Angladd preifat i Gary Speed ym Mhenarlâg

Gary Speed Image copyright PA
Image caption Cafodd ei angladd ei gynnal ym Mhenarlâg ddydd Gwener

Mae angladd preifat Gary Speed wedi cael ei gynnal ym Mhenarlâg, Sir Y Fflint, ddydd Gwener.

Roedd Cymdeithas Rheolwyr y Gynghrair wedi dweud mai dim ond teulu a chyfeillion agos oedd yn cael bod yn bresennol.

Cafodd yr angladd ei gynnal yn yr ardal lle y cafodd ei fagu.

Cafwyd hyd i Speed yn farw yn ei gartref yn Sir Caer y mis diwethaf. Roedd yn 42 oed.

Mae'r gymdeithas yn bwriadu trefnu gwasanaeth coffa cyhoeddus yn fuan.

Munud o barch

Agorodd Cyngor Sir Y Fflint lyfr coffa i Speed ddydd Iau, gan ddweud eu bod yn rhannu galar y teulu a'r cyhoedd.

"Roedd yn esiampl wych ac yn ysbrydoliaeth i eraill," meddai prif weithredwr y cyngor, Colin Everett.

"Mae holl gymunedau Sir y Fflint yn falch o lwyddiannau Gary fel pêl-droediwr a rheolwr."

Daeth cefnogwyr pêl-droed a rygbi ynghyd y penwythnos diwethaf i gofio Speed, gyda munud o barch ymhob gêm Uwchgynghrair ac yn y gêm rygbi rhwng Cymru ac Awstralia yn Stadiwm y Mileniwm.

Dywedodd ei weddw Louise ei bod yn gwerthfawrogi'r teyrngedau a negeseuon o gydymdeimlad.

Gall pobl lofnodi'r llyfr coffa ym mhrif fynedfa Cyngor Sir y Fflint yn Neuadd y Sir yn Yr Wyddgrug.

Mae llyfrau eraill ar gael yn swyddfeydd Cymdeithas Bêl-droed Cymru yng Nghaerdydd a'r Cae Ras yn Wrecsam.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.