ဆီးရီးယား စစ်ရာဇဝတ်မှု စွပ်စွဲချက် ရုရှား ငြင်းဆို

  • 16 ဖေဖော်ဝါရီ 2016
ဓာတ်ပုံ မူပိုင် EPA
Image caption ဆေးရုံတွေကို တမင် ရည်ရွယ် တိုက်ခိုက်ခဲ့တာလို့ MSF အဖွဲ့က ပြော။

ဆီးရီးယား ဆေးရုံတွေကို ရုရှားက ဗုံးကြဲ တိုက်ခိုက် ခဲ့တာဟာ စစ်ရာဇဝတ်မှု ကျူးလွန်ခဲ့တာ ဖြစ်တယ် ဆိုပြီး စွပ်စွဲ ပြောဆို နေမှုတွေကို ရုရှားက'အကြွင်းမဲ့ ငြင်းဆိုတယ်' လို့ ပြောလိုက်ပါတယ်။

ကရင်မလင် ပြောခွင့်ရသူ ဒမစ်ထရီ ပက်စ်ကော့ဗ်က 'အဲဒီလို စွပ်စွဲ ပြောဆိုသူတွေဟာ သက်သေ အထောက်အထား မပြနိုင်တဲ့ သူတွေပါပဲ' လို့ ပြောပါတယ်။

တနင်္လာနေ့က ဆီးရီးယား မြောက်ပိုင်း၊ သူပုန် နယ်မြေထဲက ဆေးရုံပေါင်း အနည်းဆုံး ၄ ရုံနဲ့ စာသင်ကျောင်း တစ်ကျောင်းကို ဒုံးကျည်တွေနဲ့ ပစ်ခတ် တိုက်ခိုက်ခဲ့လို့ လူ ၅၀ လောက်အထိ သေဆုံး ခဲ့ရတာ ဖြစ်ပါတယ်။

ကုလ သမဂ္ဂ ကတော့ အဲဒီလို ဆေးရုံတွေနဲ့ ဆေးအဖွဲ့တွေကို တမင် ရည်ရွယ် တိုက်ခိုက်တာဟာ စစ်ရာဇဝတ်မှု မြောက်တယ်လို့ ပြောပါတယ်။

အဲဒီ တိုက်ခိုက်မှုတွေ အတွက် ရုရှားမှာ တာဝန်ရှိတယ်လို့ တူရကီ အပါအဝင် တခြား နိုင်ငံတွေက စွပ်စွဲ ကြပါတယ်။

တစ်ချိန်တည်းမှာ တူရကီ အရာရှိ တစ်ဦးက ဆီးရီးယားမှာ မြေပြင် တိုက်ပွဲတွေ ပြုလုပ်မယ် ဆိုရင် တူရကီရဲ့ မိတ်ဆွေ နိုင်ငံတွေနဲ့ ပြုလုပ်မှသာ ထောက်ခံမယ်လို့ အင်္ဂါနေ့က ပြောပါတယ်။

ငါးနှစ်နီးပါး ကြာလာတဲ့ ဆီးရီးယား စစ်ပွဲတွေကြောင့် လူ နှစ်သိန်းခွဲကျော် သေဆုံးခဲ့ရပြီး ဖြစ်သလို၊ ၁၁ သန်းကျော် နေရပ် စွန့်ခွာ ခဲ့ကြရပြီး ဖြစ်ပါတယ်။

ဒီသတင်းနဲ့ပတ်သက်သမျှ