လူသေများနဲ့ နေထိုင်ခြင်း

  • 19 ဧပြီ 2017
Image caption လူသေတွေလည်းပဲ ရှင်သူတွေနဲ့ မခြား ကြားနိုင် မြင်နိုင်တယ်လို့ ယုံကြည်

အများစုကတော့ သေခြင်းတရား အကြောင်း တွေးဖို့၊ ပြောဖို့ တွန့်ဆုတ် ကြပေမယ့်၊ လူသေတယ် ဆိုတာ ဘာမှ မဆန်းသလို နေ့စဉ်ဘဝရဲ့ အစိတ်အပိုင်း တစ်ရပ်အဖြစ် ပါဝင်နေတဲ့ နေရာလည်း ရှိနေပါတယ်။

အင်ဒိုနီးရှား နိုင်ငံက ဆူလာဝေစီ ဆိုတဲ့ ဒေသမှာ နေကြတဲ့ တိုရာဂျာ မျိုးနွယ်စု တွေမှာ ဆိုရင် ကွယ်လွန်သူတွေရဲ့ ရုပ်အလောင်းကို မြေမြှုပ်တာ၊ မီးရှို့တာမျိုး ချက်ခြင်း မလုပ်ပဲ ဧည့်ခန်းထဲမှာပဲ နှစ်ရှည်လများ ထားလေ့ ရှိပါတယ်။

သူစိမ်းတွေ အတွက် ဒီ အလေ့အထဟာ သိပ် ထူးဆန်း နေနိုင်ပေမယ့် အင်ဒိုနီးရှား အရှေ့ပိုင်းမှာ လက်ရှိ လူဦးရေ တစ်သန်းကျော် ရှိနေတဲ့ တိုရာဂျာ တွေ အတွက်တော့ ရာစုနှစ်ပေါင်း များစွာ ပြုမူလာတဲ့ အလေ့အထ တစ်ခု ဖြစ်ပါတယ်။

ရိုးရာ နတ်ကိုးကွယ်မှုလည်း ရောနှော ကျင်းသုံးဆဲ ဖြစ်တဲ့ တိုရာဂျာတွေရဲ့ အယူအဆ အရ လက်ရှိကမ္ဘာနဲ့ သေသည်ရဲ့ တခြားဘက်အရပ် အကြား ပိုင်းခြားထားတဲ့ စည်းဟာ အင်မတန် ဝေဝေဝါးဝါး ထွေထွေပြားပြား ရှိလှတဲ့ အတွက် သေတဲ့တိုင်အောင် ရှင်သူတွေရဲ့ကြား ရောရောထွေးထွေး နေနိုင်ကြပါသတဲ့။

ဒါ့ကြောင့် အိမ်တစ်အိမ်မှာ လူတစ်ယောက် ကွယ်လွန် ပြီဆို သင်္ဂြိုဟ်တဲ့ အခမ်းအနား ကျင်းပဖို့ လပေါင်းများစွာ အချိန်ယူလေ့ ရှိပါတယ်။

လူသေအလောင်းကို အိမ်မှာပဲ ထားပြီး သက်ရှိထင်ရှား လူမမာ တစ်ယောက်ကို ပြုစုတဲ့ ပုံမျိုး ဂရုစိုက်ကြပြီး၊ စားစရာ သောက်စရာက အစ စီးကရက် အဆုံး တစ်ရက်ကို နှစ်ကြိမ် လူသေအတွက် ယူလာ ပေးတဲ့ အပြင်၊ မှန်မှန် ရေပတ်တိုက်ပေးတာမျိုး အဝတ်လဲ ပေးတာမျိုး ဝတ်ကြီးဝတ်ငယ် ပြုစုကြတယ်လို့ တိုရာဂျာတွေ ကြားထဲ ကိုယ်တိုင် သွားခဲ့တဲ့ ဘီဘီစီ သတင်းထောက် ဆာဟာ ဇဲန်းက သူ့ အတွေ့အကြုံကို ဘီဘီစီ မဂ္ဂဇင်းထဲ ဆောင်းပါး ရေးသား ထားပါတယ်။

လူသေအလောင်းကို ပစ်ထားတာမျိုး ဘယ်တော့မှ မလုပ်ပဲ၊ တစ်ယောက် မဟုတ် တစ်ယောက် အနားမှာ အမြဲ နေပေးပြီး မှောင်လာရင်လည်း မီးထွန်း ပေးတယ်လို့ ဆာဟာ ဇဲန်းက ဆိုပါတယ်။

အဘိုး ဖြစ်သူရဲ့ အလောင်း အိမ်မှာ ရှိနေတဲ့ နေရာမှာ ဆိုရင် ဘေးမှာ ကလေးတွေ ပြေးလွှား ဆော့နေကြပြီး၊ သေတယ် ဆိုတာ နားမလည် သေးတဲ့ ကလေးတွေက "အဘိုး၊ ဘာလို့ တချိန်လုံး အိပ်နေတာလည်း… ထ… ထ ဆော့မယ်၊ ထမင်းစားမယ် ဆိုပြီး ပြောနေကြတာကို ဆာဟာ ဇဲန်း ကြုံခဲ့ရပါတယ်။

အလောင်းကို ထိန်းသိမ်းဖို့ ရိုးရာ ဆေးဘက်ဝင် အရွက်တွေ၊ ပရဆေးတွေ သုံးခဲ့ ကြတာက အခုအခါမှာတော့ ဖော်မလင်လို ဓာတုဆေးမျိုးတွေ ထိုးသွင်းတာမျိုး လုပ်ဆောင် လာကြပါပြီ။

အတူ မနေကြတဲ့ ဆွေမျိုးတွေကလည်း ကွယ်လွန်သူရဲ့ အိမ်ကို မှန်မှန် လာလည်တာမျိုး၊ ဖုန်းဆက်တာမျိုး လုပ်ပြီး "အဘိုး ဘယ်လို နေလဲ" ဆိုပြီး အမြဲပဲ သတင်းမေး ကြပါတယ်။

ဘာဖြစ်လို့လည်း ဆိုတော့ တိုရာဂျာတွေ အတွက် လူသေတွေလည်းပဲ ရှင်သူတွေနဲ့ မခြား ကြားနိုင် မြင်နိုင်တယ်လို့ ယုံကြည် နေကြလို့ ဖြစ်ပါတယ်။