Sebastien Loeb ar y blaen yng Nghymru

Sebastien Loeb ar Y Gogarth Image copyright AFP
Image caption Mae Sebastien Loeb yn gobeithio ennill ei wythfed pencampwriaeth

Sebastien Loeb sy'n arwain Rali Prydain yng Nghymru wedi'r diwrnod agoriadol.

Dyma ras olaf pencampwriaeth y byd a chyn belled a bod y Ffrancwr yn gorffen o flaen Mikko Hirvonen fo fydd yn ennill y bencampwriaeth.

Eiliad y tu ôl i Loeb yn y Citroën yw Hirvonen yn y Ford.

Petai Loeb yn ennill, fe fydd yn cipio'r goron am y wythfed tro.

Roedd y tri chymal cyntaf eleni yng ngogledd Cymru, y tro cyntaf i'r rali fod yn y gogledd ers sawl blwyddyn.

Llandudno a Chlocaenog oedd lleoliadau'r rasio ddydd Iau.

Doedd y ras ddim wedi bod ar Y Gogarth er 1981 nac yng Nghlocaenog er 1996.

Amodau

Roedd 'na ddechrau dramatig ar Y Gogarth wrth i Sebastien Ogier yn y Citroën gael damwain ar y gornel gynta mwy neu lai.

Bu'n rhaid iddo ymddeol o'r ras ond mae 'na bosibilrwydd y gallai ddechrau yn Llanfair-ym-Muallt ddydd Gwener.

Llwyddodd i ddatgymalu olwyn ar ei gar ar y gornel gyntaf.

Fe wnaeth Petter Solberg ddifrodi cefn ei Citroën wrth daro'r ochr y ffordd ond roedd yn llai o ddifrod nag yr oedd y gŵr o Norwy wedi ei dybio.

Mae rhai o'r gyrwyr wedi cwyno am yr amodau.

Yn benodol yr hyn sydd wedi ei ddweud yw bod y gyrwyr cyntaf i daclo coedwig Clocaenog wedi gwneud hynny yng ngolau dydd.

Yn fuan wedi'r trydydd neu bedwerydd car adael fe wnaeth y golau wanhau, y niwl yn codi a'r mwd yn cynyddu.

Roedd hyn yn ei gwneud hi'n anodd iawn i'r gweddill.

Roedd 77 o geir wedi dechrau'r rali ar Y Gogarth ac mae ganddyn nhw 350 o filltiroedd i'w gwneud cyn y byddan nhw'n gorffen y cyfan yng Nghaerdydd ddydd Sul.

Yn ystod y dydd daeth y newyddion bod y rali yn mynd i ddychwelyd i Gymru'r flwyddyn nesaf.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.