သင့်စက်တွင် ဒီမီဒီယာဖိုင်ကို ဖွင့်၍ မရပါ။

အလင်္ကာပုလဲပန်း

  • 22 ဇန်နဝါရီ 2016

သီချင်း ပပိုဒ် နွေနှောင်းရက်ကျန်၊ ဝဿန်ပေါ်ဦးခါ

နွေနှောင်းဝဿန်သီချင်းပါ။ ရတုဘုရင်နတ်သျှင်နောင်ရဲ့ လှပတဲ့အဖွဲ့တွေနဲ့ ဆက်စပ်ယှက်နွယ်နေတဲ့ သီချင်းရေးဆရာအကျော်အမော် ဂီတနက်သန်ကိုစောညိန်း ရေးဖွဲ့ပါတယ်။ သီဆိုသူက မောင်မောင်ညွန့်ပါ။ ရတုဘုရင်နတ်သျှင်နောင်နဲ့ ကိုစောညိန်းတို့နှစ်ယောက်စလုံးဟာ စကားလုံးတလုံးချင်းတလုံးချင်းကို အဓိပ္ပာယ် အပြည့်နဲ့ ရေးစပ်တတ်သူတွေပါ။ နွေနှောင်းရက်ကျန်၊ ဝဿန်ပေါ်ဦးခါတဲ့။ နွေနှောင်းဆိုတော့ နွေရာသီနှောင်းပိုင်းကာလကိုဆိုလိုပါတယ်။ နွေရာသီက နှောင်းသွားပြီဆိုပေမယ့် လုံးလုံးတော့ မကုန်သေးပဲ ရက်ကျန်နေပါသေးတယ်။ ဒါ့ကြောင့် နွေနှောင်းရက်ကျန်လို့ ဆိုပါတယ်။ ဝဿန်ကတော့ အားလုံးသိကြတဲ့ မိုးရာသီပါ။ ဝဿန်ပေါ်ဦးခါ ဆိုတော့ မိုးဦးကျ အခါကို ဆိုလိုတာပေါ့ခင်ဗျာ။ ဒီတော့ နွေရာသီနှောင်းပိုင်း မိုးရာသီပေါ်ကာစကာလကို ဒီသီချင်းကဖွဲ့ဆိုထားတာပါ။

သီချင်း ဒုပိုဒ် အုံ့ပြမှိုင်းဆန်း၊ ယုဂန်ဗွေမြနန်းမှာ၊ ရွှေလျှံလျှပ်နွယ်ခွေကာ၊ မိလ္လာချပ်ဆင်၊ ငွေမင်မှောင်ပြာ၊ တိမ်တိုက်ရွှေ့ပြောင်း၊ လေလျဉ်လောင်းရာ.....

အုံပြမှိုင်းဆန်း၊ ယုဂန်ဗွေမြနန်းမှာတဲ့။ ယုဂန်ဗွေကို အရင်ပြောရအောင်ပါ။ ယုဂန်ဆိုတာက ယုဂန္ဓိုရ်တောင်ကို ပြောတာပါ။ တောင်စဉ်ခုနစ်ထပ်ရှိတဲ့ အနက် အတွင်းအကျဆုံးတောင်လို့ ဆိုလေ့ရှိပါတယ်။ လတို့နေတို့ ဆိုက်ရောက်တဲ့တောင်လို့လည်း ဆိုပါတယ်။ တကယ်တော့ ယုဂန္ဓိုရ်တောင်ဟာ ဘာသာရေးစာပေထဲမှာတွေ့ရတဲ့တောင်ပါ။ ပထဝီစာအုပ်ထဲမှာတော့ တွေ့ရမှာ မဟုတ်ပါဘူး။ ဒီတော့ အခုသီချင်းမှာပြောတဲ့တောင်ဟာ ယုဂန္ဓိုရ်တောင်အစစ်ကို ဆိုလိုတာ မဟုတ်ဘဲ နေဆိုက်ရောက်ရာ အရပ်မှာရှိတဲ့တောင်တတောင်ကို ဆိုလိုတာ ဖြစ်ပုံရပါတယ်။

ယုဂန်ဗွေလို့ဆိုထားရာမှာပါတဲ့ဗွေကိုဆက်ပြောရရင် ဗွေဆိုတာ ရစ်ပတ်တာ၊ ကွေ့ဝိုက်တာ၊ လှည့်လည်တာပါ။ ဒီတော့ ယုဂန်ဗွေဆိုတာ တောင်ကိုရစ်ပတ်ထားတဲ့လမ်းကြောင်း တောင်ကို ကွေ့ဝိုက်နေတဲ့ သစ်ပင်တောအုပ် စသဖြင့် ဖြစ်နိုင်ပါတယ်။ မြနန်းဆိုတာကတော့ သစ်ပင်တွေကြောင့် အစိမ်းရောင်ဖြစ်နေတဲ့ နန်းတော်လို့ တင်စားခေါ်ဝေါ်တာဖြစ်နိုင်ပါတယ်။

အဲဒီယုဂန်ဗွေမြနန်းမှာ ဘာတွေ ဖြစ်နေသလဲဆိုတော့ ရွှေလျှံလျှပ်နွယ်ခွေကာ မိလ္လာချပ်ဆင် ငွေမင်မှောင်ပြာတဲ့။ ရွှေရောင်လျှံတက်နေတဲ့ လျှပ်စီးတွေကနွယ်တွေလိုခွေရစ်နေတယ်လို့ ဆိုပါတယ်။ မိုးရာသီဆိုတော့ လျှပ်စီးလက်တယ်လို့ ဆိုချင်တာပါ။ မိလ္လာချပ်ဆင်ငွေမင်မှောင်ပြာတဲ့။ မိလ္လာက ပါဠိစကားလုံးပါ။ အဓိပ္ပာယ် ၃ မျိုးရပါတယ်။ ပထမတမျိုးက ညိုမှိုင်းတဲ့ အရောင်လို့ အဓိပ္ပာယ်ရပါတယ်။ တိမ်ညိုမိလ္လာ၊ တိမ်စူကာနဲ့ တိမ်ပြာရောယှက်၊ မရမ်းဖက်၍၊ တိမ်သက်တံရောင်၊ အဝါဘောင်ဝယ်ဆိုတဲ့ မိုးတိမ်အဖွဲ့အနွဲ့ထဲမှာပါတဲ့ မိလ္လာဟာ ညိုမှိုင်းတဲ့အရောင်ကို ပြောတာပါ။ နောက်ထပ် အဓိပ္ပာယ်တမျိုးက ငွေတဆ၊ ကြေးနီတဆ၊ ခဲနှစ်ဆရောစပ်ထားတဲ့ သတ္တုရောလို့ အဓိပ္ပာယ်ရပါတယ်။ မိလ္လာရဲ့ နောက်ဆုံး အဓိပ္ပာယ်ကတော့ အားလုံးသိပြီးဖြစ်တဲ့ မစင်ဖြစ်ပါတယ်။ ရွံစရာကြီးနော်။ ဒီသီချင်းမှာ ပြောတာက ဒါတော့ မဟုတ်လောက်ပါဘူး။ ဒီသီချင်းမှာပြောတာက အညိုမှိုင်းရောင်ကို ပြောချင်တာပါ။ အညိုရောင် အချပ်တွေဆင်ထားတယ်၊ ငွေမင်အနားရှိတယ်၊ မှောင်ပြာနေတယ်ဆိုတော့ တိမ်တွေကိုပြောချင်တာပဲ ဖြစ်ပါလိမ့်မယ်။ ဆက်ပြီးတော့လည်း ပြောထားပါတယ်။ တိမ်တိုက်ရွှေ့ပြောင်းလေလျဉ်လောင်းရာတဲ့။ လေတိုက်လို့ရွေ့လျားနေတဲ့တိမ်တွေကို ပြောတာပါ။ ယုဂန်တောင်ခါးပန်းမှာ တိမ်တွေကညိုမည်းနေပြီး လျှပ်စီးတွေလည်းလက်နေတဲ့ နွေနှောင်းမိုးဦးကာလဖြစ်ပါတယ်။

သီချင်း ကြွေကာကြွေကာ မြေမှာကြဲလျက်၊ ပုလဲရည်ငွေစက်၊ ဖြန်းပက်စွေရွာ၊ မြူမှုန်လိမ်းကျံတဲ့၊ ညှိုးပျောင်းရွက်ညှာ၊ ညိုရောင်ရော်ဝါ.....

ကြွေကာကြွေကာ မြေမှာကြဲလျှက်ဆိုတာကတော့ ရှင်းပါတယ်လေ။ မိုးပေါ်ကနေကြွေပြီး မြေပေါ်မှာ ပြန့်ကြဲနေတာပေါ့။ အဲသလိုပြန့်ကြဲနေတာတွေက ဘာတွေလဲဆိုတော့ ပုလဲရည်ငွေစက် ဖြန်းပက်စွေရွာတဲ့။ ပုလဲရည်၊ ငွေရည်တွေက စွေရွာနေတယ်ဆိုတော့ ဒါဟာ မိုးစက်တွေကျနေတာ၊ မိုးရွာနေတာကို ပြောတာပါပဲ။

အဲဒီမိုးစက်တွေဟာ ဘယ်ပေါ်မှာကျနေတာလဲဆိုတော့ နွေနှောင်းရာသီမှထတတ်တဲ့ မြူမှုန်တွေနဲ့ လိမ်းကျံထားတဲ့ သစ်ရွက်တွေပေါ်မှာပါ။ ညှိုးပျောင်းရွက်ညှာ ရွှေရောင်ရော်ဝါတဲ့။ အခုအထိ ဖွဲ့သွားသမျှအဖွဲ့တွေက သိပ်ပြီး ကျစ်လျစ်ပါတယ်။ စကားလုံးတလုံးချင်းစီမှာ အဓိပ္ပာယ် အပြည့်နဲ့ပါ။ စကားပြေထက် ကဗျာဆန်တဲ့အဖွဲ့တွေပါ။ နတ်သျှင်နောင်ရဲ့ အင်မတန်ကျစ်လျစ်နုရွတဲ့ ရတုအဖွဲ့တွေကနေ ဆင်းသက်ဆင့်ပွားလာတယ်ဆိုတာ အလွန်ကို ထင်ရှားပါတယ်။ ညှိုးဆိုတဲ့စကားလုံးက သစ်ရွက်တွေညှိုးနေတာကို ပြောပါတယ်။ ပျောင်းက ပစောက်ကိုယပင့်နဲ့ ပျောင်းတဲ့ပျောင်းပါ။ ပျော့ပျောင်းကလာပါတယ်။ ညှိုးပြီးပျော့နေတယ်လို့ ဆိုချင်ပါတယ်။ ရွက်ညှာတွေကညှိုးပြီးပျော့နေတယ်။ ရွှေရောင်ရော်ဝါတဲ့။ ရော်ဆိုတာကလည်း ညှိုးတာခြောက်တာပါပဲ။ အရောင်ဖြူဖျော့သွားတယ်ဆိုတဲ့ အဓိပ္ပာယ်လည်း ရပါတယ်။ ညှိုးရော်တယ်တို့ ဖြူဖတ်ဖြူရော်တို့ဆိုတဲ့ အသုံးတွေကို သတိပြုကြည့်နိုင်ပါတယ်။ ဒီနေရာမှာတော့ ညှိုးတာကို ဆိုလိုတာပါ။ ရွှေရောင်သမ်းနေတဲ့ ရွက်ခြောက်တွေလို့ပြောတာဖြစ်ပါတယ်။ သစ်ရွက်တွေအကြောင်းကိုပဲ ဆက်ပြောပါတယ်။

သီချင်း သန္တာလိုမြညိုရောကာ၊ ကြွေလျောကုန်လု၊ ပုရစ်နုညှာချီ၊ နှောင်းနွေသန်လု၊ စက်ရာသီမှာ၊ လေယူဆောင်နှင်း၊ မြေဆီမြေသင်းနံ့သာ......

သန္တာလိုမြညိုရောကာတဲ့။ သန္တာဆိုတာက အနီနဲ့အဝါရောင် ရောထားတဲ့အရောင်ပါ။ အနီရောင်ဘက်ကို ပိုများပါတယ်။ လိမ္မော်ရောင်လောက်မဝါပါဘူး။ အဲသလိုနီဝါရောင်ထဲမှာ မြညိုရောထားပါတယ်တဲ့။ နီဝါရောင်နဲ့ စိမ်းညို့ရောင်ရောနေပါတယ်။ ကြွေလျောကုန်လုတဲ့။ ရွက်ခြောက်တွေကြွေထားတာ ကုန်တောင် ကုန်လုပါပြီတဲ့။ ပုရစ်နုညှာချီ၊ နှောင်းနွေသန်လု စက်ရာသီမှာတဲ့။ ပုရစ်နုဆိုတာ ရွက်နုရွက်ဖူးလေးတွေကိုပြောတာပါ။ ပုရစ်နုလေးတွေအညှာလေးတွေချီနေပြီတဲ့။ ရွက်ဝါတွေကုန်တော့ ရွက်သစ်တွေတောင် ထွက်နေပါပြီ။ နှောင်းနွေသန်လု စက်ရာသီဆိုတဲ့ စကားလုံးကတော့ တိုတိုကျစ်ကျစ်နဲ့ တော်တော်ထိမိပါတယ်။ နှောင်းနွေဆိုတာက နွေရာသီနှောင်းပြီလို့ ပြောတာပါ။ သန်လုဆိုတာက ဝဿန်မိုးရာသီဘက်လုနေပြီလို့ ပြောတာပါ။ နွေရာသီကုန်ခါနီးလို့ မိုးရာသီဘက်စွန်းနေပါပြီလို့ ရှည်ရှည်လျားလျားပြောမယ့်အစားမှာ နှောင်းနွေသန်လုလို့ စကားလုံးလေးလုံးတည်းနဲ့ ပြောသွားပါတယ်။ စက်ရာသီဆိုတာကတော့ အားလုံးသိကြတဲ့အတိုင်း နွေရာသီ၊ မိုးရာသီ၊ ဆောင်းရာသီတွေဟာ တခုပြီးတခု တလှည့်စီလှည့်ကာပတ်ကာရောက်နေကြတာဟာ စက်ဝိုင်းတခုလိုဖြစ်နေပါတယ်။ ရာသီစက်ဝိုင်းကို စက်ရာသီလို့ ပြောတယ်လို့ ထင်ပါတယ်။ လေထဲမှာတော့ မြေဆီမြေသင်းတွေရဲ့ အနံ့တွေသင်းပျံ့နေပါတယ်။ မိုးဦးကာလဆိုတော့ မြေငွေ့ပျံပြီး မြေနံ့ရတဲ့သဘောဖြစ်ပါလိမ့်မယ်။

သီချင်း စိန်ခြူးအုံကြွ ၊ ကြာညောင်သဥ္ဇာ၊ ပန်းကြဲတဲ့ဖဲစက်ရာမှာ၊ မယ့်ကိုယ်စားမွှေးမြလေသလား၊ ထင်မြင်ယောင်တွေးမိမှားကာ၊ အသည်းအူချာ၊ ကြေအောင်ဖန်လာ၊ သက်လျာဓာတုရယ် မြင်လှည့်ပါ။

စိန်ခြူးအုံကြွကြာညောင်သဉ္ဇာတဲ့။ စိန်တွေ၊ ခြူးပန်တွေ၊ ကြာရွက်တွေ၊ ညောင်ရွက်တွေရှိတဲ့ သဥ္ဇာဆိုတဲ့ အိပ်ခန်းထဲမှာလို့ ပြောထားပါတယ်။ အဲဒီအိပ်ခန်းထဲမှာ ဘာရှိသလဲဆိုတော့ ပန်းကြဲတဲ့ဖဲစက်ရာရှိပါတယ်။ စက်ရာဆိုတာကတော့ အိပ်ရာပါပဲ။ အိပ်စက်ဆိုတဲ့ အိပ်တယ်လို့ အဓိပ္ပာယ်ရတဲ့စကားလုံးနှစ်လုံးအနက်မှာ အိပ်ကိုယူပြီး အိပ်ရာလို့ သုံးမယ့်အစားမှာ စက်ကိုယူပြီးစက်ရာလို့ သုံးထားတာဟာ အဓိပ္ပာယ်အားဖြင့်တော့ အတူတူပဲ ဖြစ်ပါတယ်။ ဖဲစက်ရာဆိုတော့ ဖဲသားနဲ့လုပ်တဲ့ အိပ်ရာပေါ့ခင်ဗျာ။ အဲဒီအိပ်ရာပေါ်မှာပန်းတွေကြဲထားပါသတဲ့။ ပန်းအစစ်တွေပဲကြဲထားသလား။ ဖဲသားပေါ်မှာပန်းပွင့်တွေထိုးထားတာများလားပေါ့လေ။ စဉ်းစားစရာပါ။ ဒါပေမယ့် ဆက်ဆိုထားတာက မယ့်ကိုယ်စားမွှေးမြလေသလားတဲ့။ ချစ်သူမိန်းကလေးရဲ့ကိုယ်စားပန်းတွေကမွှေးနေတာလားလို့ ဆိုထားလေတော့ ပန်းအစစ်ကို ပြောချင်တာဖြစ်ပုံရပါတယ်။

ထင်မြင်ယောင်တွေးမိမှားကာသက်လျာဓါတုရယ်မြင်လှည့်ပါတဲ့။ သီချင်းအဆုံးကျမှပဲ အော်... နွေနှောင်းမိုးဦးကာလမှာ နတ်သျှင်နောင်နဲ့ ဓါတုကလျာကိုလွမ်းနေတာပါလားလို့ သိလိုက်ရပါတယ်။ တော်တော်ထူးတဲ့သီချင်းပါ။ သီချင်းထဲမှာပါတဲ့ စကားလုံးလေးတလုံးစီတလုံးစီဟာ ပုလဲလုံးလေးတွေ သီကုံးထားသလိုပါပဲ။ တလုံးစီကိုက ပြောင်းမရပြင်မရလောက်အောင် အင်မတန်အဖိုးတန်လှပါတယ်။ ဒီ့ထက်ထူးတာတချက်ရှိပါတယ်။ ဒီသီချင်းဟာ လူကြိုက်များထင်ရှားတဲ့သီချင်းတပုဒ်ဖြစ်ပေမယ့် အဲဒီထူးခြားချက်တခုအကြောင်းကိုတော့ ပြောသံမကြားဖူးပါဘူး။ အဲဒီထူးခြားချက်ကဘာလဲဆိုတော့ သီချင်း အစအဆုံးအထိ ဒီသီချင်းဟာ ဝါကျတကြောင်းတည်းပဲရှိပါတယ်ခင်ဗျာ။