ဖီဖာ ဥက္ကဌသစ် Gianni Infantino ကို ရွေးချယ်

  • 26 ဖေဖော်ဝါရီ 2016
fifa_infatino_presidente_ ဓာတ်ပုံ မူပိုင် Getty
Image caption ဖီဖာ ဥက္ကဌသစ် ဂျာနီ အင်ဖန်တီနို

ဖီဖာ ကမ္ဘာ့ ဘောလုံး အဖွဲ့ချုပ် ရဲ့ ဥက္ကဌ ရာထူး ကို မနေ့ ကတော့ ဇူးရစ် မြို့ မှာ ရွေးချယ် လိုက်နိုင် ပါပြီ။ သူကတော့ ဆွစ်ဇာလန် နိုင်ငံသား ဂျာနီ အင်ဖန်တီနို ဖြစ်ပါတယ်။ သူဟာ ဆွစ်ဇာလန် နိုင်ငံ မှ ရှေ့နေ တဦး ဖြစ်ပြီး အသက် ၄၅ နှစ် ပဲ ရှိပါသေးတယ်။ ဥက္ကဌ ရွေးချယ်ပွဲ ဟာ လည်း တကြိမ် နဲ့ နဲ့ လိုအပ်တဲ့ အနိုင်မဲ ၅၀ ရာခိုင်နှုန်း ကို မရ တဲ့ အတွက် နောက်တကြိမ် မဲထည့် ပြီးကာ မှ ဝင်ရောက် ယှဉ်ပြိုင်သူ ၅ ဦး အနက် ဂျာနီ အင်ဖန်တီနို ဟာ ၂၀၇ မဲ အနက် ၁၁၅ မဲ နဲ့ အနိုင်ရခဲ့တာပါ။

သူ့ရဲ့ အောင်မြင်မှု နဲ့ ပတ်သက်ပြီး ဂျာနီ အင်ဖန်တီနို က သတင်းစာ ရှင်းလင်းပွဲ မှာ ပြောရာမှာ ဖီဖာ နဲ့ ပတ်သက်လို့ ဂုဏ်ယူရ မဲ့ အဆင့် ပြန်ရောက် အောင် ကြိုးစား မယ့် အကြောင်း ဖီဖာ ဟာ ဘောလုံးလောက ကို ဘယ်လို မြှင့်တင် ပေးမယ် ဆိုတဲ့ အချက် ပေါ်မှာ ဂုဏ်ယူ ကြရတော့ မယ့် နေရာ မှာ ကဏ္ဍသစ် တရပ် ထဲ ဝင်လိုက် ကြတဲ့ အကြောင်း အခုကျင်းပ ပြီးစီးသွားတဲ့ ဖီဖာ ညီလာခံ ကနေ ပြုပြင် ပြောင်းလဲမှု အသစ်တွေ လည်း ချမှတ်နိုင်ခဲ့ ပြီမို့ ဒီပြုပြင်မှု တွေပေါ် မူတည်ပြီး ဖီဖာ ရဲ့ ပုံရိပ် နဲ့ ဂုဏ်သိက္ခာ ကို ပြန်ဆည်ပါ့မယ် လို့ ပြောသွားတာပါ။

ပြီးခဲ့တဲ့ နှစ်တွေ အတွင်းမှာ အမေရိကန်ပြည်ထောင်စု နဲ့ ဆွစ်ဇာလန် နိုင်ငံ တို့မှာ အစီရင်ခံစာ ပေါင်း ၁၃၀ ကို မူတည်ပြီး စုံစမ်းစစ်ဆေးမှု ပြုရာ မှ ဖီဖာ ရဲ့ အဖွဲ့တွင်း မှာ ထိပ်တန်း အရာရှိတွေ မသင်္ကာဖွယ် အဂတိ လိုက်စားမှု တွေ ပေါ်ပေါက် ခဲ့ တာပါ။

အထူးသဖြင့် ကမ္ဘာ့ ဖလားဗိုလ်လုပွဲ ကို အိမ်ရှင်နိုင်ငံ အဖြစ် လက်ခံ ကျင်းပ ခွင့် မဲခွဲ ဆုံးဖြတိကြရာမှာ ထိပ်တန်း အရာရှိတွေ က လာဘ်ငွေ ယူပြီး ဘက်လိုက် မဲပေး ရွေးချယ်ခဲ့တာ တွေ ဖြစ်ခဲ့ လို့ပါပဲ။ အဲဒီ အတွက် ၂၀၁၈ခု နှစ် အတွက် ရုရှ ကို ကမ္ဘာ့ ဖလားဗိုလ်လုပွဲ အိမ်ရှင် နိုင်ငံ အဖြစ် ရွေးခဲ့တာရယ်၊ ၂၀၂၂ ခု နှစ် အတွက် ကာတာ နိုင်ငံ ကို ရွေးခဲ့မှု တွေ နဲ့ ငြိစွန်းခဲ့ကြတာပါ။

ဒီအမှုတွေ နဲ့ ဖီဖာ ဥက္ကဌ ဟောင်း ဆက်ပ်ဘလက်တာ လည်း ရာထူးက ဖယ်ရှားခြင်းခံခဲ့ရတာပါ။ ဆက်ပ်ဘလက်တာ က လည်း ပြုပြင်ပြောင်းလဲရေး အစီအစဉ် ကို လက်ခံ လိုက်ကြတဲ့ အတွက် သူဝမ်းသာတဲ့ အကြောင်း ပြောပါတယ်။