ကားလ်ဗင်ဆင် စစ်သင်္ဘော အုပ်စု မြောက်ကိုရီးယားဆီ တကယ် မသွား

  • 19 ဧပြီ 2017
Image caption ဆွန်းဒါး ရေလက်ကြားကို ဖြတ်ပြီး အိန္ဒိယ သမုဒ္ဒရာထဲကို ဝင်ရောက်

အမေရိကန် လေယာဉ်တင် သင်္ဘောကြီး အပါအဝင် စစ်သင်္ဘော အုပ်စုဟာ မြောက်ကိုရီးယား ရှိရာဆီ ခုတ်မောင်း နေတာ မဟုတ်ရုံမက၊ ဆန့်ကျင်ဘက် အရပ်ကို ဦးတည် သွားနေတာ ဖြစ်တယ် ဆိုတဲ့အချက် ပေါ်ထွက် လာပါတယ်။

ကားလ်ဗင်ဆင် လေယာဉ်တင် သင်္ဘောကြီး ဦးဆောင်တဲ့ တိုက်ခိုက်ရေး စစ်သင်္ဘော အုပ်စုဟာ မြောက်ကိုရီးယားရဲ့ နျူကလီယာ မျှော်မှန်းချက်နဲ့ ပတ်သက်ပြီး တင်းမာမှုတွေ မြင့်တက်နေတဲ့ ကိုရီးယားကျွန်းဆွယ်ဆီ သွားနေကြတယ် ဆိုပြီး အမေရိကန် ရေတပ်က ဧပြီ ၈ ရက် နေ့ တုန်းက ပြောဆို ခဲ့ပါတယ်။

သမ္မတ ထရမ့်ကလည်း သူ စစ်သင်္ဘော အုပ်စု စေလွှတ် ထားတယ် ဆိုပြီး ပြီးခဲ့တဲ့ သီတင်းပတ် တုန်းက ပြောဆို ထားပါတယ်။

ဒါပေမယ့် အခုအခါမှာတော့ အဲဒီ စစ်သင်္ဘောတွေ ဟာ အင်ဒိုနီးရှားရဲ့ ဂျဗားနဲ့ ဆူမတြား ကျွန်းစုတွေကြားက ဆွန်းဒါး ရေလက်ကြားကို ဖြတ်ပြီး အိန္ဒိယ သမုဒ္ဒရာထဲကို ဝင်ရောက် သွားတာကို တွေ့လာ ရပါတယ်။

အဲဒီ စစ်သင်္ဘော အုပ်စုဟာ ဧပြီ ၈ ရက်နေ့က စင်္ကာပူ ကနေ ထွက်ခွာ ခဲ့တာ ဖြစ်ပြီး၊ ဩစတြေးလျတိုက် အနောက်မြောက် ကမ်းလွန်ပြင်မှာ ကြိုတင် စီစဉ်ထားတဲ့ အတိုင်း ဩစတြေးလျ နိုင်ငံနဲ့ ပူးတွဲ စစ်ရေး လေ့ကျင့်မှု ပြုလုပ် ခဲ့ပေမယ့် ပါ့သ်မြို့ ဆပ်ကမ်းကို သွားမယ့် အစီအစီအစဉ်ကို ဖျက်လိုက်တယ် ဆိုပြီး ပစိဖိတ် ဒေသ ဆိုင်ရာ အမေရိကန် ရေတပ် ဌာနချုပ်က ထုတ်ပြန် ထားပါတယ်။

ကြေညာ ထားတဲ့ အတိုင်း ကိုရီးယား ကျွန်းဆွယ်ဆီကို မသွားတာဟာ မြောက်ကိုရီးယား အပေါ် ခြိမ်းခြောက်ရုံ သက်သက် ပြုလုပ်ခဲ့ပြီး တမင် ရည်ရွယ်ချက်နဲ့ စစ်သင်္ဘော အုပ်စုကို ခြေရာဖျောက်တာလား၊ အစီအစဉ်ပဲ ပြောင်းလိုက်တာလား၊ ဒါမှမဟုတ် သင်္ဘောအုပ်စုနဲ့ ဌာနချုပ် အကြား နားလည်မှု လွဲမှား နေတာလား ဆိုတာ ရှင်းရှင်းလင်းလင်း မသိရ သေးဘူးလို့ ကိုရီးယား ဆိုင်ရာ ဘီဘီစီ သတင်းထောက် စတီဗင် အီဗန်စ်က ဆိုပါတယ်။