Pwll glo: Dyn yn yr ysbyty

Glofa Aberpergwm
Mae dros 230 o bobl yn gweithio yn Aberpergwm

Cafodd y Gwasanaeth Ambiwlans eu galw i lofa Aberpergwm yng Nghwm Nedd wedi i ddyn fynd yn gaeth dan ddaear.

Dywedodd y lolfa fod y ddamwain wedi digwydd tua 9.30am fore Gwener.

Cafodd y gweithiwr ei daro wrth iddo geisio atgyfnerthu rhan o do'r lofa.

Aed ag ef mewn hofrennydd i Ysbyty Treforys a'r gred yw ei fod wedi torri ei goes.

Dywedodd y Gwasanaeth Ambiwlans fod yr anafiadau yn rhai difrifol ond nad oedd ei fywyd mewn perygl.

Damwain

Dywedodd llefarydd ar ran y Gweithgor Iechyd a Diogelwch eu bod wedi cael gwybod ac y byddai arolygydd yn ymweld â'r safle ddydd Sadwrn.

"Mae ein hymholiadau ni'n rhai cychwynnol."

Dechrau'r mis cafodd tri o lowyr eu cludo i'r ysbyty wedi damwain yn yr un pwll yn Aberpergwm.

Roedd cwymp ryw dair neu bedair milltir o dan ddaear ac fe gafodd y dynion eu tynnu o'r pwll wrth ddefnyddio lifft arbennig.

Cafodd un o'r dynion anaf i'w gefn ac roedd y ddau arall yn diodde' o sioc.

Mae dros 230 o bobl yn gweithio yn y pwll.

Ym mis Medi bu farw tri o ddynion wedi damwain ym mhwll Y Gleision ger Pontardawe.