Gwragedd: 'Yr hunlle wrth aros'

Cronfa glowyr Image copyright (C) British Broadcasting Corporation
Image caption £75,000: Y cyfraniad mwya hyd yn hyn

Mae gwragedd dau löwr fu farw ym mhwll y Gleision wedi sôn am brofiad dirdynnol aros am wybodaeth ddiwrnod y ddamwain.

Ym mis Medi yn y pwll ger Pontardawe fe gafodd Phillip Hill, 45 oed, Garry Jenkins, 39 oed, David Powell, 50 oed, a Charles Breslin, 62 oed, eu lladd.

Roedd Mavis Breslin a Lynette Powell yng Nghwrs Rasio Ffos Las yng Nghwm Gwendraeth ddydd Llun wrth dderbyn siec o £75,000.

Hwn yw'r cyfraniad mwya at y gronfa a chlywodd y ddwy fod yr arian wedi ei godi o fewn dau ddiwrnod ynghynt yn y mis.

Dywedodd Mrs Breslin fod y swm a godwyd yn y cwrs rasio'n "anhygoel".

"Mae'n ddigon i godi calon rhywun."

'Ddim yn sylweddoli'

Dywedodd Lynette Powell: "Ar ôl profedigaeth fel hyn chi ddim yn sylweddoli'n llwyr ba mor garedig mae pobol wedi bod.

"A dweud y gwir, mae pawb wedi bod yn wych.

"Achos y drychineb chi ddim yn meddwl am y dyfodol."

Dywedodd nad oedd wedi cael amser i alaru eto am fod y gefnogaeth wedi bod yn "ffantastig".

"Mae'n amhosib dod i delere â hyn i gyd."

Dywedodd chwaer Garry Jenkins, Leanne Walters: "Mae'n agoriad llygad, beth y'n ni wedi 'i dderbyn ... ry'n ni wedi ca'l blode o lefydd gwahanol, Seland Newydd, Chile."

£600,000

Fe dderbyniwyd yr arian ar gyfer Cronfa Apêl Glowyr Cwm Tawe.

Mae'r gronfa, gafodd ei sefydlu ychydig o ddyddiau wedi'r drychineb, wedi derbyn cyfraniadau o bedwar ban y byd.

Erbyn dydd Gwener y cyfanswm oedd £600,000.

Dywedodd Rheolwr Cyffredinol y Cwrs Rasio, Tim Long: "Mae ein cyfraniad ni'n hwb anferth i'r gronfa ac rydyn ni'n falch iawn ein bod ni wedi codi cymaint o arian.

"Yn sicr, mae'r bobol ddaeth i'r cwrs rasio wedi bod yn garedig iawn."

Straeon perthnasol