Shaun Edwards yn arwyddo cytundeb pedair blynedd

Shaun Edwards Image copyright Getty Images
Image caption Ymunodd Shaun Edwards gyda Chymru yn 2008

Mae Shaun Edwards wedi arwyddo cytundeb pedair blynedd arall fel hyfforddwr amddiffyn Cymru.

Daeth ei gytundeb gwreiddiol i ben ar ddiwedd cystadleuaeth Cwpan Y Byd.

Fe fydd nawr yn cydweithio gyda'r prif hyfforddwr, Warren Gatland, tan o leiaf cystadleuaeth Cwpan y Byd 2015.

Fe fydd hefyd yn rhan o system Academi Cenedlaethol Undeb Rygbi Cymru, gan weithio gyda'r timoedd dan 20, 18 ac 16.

O dan y cytundeb, fe fydd yn cael eu rhyddhau am un diwrnod yr wythnos i weithio gyda thîm o Uwchgynghrair Lloegr, heblaw yn ystod y tymor rhyngwladol.

Dywedodd Roger Lewis, prif weithredwr yr undeb: "Dwi wrth fy modd ein bod wedi cyrraedd cytundeb.

"Mae gennym dîm gwych o hyfforddwyr ac mae rôl Shaun fel hyfforddwr yr amddiffyn yn unigryw".

Dywedodd Edwards yr wythnos ddiwethaf ei fod yn barod i ystyried swydd hyfforddi gyda Lloegr wedi iddo adael clwb Wasps.

Ymunodd Edwards gyda Wasps yn 2001 fel hyfforddwr yr olwyr, ac yna daeth yn olynydd i Warren Gatland fel prif hyfforddwr yn 2005.

Yn ystod ei gyfnod gyda'r clwb, fe enillon nhw Uwchgynghrair Lloegr ar bedwar achlysur, a chodi Cwpan Heineken ddwywaith yn 2004 a 2007.

Daeth Edwards i gytundeb fis diwethaf i adael Wasps wedi deng mlynedd gyda'r clwb er mwyn chwilio am heriau newydd o fewn y gêm.

Er nad yw prif hyfforddwr Lloegr, Martin Johnson, wedi gwneud penderfyniad am ei ddyfodol, roedd y sibrydion yn cysylltu Edwards gyda swydd bosib yno yn cynyddu.

Ond nawr mae cyn chwaraewr rygbi 13 Prydain wedi ymrwymo i dîm cenedlaethol Cymru am bedair blynedd.

Straeon perthnasol