25,000 o docynnau wedi eu harchebu

Shane Williams yn sgorio cais i Gymru Image copyright Getty Images
Image caption Shane Williams yn sgorio cais cyntaf Cymru

Mae'r cyfan o'r 25,000 o docynnau i wylio'r gêm rhwng Cymru a Ffrainc ar sgrîn fawr yn Stadiwm y Mileniwm wedi eu harchebu.

Nawr mae'r trefnwyr am ddarparu 20,000 yn fwy o leoedd ar gyfer yr achlysur ddydd Sadwrn.

Bydd y Stadiwm yn agor am 7.30am ar gyfer y gêm yn rownd gynderfynol Cwpan y Byd yn Seland Newydd.

Yn wreiddiol roedd y trefnwyr wedi cyfyngu'r nifer i 25,000 er mwyn sicrhau fod pawb yn gallu gweld y ddwy sgrîn.

Mae'r tocynnau ar gyfer yr achlysur yn rhad ac am ddim.

Erbyn hyn does dim modd cael tocynnau ar wefan Ticketmaster.

Mae modd archebu tocynnau yn y Stadiwm, Giât 3, tan 7pm nos Fawrth a rhwng 9am a 7pm ddydd Mercher.

"Mae'r gefnogaeth wedi bod yn anhygoel, " meddai Gerry Toms, rheolwr y Stadiwm.

"Byddwn yn agor y drysau am 7.30am ddydd Sadwrn a bydd yna 20,000 o docynnau ychwanegol ar gael.

Dywed y trefnwyr y dylai cefnogwyr wisgo coch ar ddiwrnod y gêm.

Bydd y gêm ddydd Sadwrn yn Auckland yn dechrau am 9:00am amser Cymru.

Dyma'r tro cyntaf i Gymru gyrraedd y rownd gynderfynol ers 24 o flynyddoedd.

Image copyright (C) British Broadcasting Corporation
Image caption Gorfoledd i dîm Cymru wedi iddyn nhw guro Iwerddon

Pe bai Cymru yn fuddugol fe fyddan nhw'n cyfarfod ag Awstralia neu Seland Newydd yn y rownd derfynol.

Fe wnaeth tîm Cymru sicrhau eu lle yn yr wyth olaf ar ôl buddugoliaeth o 22-10 yn erbyn Iwerddon yn Wellington dydd Sadwrn diwethaf.

Bydd Cymru yn cyhoeddi eu tîm ar gyfer y gêm yn erbyn Ffrainc ddydd Iau.

Mae Ffrainc eisoes wedi enwi eu tîm a does 'na ddim newid i'r 15 gychwynnodd y gêm yn erbyn Lloegr ddydd Sadwrn.