မျက်မမြင်တွေ အတွက် ဘာသာပြန် ဆော့ဝဲပေါ်လာ

  • 16 ဧပြီ 2011
aunglwinoo ဓာတ်ပုံ မူပိုင် bbc
Image caption ကိုအောင်လွင်ဦး

မျက်စိ မမြင်သူတွေရဲ့ လောကကို ချဲ့ထွင်လိုက်တယ်လို့ ဆိုနိုင်လောက်တဲ့ တီထွင်ဖန်တီးမှုတခုကို မြန်မာ မျက်မမြင် လူငယ်တဦးက တီထွင်လိုက်ပါတယ်။ အသက် ၃၁ နှစ် အရွယ်ရှိတဲ့ မြန်မာ လူငယ် တစ်ဦးက alo myanmar braille translator လို့ ခေါ်တဲ့ ဘာသာပြန် ဆော့ဖ်ဝဲ တမျိုးကို တီထွင်လိုက်တာဖြစ်ပါတယ်။

မျက်မမြင် ဘာသာ စကားနဲ့ ဇော်ဂျီစာလုံး ယူနီကုဒ် စာလုံးတွေ အကြားမှာ အပြန်အလှန် ဘာသာ ပြန်နိုင်မယ့် ပေါင်းကူး တံတားကို တည်ဆောက်ပေးခဲ့သူက ကိုအောင်လွင်ဦးဖြစ်ပါတယ်။ ကိုအောင်လွင်ဦးဟာ တတိယတန်း ကျောင်းသားဘဝက စပြီး အမြင် အာရုံ ချို့ယွင်းခဲ့ပါတယ်။ လေးတန်း ကျောင်းသား ဘဝကစပြီး အမြင်အာရုံ ကွယ်ပျောက် ခဲ့ပါတယ်။ ဒါပေမဲ့ သူဟာ အထက်တန်းပညာ အောင်မြင်တဲ့အထိ သင်ကြား နိုင်ခဲ့ရုံတင်မကဘဲ၊ ကွန်ပြူတာ ပရိုဂရမ် ရေးသားနိုင်တဲ့ အဆင့်အထိ ကျွမ်းကျင် တတ်မြောက်အောင် ထူးချွန်သူ တစ်ယောက် လည်း ဖြစ်ပါတယ်။ မျက်စိ မြင်သူတွေတောင် လူတိုင်း မတတ်မြောက် နိုင်ကြတဲ့ စီရှတ်လို ကွန်ပြူတာ ပရိုဂရမ် ဘာသာကို သင်ယူ တတ်မြောက်ပြီး မြန်မာစာ ကနေ မျက်မမြင ်ဘာသာ၊ မျက်မမြင် ဘာသာကနေ မြန်မာစာ ပြောင်းလဲနိုင်တဲ့ ကွန်ပြူတာ ဆော့ဖ်ဝဲကို တီထွင်ခဲ့ပါတယ်။

ဒီဆော့ဖ်ဝဲ တီထွင်လိုက်နိုင်တာဟာ မျက်စိ မမြင်သူတွေအတွက် ဘယ်လောက် အကျိုးရှိနိုင်ပါသလဲ။

မျက်မမြင် စာနဲ့ ရေးထားတဲ့ စာအုပ်တအုပ် ထွက်လာနိုင်ဖို့ သိပ်ခက်ခဲတယ် ဆိုတာကို ကိုအောင်လွင်ဦး ကသတိထားမိ ခဲ့ပါတယ်။ အဲသလို မျက်မမြင် စာနဲ့ ရေးထားတဲ့ စာအုပ်တအုပ် ထွက်လာဖို့ရာ သိပ်ခက်ခဲတဲ့ အတွက် မျက်မမြင်တွေ အနေနဲ့ ပညာရပ်တခု လေ့လာဖို့ရာ ဖတ်စရာ စာအုပ်စာတန်း အရေအတွက်ဟာ သိပ်နည်းနေပါတယ်။ တခြားသူ တွေရေးထားတဲ့ ဝတ္ထုစာအုပ်တွေ မဂ္ဂဇင်းတွေကို ဖတ်ခွင့်ရဖို့ အခွင့်အလမ်း မျိုးကလည်း နည်းနေပါတယ်။ ဒါ့ကြောင့် ကိုအောင်လွင်ဦးက ဘာသာပြန်တဲ့ ဆော့ဖ်ဝဲကို တီထွင်လိုက်တာဖြစ်ပါတယ်။

ဒီဆော့ဖ်ဝဲ တီထွင်ပြီးတဲ့ အခါမှာတော့ ဇော်ဂျီ ဒါမှမဟုတ် ယူနီကုဒ်နဲ့ ရေးထားတဲ့ စာအုပ် မှန်သမျှကို သူ့ဆော့ဖ်ဝဲ သုံးပြီး မျက်မမြင် ဘာသာ စကားနဲ့ ရေးထားတဲ့ စာအုပ်အဖြစ် ချက်ချင်း ပြောင်းလဲနိုင်ပြီ ဖြစ်ပါတယ်။

ဒါဟာ မျက်မမြင်တွေရဲ့ ကမ္ဘာကြီးကို ချဲ့ထွင်ပေးလိုက်နိုင်တာဖြစ်တယ်လို့ ဆိုရင် မှားမယ်မထင်ပါဘူး။

မျက်မမြင် စာဆို တာဟာ စက္ကူ ဒါမှမဟုတ် ကဒ်ပြားပေါ်မှာ အပေါက် ကလေးတွေ ဖောက်ထားပြီး အဲဒီ အပေါက် တွေကို လက်နဲ့ စမ်းသပ် ဖတ်ရှုတဲ့ စာဖြစ်ပါတယ်။

ဒီစာကို မျက်မမြင် တစ်ယောက် ဖတ်ရှုနိုင်ဖို့အတွက် မျက်မမြင် စာကို ပုံနှိပ်မယ့် သီးသန့် ပရင့်တာ တစ်လုံး လိုပါတယ်။ အဲဒီပရင့်တာကနေ ပုံနှိပ်မယ့် စာတွေကို မျက်မမြင် စာတတ်တဲ့ ပုဂ္ဂိုလ်တွေက ဖတ်ရှု နိုင်ကြမှာ ဖြစ်ပါတယ်။

ကွန်ပြူတာမှာ ဆော့ဖ်ဝဲတခု အတွက် ပရိုဂရမ် ရေးတယ် ဆိုတာဟာ အလွန် အသေးစိတ်တဲ့ အလုပ်တခု ဖြစ်ပါတယ်။ အစက် ကလေး တစက် ကော်မာလေး တခု ပိုသွားရင်တောင် မျက်စိ မြင်သူတွေတောင် မူးအောင် လိုက်ရှာပြီး ပြင်ရတာမျိုးပါ။ ဒီတော့ ကိုအောင်လွင်ဦး အနေနဲ့ ပရိုဂရမ် ဘယ်လို ရေးခဲ့သလဲလို့ မေးကြည့် ရာမှာတော့ အင်္ဂလိပ်စာ တတ်ကျွမ်းတဲ့ ကိုအောင်လွင်ဦး အတွက် ကွန်ပြူတာမှာ ပေါ်သမျှကို အသံနဲ့ ပြောပြပေးတဲ့ နိုင်ငံတကာ မျက်မမြင်တွေအတွက် တီထွင်ထားတဲ့ Jaws for windows ဆိုတဲ့ ဆော့ဖ်ဝဲ အသုံးပြုပြီး လေ့လာ ရေးသား ခဲ့တယ်လို့ ဆိုပါတယ်။

မျက်မမြင် ပုဂ္ဂိုလ်တွေ အတွက် မျက်မမြင်လူငယ် တစ်ဦး စွမ်းဆောင်လိုက်တဲ့ အံသြ ချီးမွမ်းဘွယ် စွမ်းဆောင်ချက် တစ်ချက်လို့ ဆိုရမှာဖြစ်ပါတယ်။