Fleetwood 1-4 Casnewydd

Clwb Pêl-droed Casnewydd Image copyright Other

Fe gafodd Justin Edinburgh ddechrau gwael i'w gyfnod fel rheolwr Casnewydd dros y penwythnos wrth golli yn erbyn Southport ar Barc Sbytty.

Fe gafodd ddechrau gwaeth i'r gêm yn erbyn Fleetwood nos Fawrth gyda Gareth Seddon yn rhoi'r tîm oedd yn drydydd yn y tabl ar ddechrau'r noson ar y blaen yn y funud gyntaf.

Ond mae Edinburgh eisoes wedi dechrau cael effaith ar ei dîm yn amlwg ac o fewn chwarter awr fe ddaeth Casnewydd yn gyfartal.

Roedd hi'n gôl ffodus efallai gyda golwr Fleetwood yn methu cadw'i afael ar ergyd wan Buchanan a Sam Foley wrth law i rwydo.

Roedd gwell i ddod i'r ymwelwyr. Fe roddodd y dyfarnwr gic o'r smotyn i Gasnewydd wedi 23 munud, a Danny Rose sgoriodd o'r smotyn.

Wedi 29 munud, ergyd gan Rose achosodd broblemau i amddiffyn Fleetwood a tro Foley oedd hi i sgorio gan roi Casnewydd 3-1 ar y blaen.

Wedi bron awr o chwarae, fe gafodd y triphwynt eu sicrhau oherwydd dau ddigwyddiad.

I ddechrau fe sgoriodd Foley unwaith eto i'w gwneud hi'n 4-1, gan sicrhau hat-tric yn y broses.

Yna fe gafodd sgoriwr Fleetwood, Gareth Seddon, ail gerdyn melyn a chael ei yrru o'r maes.

Tabl Uwchgynghrair Blue Square Bet

Gemau Gwahaniaeth Goliau Pwyntiau
1. WRECSAM 15 +14 32
2. Gateshead 15 +7 30
3. Fleetwood Town 15 +5 28
4. Efrog 15 +15 27
5. Luton 15 +12 27
-----------------------------------------------------------------------------------------
22. CASNEWYDD 15 -9 11
23. Alfreton 15 -19 10
24. Caerfaddon 15 -16 6