အငြင်းပွားကျွန်းပေါ် ဒုံးကျည်တွေ တရုတ် ချထား

  • 17 ဖေဖော်ဝါရီ 2016
ဓာတ်ပုံ မူပိုင် ImageSat International NV 2016
Image caption ဝူဒီကျွန်း ဂြိုဟ်တု ဓာတ်ပုံ နှိုင်းယှဉ်ချက်၊ ဖေဖော်ဝါရီ ၃ ရက် (ဝဲ) နဲ့ ဖေဖော်ဝါရီ ၁၄ ရက် (ယာ)

တောင်တရုတ် ပင်လယ်ထဲက ပိုင်ဆိုင်မှု အငြင်းပွားနေတဲ့ ကျွန်းစုတွေထဲက ကျွန်းတစ်ကျွန်း ပေါ်မှာ တရုတ်က မြေပြင်မှ ဝေဟင်ပစ် ဒုံးကျည်တွေကို ချထားတာ တွေ့ရတယ်လို့ ထိုင်ဝမ် ကာကွယ်ရေး ဝန်ကြီးဌာနက ပြောပါတယ်။

ဖောက်စ် သတင်းဌာနက ဖော်ပြသွားတဲ့ ဖေဖော်ဝါရီ ၁၄ ရက်က ရိုက်ထားတဲ့ ဂြိုဟ်တု ဓာတ်ပုံတွေအရ ဒုံးကျည် ပစ်စင် ၈ ခုပါ အုပ်စု ၂စုနဲ့ ရေဒါ စနစ် တစ်ခုကို ပါရာဆဲလ်စ် ကျွန်းစုထဲက ဝူဒီ ကျွန်းပေါ်မှာ တွေ့ကြရပါတယ်။

အခုလို ဒုံးကျည်တွေ ထားရှိမှုကြောင့် အငြင်းပွား ကျွန်းစုတွေနဲ့ ပတ်သက်ပြီး အကြိတ်အခဲ ဖြစ်နေတဲ့ တောင်တရုတ် ပင်လယ်မှာ တင်းမာမှုတွေကို ပိုဆိုး လာစေမှာ ဖြစ်ပါတယ်။

အဲဒီ ကျွန်းစုတွေ တဝိုက်က တောင်တရုတ် ပင်လယ်ဟာ တရုတ် အပါအဝင် အနီးအနား အာရှ နိုင်ငံတွေ အတွက် ပင်လယ် ရေကြောင်းလိုင်းနဲ့ သဘာဝ အရင်းအမြစ်တွေ အတွက် အဖိုးတန်တဲ့ ရေပြင် ဖြစ်ပါတယ်။

တရုတ် နိုင်ငံခြားရေး ဝန်ကြီး ဝမ်းယီကတော့ သူတို့ပိုင် နယ်မြေကို ခုခံဖို့အတွက် ကာကွယ်ရေး အစီအစဉ်တွေ လုပ်ဆောင်တာဟာ နိုင်ငံတကာ ဥပဒေနဲ့ ညီညွတ်တယ်လို့ ပြောပါတယ်။

အမေရိကန် ပစိဖိတ် ရေတပ် သင်္ဘောတွေရဲ့ တပ်မှူး ဖြစ်တဲ့ Adm Harry Harris ကတော့ ဒီကိစ္စဟာ တောင်တရုတ် ပင်လယ်မှာ စစ်ရေး ဆောင်ရွက်မှုတွေ ကင်းရှင်း စေရမယ်လို့ ပြောထားတဲ့ တရုတ် သမ္မတရဲ့ ကတိနဲ့ မကိုက်ညီဘူးလို့ ပြောပါတယ်။

ဒီသတင်းနဲ့ပတ်သက်သမျှ