ဆီးရီးယား ငြိမ်းချမ်းရေး စကားပြောပွဲ ရပ်ဆိုင်း

  • 3 ဖေဖော်ဝါရီ 2016
comments_syria_talks_ ဓာတ်ပုံ မူပိုင် Getty
Image caption ဖေဖေါ်ဝါရီ ၂၅ ရက်နေ့ စကားပြောပွဲ တွေ ပြန်လည် မစတင် ခင် ကြိုတင် ပြင်ဆင် ပြုလုပ်ရမှာ တွေ ရှိနေတယ်။

ဆီးရီးယား ပြည်တွင်းစစ် အဆုံးသတ်နိုင်ရေး အတွက် ရည်ရွယ် ပြုလုပ်နေတဲ့ စကားပြောပွဲ တွေကို ခေတ္တ ရပ်နားမယ် လို့ ကုလသမဂ္ဂ က ပြောပါတယ်။

အခုလို ရပ်နားရ တဲ့ အတွက် ဂျနီဗာ စကားပြောပွဲ မအောင်မမြင် ဖြစ်သွားပြီ လို့တော့ အဓိပ္ပာယ် မသက်ရောက်ဘူး ဆိုပြီး ဆီးရီးယား ဆိုင်ရာ ကုလသမဂ္ဂ ရဲ့ အထူး ကိုယ်စားလှယ် စတယ်ဖန် ဒီ မစ္စတူရာ က ပြောပါတယ်။

ဒါပေမယ့် ဖေဖေါ်ဝါရီ ၂၅ ရက်နေ့ စကားပြောပွဲ တွေ ပြန်လည် မစတင် ခင် ကြိုတင် ပြင်ဆင် ပြုလုပ်ရမှာ တွေ ရှိနေတယ် လို့တော့ မစ္စတာ ဒီမစ္စတူရာ က ဆိုပါတယ်။

ဆီးရီးယား အစိုးရနဲ့ သူတို့ရဲ့ မဟာမိတ် ရုရှား တို့ရဲ့ လေကြောင်းက ဗုံးကြဲ တိုက်ခိုက် မှု တွေ မရပ်မတန့် မခြင်း အစိုးရ ကိုယ်စားလှယ် တွေနဲ့ ညှိနှိုင်းမှု တွေ မပြုလုပ် နိုင်ဘူး ဆိုပြီး ဆီးရီးယား အတိုက်အခံ ညွန့်ပေါင်း အဖွဲ့ က ပြောထား ပါတယ်။

ဒါ့အပြင် ဆီးရီးယား သူပုန်တွေ ထိန်းချုပ်ရာ နယ်မြေတွေကို အစိုးရနဲ့ အစိုးရ ကို လိုလားတဲ့ လက်နက်ကိုင် အဖွဲ့တွေ ပိတ်ဆို့ ထားတာ ကိုလည်း ရုတ်သိမ်း ပေးရမယ် လို့လည်း တောင်းဆို ထားပါတယ်။

ဂျနီဗာမြို့ ဆွေးနွေးပွဲ တွေ ရှေ့ဆက်နိုင်ဖို့ မစ္စတာ ဒီမစ္စတူရာ ကြိုးစား နေတဲ့ အခု ရက်တွေ မှာ သူပုန် တွေဘက်က တောင်းဆို ထားတာ တွေ ကို ဆီးရီးယား အစိုးရ ဘက်က တစ်ခုမှ မလိုက်လျော ခဲ့ပါဘူး။

အခုလို ဂျနီဗာ ဆွေးနွေးပွဲ မရပ်တန့်သေးခင် နာရီ အနည်းငယ် ကပဲ သမ္မတ အယ်လ် အာဆတ်ရဲ့ တပ်တွေဟာ နိုင်ငံရဲ့ မြောက်ပိုင်းမှာ ထိုးစစ် အသစ်တွေ ပြုလုပ် ခဲ့ပါတယ်။

အလက်ပ်ပို ဒေသထဲ သူပုန်တွေ ၃ နှစ်တာ ဝိုင်းဝန်း ပိတ်ဆို့ တာ ခံနေရတဲ့ မြို့ နှစ်မြို့ ဖြစ်တဲ့ နွတ်ဘဲလ် နဲ့ ဇဟရာ မြို့တွေ ရှိရာဆီ ထိုးဖောက် နိုင်ခဲ့တယ် လို့ အစိုးရ စစ်တပ် က ပြောပါတယ်။

ဒါ့ကြောင့် အလက်ပ်ပို မြို့တော် ဆီ ကိုသွားတဲ့ သူပုန် အုပ်စု တွေ ရဲ့ ထောက်ပံ့ရေး လမ်းကြောင်း တွေကို အစိုးရ စစ်တပ် က ခြိမ်းခြောက် နိုင်တဲ့ အနေအထား မျိုး ရရှိ လာပါတယ်။

အခုလို ဆီးရီးယား အစိုးရ စစ်တပ် က ထိုးစစ် ဆင် ခဲ့တာ မှာ ရုရှား က လေကြောင်း ပစ်ကူ တွေ အကြီးအကျယ် ပေးခဲ့ သလို၊ မြေပြင် မှာလည်း ရှီအာ လက်နက်ကိုင် အုပ်စု တွေ ဖြစ်တဲ့ လက်ဘနွန် အခြေစိုက် ဟစ်ဇ်ဘိုလာ တပ်ဖွဲ့ နဲ့ အီရန် ကျောထောက် နောက်ခံပြု လက်နက်ကိုင် တွေက ပူးပေါင်း ကူညီ ခဲ့ပါတယ်။

ဒီသတင်းနဲ့ပတ်သက်သမျှ