဒေသခံ တိုင်းရင်းသားများ" ဆိုတဲ့ အသုံးအနှုန်းကို သုံးစွဲမှာ မဟုတ်တော့ပဲ "ရခိုင်လူမျိုး" လို့သာ သုံးစွဲမှာ ဖြစ်ကြောင်း ရခိုင်ပြည်နယ်အစိုးရအဖွဲ့က ကြေညာချက် ထုတ်ပြန်လိုက်ပါတယ်။

ဒါဟာ ရခိုင် ပြည်သူတွေရဲ့ လိုလားချက်နဲ့ အညီ သုံးစွဲ ဆောင်ရွက်သွားမှာ ဖြစ်ပြီး ရခိုင် တိုင်းရင်းသားဟာ ရခိုင် တိုင်းရင်းသားသာ ဖြစ်တယ်လို့ ဖေါ်ပြထားပါတယ်။

ရခိုင်ပြည်နယ်ရှိ အစ္စလာမ်ဘာသာ ကိုးကွယ်သူများ၊ ရခိုင်ပြည်နယ်ရှိ ဗုဒ္ဓဘာသာ ကိုးကွယ်သူများ လို့ သုံးနှုန်းဖို့ ပြန်ကြားရေး ဝန်ကြီးဌာနက ပြီးခဲ့တဲ့လက ညွှန်ကြားခဲ့တဲ့ အပေါ်မှာ ရခိုင်ပြည်နယ် တဝှမ်း အငြင်းပွားမှုတွေ၊ ကန့်ကွက် ဆန္ဒ ဖေါ်ထုတ်မှုတွေ ရှိခဲ့အပြီးမှာ ရခိုင်ပြည်နယ် အစိုးရက အခုလို ကြေညာချက် ထုတ်ပြန်လိုက်တာ ဖြစ်ပါတယ်။

ရခိုင်ပြည်နယ် အစိုးရဲ့ အခု ထုတ်ပြန်ကြေညာချက်ထဲမှာ ရခိုင်ပြည်နယ်တွင်းမှာ နေထိုင်နေတဲ့ မွတ်ဆလင်တွေကို ဘယ်လို ခေါ်ဝေါ် သုံးစွဲသင့်သလဲ ဆိုတာနဲ့ ပတ်သက်လို့တော့ တစုံတရာ ဖေါ်ပြမထားပါဘူး။

ဒါပေမယ့်လည်း ရခိုင်ပြည်နယ်မှ မွတ်ဆလင် ဘာသာဝင်များ ဆိုတဲ့ အသုံးအနှုန်းဟာ အလွန် အန္တရာယ် ကြီးတဲ့ အသုံးအနှုန်း ဖြစ်တဲ့အတွက် ဘင်္ဂါလီ ကို ဘင်္ဂါလီ ဆိုတဲ့ နာမည်အတိုင်း ခေါ်ဖို့ ဆန္ဒ ထုတ်ဖော်ထားပြီး ဖြစ်ကြောင်း၊ သဘောက ကုလသမဂ္ဂမှာ တင်ပြခဲ့တဲ့ ရခိုင်ပြည်နယ်မှ မွတ်ဆလင်များ ဆိုတဲ့ ဝေါဟာရဟာ အခုထိ တည်ရှိနေတယ် ဆိုတဲ့ အဓိပ္ပါယ် ပေါက်နေပြီး ဒါကို ရခိုင်တိုင်းရင်းသားတွေကတော့ လုံးဝ သဘောမတွေ့ကြကြောင်း စစ်တွေမြို့မှ လူမှု အသိုင်းအဝိုင်း ခေါင်ဆောင် ဦးသန်းထွန်းက ဘီဘီစီကို ပြောပါတယ်။