၆နှစ် အလုပ်မဆင်းတဲ့ စပိန်ဝန်ထမ်းကို ဒဏ်တပ်

  • 12 ဖေဖော်ဝါရီ 2016
ဓာတ်ပုံ မူပိုင် File Manuel Vazquez

စပိန် နိုင်ငံမှာ အနည်းဆုံး ၆ နှစ်ကြာ အလုပ်မဆင်းဘဲ ပျက်ကွက် နေခဲ့တဲ့ သက်ကြီး ဝန်ထမ်း တစ်ဦးကို သူ့ရဲ့ တစ်နှစ်စာ လစာဖြစ်တဲ့ ယူရိုငွေ ၂၇,၀၀၀ ဒဏ်တပ် လိုက်ပါတယ်။

၆၉ နှစ်အရွယ် Joaquin Garcia ဆိုသူဟာ စွန့်ပစ်ရေတွေ ကိုင်တွယ်တဲ့ အဆောက်အုံကို ကြီးကြပ်ရသူ ဖြစ်ပြီး၊ သူ့ကို လုပ်သက် ခံစားခွင့် ပေးရမယ့်အချိန် ရောက်တော့မှ သူ အလုပ်ပျက်ကွက် နေတာကို သတိထားမိကြတာ ဖြစ်ပါတယ်။

သူကတော့ အလုပ်ပျက်ကွက်တယ် ဆိုတဲ့ စွဲချက်ကို ငြင်းဆို ခဲ့သေးပေမယ့် အာဏာပိုင်တွေ ဘက်ကို တရားရုံးက အသာပေး လိုက်ပြီး သူ့ကို ဒဏ်တပ် ခဲ့တာ ဖြစ်ပါတယ်။

မစ္စတာ ဂါစီယာဟာ ဒေသ အာဏာပိုင်တွေက လည်ပတ်တဲ့ ရေ ကုမ္ပဏီ တစ်ခုရဲ့ ဝန်ထမ်း ဖြစ်ပြီး လစာ အဖြစ် တစ်နှစ်ကို အခွန်မနုတ်မီ ယူရို ၃၇,၀၀၀ ရပါတယ်။ သူ့ကို ဒဏ်တပ်တဲ့ ပမာဏက သူ့ရဲ့ တစ်နှစ်စာ အခွန်နုတ်ပြီး လစာငွေ ဖြစ်ပြီး အဲဒါဟာ ဥပဒေအရ အများဆုံး ဒဏ်တပ်နိုင်တဲ့ ပမာဏ ဖြစ်ပါတယ်။

ရုံးခန်းချင်း မျက်နှာချင်းဆိုင်က ရေကုမ္ပဏီရဲ့ အကြီးအကဲက သူ့ကို မတွေ့ရတာ နှစ်နဲ့ချီပြီ ဆိုတာကို တရားရုံးမှာ ထွက်ဆို ခဲ့ပါတယ်။

မစ္စတာ ဂါစီယာကို ဒေသ အာဏာပိုင်တွေက ကြီးကြပ်တယ်လို့ ရေကုမ္ပဏီက ထင်ခဲ့သလို၊ ဒေသ အာဏာပိုင်တွေ ကလည်း သူ့ကို ရေကုမ္ပဏီက ကြီးကြပ်တယ်လို့ ထင်ခဲ့ကြတာ ဖြစ်ပါတယ်။

ဒီသတင်းနဲ့ပတ်သက်သမျှ