ပိတ်ဆို့ အရေးယူမှု အပေါ် ကဒါဖီ သား စိုးရိမ် ပူပန်

  • 28 ဖေဖော်ဝါရီ 2011
ဓာတ်ပုံ မူပိုင် Getty
Image caption နယ်စပ်ကို ထွက်ပြေးလာကြတဲ့ ဒုက္ခသည်တွေ

လစ်ဗျား နိုင်ငံက မငြိမ်မသက်မှုတွေကြောင့် လစ်ဗျားနဲ့ တူနီးရှား နယ်စပ်ကို လူတွေ အများအပြား ဆက်လက်ထွက်ပြေးလာနေပြီး နိုင်ငံတကာက လူမှု ကယ်ဆယ်ရေး လုပ်ငန်းတွေ တိုးမြှင့် လုပ်ဆောင်နေရပါတယ်။

ပိတ်မိနေကြတဲ့ ဒုက္ခသည်ပေါင်း သုံးသောင်းလောက်ရှိပြီး အများစုဟာ အီဂျစ် လူမျိုးတွေ ဖြစ်ပါတယ်။

တနင်္ဂနွေနေ့ တနေ့တည်းမှာတင် နယ်စပ်ကနေ ထွက်ပြေးလာသူပေါင်း တသောင်းနှစ်ထောင်လောက် ရှိတယ်လို့ ဘီဘီစီ သတင်းထောက် တယောက်က ဆိုပါတယ်။

သူ့အဆိုအရ ထွက်ပြေးလာသူတွေ ရပ်သွားမယ့် အရိပ်အယောင် မမြင်ရဘဲ ၊ နယ်စပ်မှာ အိမ်သာအလုံအလောက် မရှိတာကြောင့် သန့်ရှင်းရေး အခြေအနေ ဆိုးရွား လာနေသလို တူနီးရှား အစိုးရကလည်း သူ့ဖာသာသူ နိုင်ငံရေး အကြပ်အတည်း ရင်ဆိုင် နေရတာကြောင့်အ ခုလို ဖြစ်ပေါ်နေတဲ့ အခက်အခဲ တွေကို ဖြေရှင်းဖို့ မလွယ်လှဘူးလို့ ပြောပါတယ်။

တနင်္ဂနွေနေ့တုန်းကတော့ လစ်ဗျားက နိုင်ငံခြား အလုပ်သမားတွေကို လေယာဉ်ခရီးစဉ် ၁ရကြိမ်လောက် ပျံသန်းပြီး ထောင်သောင်းချီတဲ့ သူတွေကို အီဂျစ်နိုင်ငံဖက်ဆီ ကယ်ထုတ်ခဲ့ရသလို နိုင်ငံတကာ အဖွဲ့တွေကလည်း ကူညီ ကယ်ဆယ်ရေး လုပ်ငန်းတွေ အရှိန်မြှင့် လုပ်ဆောင်နေတယ်လို့ သိရပါတယ်။

ဒီနေ့ တနင်္လာနေ့မှာလည်း နောက်ထပ် လေကြောင်း ရေကြောင်းကနေ ကူညီ ကယ်ထုတ်ရေးတွေ လုပ်ဆောင်ဖို့ စီစဉ်ထားတယ်လို့ ဆိုပါတယ်။

ဓာတ်ပုံ မူပိုင် AFP
Image caption လုံခြုံရေး ကောင်စီက လစ်ဗျားကို အရေးယူပြီ

ကုလသမဂ္ဂ လုံခြုံရေး ကောင်စီက လစ်ဗျားခေါင်းဆောင် ကဒါဖီနဲ့ မိသားစုရဲ့ ခရီးသွားလာမှုတွေကို ပိတ်ဆို့ အရေးယူလိုက်တဲ့အပေါ် ဗိုလ်မှူးကြီး ကဒါဖီ ရဲ့ သားတယောက်က စိုးရိမ်ပူပန်ကြောင်း ထုတ်ပြောခဲ့ပါတယ်။

သူ့ဘဝရဲ့အ ချိန်တော်တော်များကို ခရီးသွားလာမှုနဲ့ အချိန်ဖြုန်းတာကြောင့် အခု အရေးယူမှုအပေါ် ရှေ့နေတယောက်ဌားပြီး ဆက်လက် ရင်ဆိုင် ဖြေရှင်းသွားမယ်လို့

ကဒါဖီရဲ့ တတိယသား ၊ အရင်တုန်းက ဘောလုံးကစားသမား Saadi Gadaffi က ပြောပါတယ်။

ဓာတ်ပုံ မူပိုင် AFP
Image caption ကဒါဖီရဲ့ တတိယသား Saadi Gaddafi

လက်ရှိ လစ်ဗျားရဲ့ မငြိမ်မသက်မှု တွေဟာ ဒေသတွင်းမှာ ငလျင်လှုပ်သလိုဘဲ အဲဒီ နာမကျန်း ဖျားနာမှုက နေရာ အားလုံးကို ပြန့်နှံ့ ကူးစက် သွားလိမ့်မယ်လို့ သူက ဆိုပြီး အကယ်၍များ သူ့အဖေ ကဒါဖီသား လစ်ဗျားက ထွက်သွားရင် တနာရီ အတွင်း ပြည်တွင်းစစ် ဖြစ်လိမ့်မယ်လို့ သူက ကြိမ်းဝါး ပြောဆိုလိုက်ပါတယ်။

လစ်ဗျား ခေါင်းဆောင် ကဒါဖီနဲ့ သူ့မိသားစုဝင်တွေရဲ့ ပိုင်ဆိုင်မှုအားလုံးကို ဗြိတိန် အစိုးရက ထိန်းချုပ်လိုက်ပါပြီ။

စနေနေ့တုန်းက ကုလသမဂ္ဂ လုံခြုံရေး ကောင်စီမှာ လစ်ဗျားကို အရေးယူဖို့ တညီတညွတ်တည်း အတည်ပြုခဲ့ပြီးတဲ့နောက် အဲဒီဆုံးဖြတ်ချက်အရ ဗြိတိသျှ အစိုးရက အခုလို ဆောင်ရွက်ခဲ့တာပါ။

ကဒါဖီရဲ့ သားသမီးတွေပိုင်ဆိုင်မှုကို အတိအကျ မသိရပေမယ့် ဒေါ်လာသန်း ရာပေါင်းများစွာ ရှိလိမ့်မယ်လို့ ယူဆရပါတယ်။

အမေရိကန် ပြည်ထောင်စုနဲ့ ဆွစ်ဇာလန်မှာလည်း အလားတူ ကဒါဖီ မိသားစုရဲ့ ပိုင်ဆိုင်မှုတွေ ထိန်းချုပ်ခဲ့ပြီး ဖြစ်ပါတယ်။

ဓာတ်ပုံ မူပိုင် Other
Image caption ဘန်ဂါဇီမြို့ကို အစိုးရ ဆန့်ကျင်သူတွေက ထိန်းချုပ်ထားပြီ

လစ်ဗျားနိုင်ငံ ဇဝိယာမြို့မှာ ရောက်နေတဲ့ ဘီဘီစီ သတင်းထောက် တယောက်ရဲ့ အပြောအရ အခုရက်ပိုင်းတွေ အတွင်း အစိုးရနဲ့ အတိုက်အခံ အဖွဲ့တွေကြား ရုန်းရင်းဆန်ခတ် ဖြစ်ခဲ့တယ်လို့ ဆိုပါတယ်။

ထရစ်ပိုလီမြို့ အနောက်ဖက် ကီလိုမီတာ ၅ဝ အကွာမှာရှိတဲ့ ဇဝိယာ မြို့ဟာ အစိုးရ ဆန့်ကျင်သူတွေ လက်ထဲ ရောက်သွားပြီ ဖြစ်ပေမယ့် ဗိုလ်မှူးကြီး ကဒါဖီကို သစ္စာခံတဲ့ အဖွဲ့တွေက သူတို့ကို ဝိုင်းထားဆဲ ဖြစ်တယ်လို့ သိရပါတယ်။

လက်နက်ကိုင်တွေ လက်ထဲမှာ တင့်ကားတစင်း ၊ လေယာဉ်ပစ် သေနတ်တွေ ၊ ဒုံးပျံတွေနဲ့ တခြားလက်နက်ငယ် အမြောက်အမြား ရထားတယ်လို့ ဘီဘီစီ သတင်းထောက်က ပြောပါတယ်။

ဒါပေမယ့် သူတို့ဟာ ပြင်းထန်တဲ့ ပစ်ခတ်တိုက်ခိုက်မှုတွေ ခံနေရပါတယ်။

သတင်းထောက်ဟာ ဇဝိယာမြို့ဆင်ခြေဖုံးက ကဒါဖီ ထောက်ခံရေး ဆန္ဒပြပွဲကိုလည်း တက်ရောက်ခဲ့ပြီး ဒေသခံတွေကြား နက်နက်ရှိုင်းရှိုင်း စိတ်ဝမ်းကွဲပြား နေတာ တွေ့ရတယ်လို့ ဆိုပါတယ်။