Gareth Bale 'wedi cael cyngor gwael'

Gareth Bale Image copyright Other
Image caption Gareth Bale yn gwisgo crys cefnogwyr pêl-droed tîm Prydain ar gyfer y Gemau Olympaidd yn Llundain 2012

Mae llefarydd ar ran cefnogwyr Cymru wedi dweud fod Gareth Bale "wedi cael cyngor gwael" cyn cael tynnu ei lun yn gwisgo crys tîm Prydain ar gyfer y Gemau Olympaidd.

Mae Vince Alm ymhlith y rhai sy'n credu y byddai cael tîm Prydain yn y Gemau yn tanseilio hunaniaeth Cymru, yr Alban a Gogledd Iwerddon o fewn y gamp.

Mae Bale wedi dweud y byddai'n hoffi cynrychioli Prydain, ac mae FIFA - corff rheoli pêl-droed y byd - wedi ceisio tawelu ofnau'r gwledydd.

Ond mae Cymdeithas Bêl-droed Cymru yn gwrthwynebu i'w chwaraewyr fod yn rhan o dîm Prydain yn y Gemau Olympaidd yn Llundain yn 2012.

Bydd dynion Prydain yn cystadlu am y tro cyntaf ers 1960, ac mae hyfforddwr dan-21 Lloegr, Stuart Pearce - wedi cael ei benodi'n hyfforddwr ar gyfer 2012.

'Mwyafrif yn erbyn'

Ond dywedodd Mr Alm - cadeirydd Ffederasiwn Cefnogwyr Pêl-droed Cymru - fod pryder ymysg nifer o gefnogwyr.

"Rwy'n credu fod Bale wedi cael cyngor gwael. Mae mwyafrif cefnogwyr Cymru yn erbyn y peth.

"Fedrwch chi gael Bwrdd Criced Cymru a Lloegr, fedrwch chi gael un tîm rygbi, ond mae pêl-droed yn hollol wahanol.

"Gallai hyn olygu diwedd y gwledydd cartre, ac rwy'n meddwl y byddai hynny'n drist.

"Rwy'n deall pam fod Gareth wedi gwneud hyn. Rydym yn Gymry ac yn Brydeinwyr. Ond y mater pwysig yw colli ein hunaniaeth genedlaethol.

"Rhaid i'r chwaraewyr fod yn ymwybodol o hyn os oes ganddyn nhw ddyheadau i chwarae i dîm Prydain. Mae angen dweud wrthyn nhw beth fydd y goblygiadau os bydd tîm Prydain."

Bydd Cymru'n wynebu Norwy mewn gêm gyfeillgar yn Stadiwm Dinas Caerdydd ar Dachwedd 12, ac mae disgwyl i Bale gael ei enwi yng ngharfan Gary Speed.

Er gwaetha'r dadlau, mae Mr Alm yn annog y ffyddloniaid i gefnogi Bale.

"Gadewch i ni beidio gelyniaethu'n hunain oddi wrth Gareth Bale," meddai.

"Y ffordd i ddelio gyda hyn yw trwy Gymdeithas Bêl-droed Cymru.

"Mae pwy bynnag fydd yn gwisgo'r crys coch ac yn chwarae dros ei wlad yn haeddu ein cefnogaeth.

"Mae'n chwaraewr o safon arbennig, ac rydym ei angen ar ei orau os yw Cymru am barhau i ddringo rhestr detholion y byd a chyrraedd rowndiau terfynol un o'r prif gystadlaethau."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.