IS ဖမ်းထားတဲ့ တူရကီ ဓားစာခံတွေ ပြန်လွတ်

  • 20 စက်တင်ဘာ 2014
Turkish hostages ဓာတ်ပုံ မူပိုင်
Image caption ပြန်လွတ်လာသူတွေကို ဝန်ကြီးချုပ် ကြိုဆို

အစ္စလာမ်မစ်နိုင်ငံ အကြမ်းဖက်အဖွဲ့ အိုင်အက်စ်က သုံးလကြာ ဖမ်းထားတဲ့ တူရကီ သံတမန်၊ စစ်သားနဲ့ ကလေးတွေပါတဲ့ ၄၉ ယောက်အဖွဲ့ ပြန်လွတ်လာပြီ ဖြစ်ပါတယ်။

တူရကီ မြို့တော် အင်ကာရာမှာတော့ လူထုက အလံတွေ ဝှေ့ရမ်းပြီး လွတ်လာသူတွေကို ကြိုဆိုခဲ့ပါတယ်။

သူတို့ကို ဇွန်လတုန်းက အိုင်အက်စ်အဖွဲ့က အီရတ်မြောက်ပိုင်းက မိုဆူးလ်မြို့ကို ဝင်စီးတုန်းမှာ တူရကီ ကောင်စစ်ဝန်ရုံးကနေ ဖမ်းခေါ်သွားတာ ဖြစ်ပါတယ်။

တူရကီ ဝန်ကြီးချုပ် Ahmet Davutoglu က တူရကီ ထောက်လှမ်းရေး အဖွဲ့က ဓားစာခံတွေကို ပြန်ခေါ်ခဲ့တာလို့ပဲ ပြောပါတယ်၊ တခြားအချက် အသေးစိတ်ကို ထုတ်မပြောပါဘူး။

အမေရိကန်မဟာမိတ်ထဲ ပါဖို့ နောက်တွန့်

အခုလို သူတို့နိုင်ငံသား ဓားစာခံတွေ ရှိနေတဲ့ အတွက် အမေရိကန်ဦးဆောင်တဲ့ အိုင်အက်စ်နှိမ်နင်းရေး မဟာမိတ် အဖွဲ့ထဲ ပါဖို့ တူရကီက နည်းနည်း တုံ့ဆိုင်းနေတာ ဖြစ်တယ်လို့ ဘီဘီစီ သတင်းထောက်က ပြောပါတယ်။

တူရကီဟာ နေတိုးစစ်မဟာမိတ် အဖွဲ့မှာ ဒုတိယအကြီးဆုံး စစ်တပ်ရှိပြီး အမေရိကန်လေတပ် အခြေစိုက် စခန်းလည်း ရှိခဲ့ပါတယ်။ တကယ်လို့ အိုင်အက်စ်တွေကို တက်တက်ကြွကြွ ပါဝင်ဆန့်ကျင်ရင် သူ့နိုင်ငံသား ဓားစာခံ ၄၉ ယောက် လက်တုန့်ပြန်ခံရမှာ စိုးရိမ်ပါတယ်။ အခုတော့ ဓါးစာခံတွေ ပြန်လွတ်လာပြီ ဆိုတော့ သူ့ရပ်တည်ချက် ပြောင်းမလား ဆိုတာ မေးစရာရှိပါတယ်။

တကယ်တော့ တူရကီက အိုင်အက်စ်ကိုတိုက်ဖို့ စိတ်အားထက်သန်မှု သိပ်မရှိပါဘူး။ တူရကီအနေနဲ့ အီရတ်နဲ့ဆီးရီးယားတို့နဲ့ ရှည်လျားတဲ့ နယ်နိမိတ် ဆက်နေသလို သူ့နယ်ထဲမှာ စစ်သွေးကြွတွေကို စုဆောင်းတာလည်း ရှိနေပါတယ်။ ဒါ့အပြင် ဒေသတွင်းမှာ သူ့ရဲ့ ကြီးမားတဲ့ စီးပွားရေး အကျိုးအမြတ်တွေကို တိုက်မှာလည်း စိုးရွံ့ပါတယ်။

တချို့ တူရကီအစိုးရကို ဝေဖန်သူတွေကတော့ ဆီးရီးယားသမ္မတ အာဆတ်ကို ဆန့်ကျင်တဲ့ စစ်သွေးကြွတွေကို တူရကီက ထောက်ခံလို့ အခုလိုပြန်တိုက်ရေးမှာ မပါဖို့ ဆုံးဖြတ်တာလို့ မြင်သူတွေလည်း ရှိပါတယ်။ ဒီအချက်ကိုတော့ တူရကီအစိုးရက ငြင်းဆိုပါတယ်။

၂၀၀၃ ခုနှစ်တုန်းက အီရတ်ကို ဝင်တိုက်တဲ့ စစ်ပွဲမှာလည်း တူရကီက သူရဲ့ စစ်ရေး အခြေစိုက်စခန်းတွေကို အသုံးပြုခွင့် မပေးပါဘူး။ ဒါကြောင့် အနောက်နိုင်ငံတွေရဲ့ မဟာမိတ်ဖြစ်တဲ့ တူရကီဟာ ဘယ်သူ့ကို တိုက်မယ် ဆိုတာ ရွေးချယ်ဖို့ အလွန်သတိထားလေ့ ရှိတယ်လို့ အီစတန်ဘူလ်က ဘီဘီစီသတင်းထောက် မတ်လိုဝင်က သုံးသပ်ပါတယ်။