Ffôn Julie Morgan 'wedi ei hacio'

Rhodri a Julie Morgan Image copyright PA
Image caption Ar y pryd roedd Mr Morgan yn brif weinidog a Mrs Morgan yn Aelod Seneddol dros Ogledd Caerdydd.

Mae cyn brif weinidog Cymru Rhodri Morgan yn honni bod ffôn ei wraig, yr Aelod Cynulliad Julie Morgan, wedi cael ei hacio naw o weithiau rhwng 2005 a 2006.

Fe wnaeth Mr Morgan ei sylwadau mewn cynhadledd ym Mhrifysgol Caerdydd nos Iau.

Fe ddywedodd hefyd i'w wraig ac yntau gwrdd â Heddlu'r Met dair wythnos yn ôl i drafod yr honiadau.

Dywedodd Mrs Morgan bod y cwmni sy'n darparu gwasanaeth ffôn symudol wedi cysylltu â hi am alwadau a wnaed i'w ffôn symudol yn 2005 a 2006.

'Sioc fawr'

Dywedodd Mrs Morgan, a oedd yn Aelod Seneddol ar y pryd, ei bod wedi cael "sioc fawr".

Cafodd wybod gan Heddlu'r Met bod y galwadau wedi dod gan News International, perchnogion papurau newydd The Sun a'r News of the World.

Digwyddodd hyn pan oedd Mr Morgan yn brif weinidog a Mrs Morgan yn Aelod Seneddol dros Ogledd Caerdydd.

Collodd hi ei sedd yn y senedd yn 2010, ond cafodd ei hethol i'r cynulliad ym mis Mai.

Dywedodd Mrs Morgan wrth y BBC: "Gwelais i restr y galwadau. Tua naw dwi'n meddwl,

"Dwi ddim yn cofio siarad gyda neb o News International, ond yr oedd hyn bum mlynedd yn ôl.

"Dywedodd yr heddlu bod posibilrwydd bod fy ffôn wedi cael ei hacio.

"Roedd yn destun gofid mawr".

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.